Perezida Kagame yasheshe Umutwe w’Abadepite, umugaragariza ko usize udakemuye ibibazo bitatu

10 9-08-2018 - saa 15:24, Mathias Hitimana

Perezida Paul Kagame yasheshe Inteko Ishinga Amategeko, Umutwe w’abadepite, umugaragariza ko muri manda y’imyaka itanu urangije wize ibibazo amagana wagejejweho n’abaturage ariko ko usize bitatu bikigwaho.

Itegeko Nshinga rya Repubulika y’u Rwanda ryo mu 2003 ryavuguruwe mu 2015, mu ngingo ya 79 rivuga ko ku mpamvu z’amatora, Perezida wa Repubulika asesa Umutwe w’Abadepite hasigaye nibura iminsi mirongo itatu (30) kandi itarenga iminsi mirongo itandatu (60) ngo manda y’abawugize irangire.”

Ku byerekeye imirimo uyu mutwe wakoze kuva warahira ku wa 4 Ukwakira 2013, Donatille Mukabalisa wawuyoboraga yabwiye Umukuru w’igihugu ko wageze kuri byinshi birimo gusura abaturage hirya no hino mu gihugu, unakira ibibazo byabo byinshi, hafi ya byose birakemurwa.

Yagize ati “Umutwe w’Abadepite wakiriye kandi ibibazo by’abaturage bigera kuri 353 byoherezwa muri komisiyo ibifite mu nshingano irabisuzuma, Inteko Rusange ibifataho imyanzuro yashyikirijwe inzego bireba kugira ngo bikemuke. Tukishimira ko hari byinshi byakemutse. Kandi twakwishimira ko ibyo bibazo byose uko ari 353; 350 byasuzumwe bigafatirwa imyanzuro, ibibazo bitatu gusa ni byo byari bigisuzumwa ubwo bikazaherwaho muri manda itaha.”

Perezida w’Umutwe w’Abadepite yashimye Umukuru w’igihugu ko umubano mwiza u Rwanda rufitanye n’amahanga watumye Inteko Ishinga Amategeko yarwo ishimangira umubano mwiza n’izindi nteko, igendererwa cyane n’abadepite, abasenateri n’abandi.

Yakomeje agira ati “Bimwe mu byagiye bizana abashyitsi basuye Inteko Ishinga Amategeko ni ukureba intambwe imaze guterwa mu bwuzuzanye bw’abagore n’abagore mu iterambere ry’igihugu, bishingiye no kuba by’umwihariko u Rwanda ruri ku mwanya wa mbere ku Isi mu kugira umubare munini w’abagore mu Nteko Ishinga Amategeko, bafite ubushobozi, banakorana n’ubushake inshingano zabo, bafatanyiriza hamwe na bagenzi babo b’abagabo inshingano dusangiye kugira ngo twubake igihugu cyacu.”

Mu bindi bikomeye uyu mutwe wakoze ni ukuvugurura Itegeko nshinga ku busabe bw’abaturage bifuzaga gukomeza kuyoborwa na Perezida Kagame wari urangije manda ebyiri yemererwaga, baritora binyure muri Referendumu ndetse Mukabalisa amushimira ko yemeye icyifuzo cyabo.

Amategeko uyu mutwe watoye, Mukabalisa yavuze yafashije mu “guteza imbere ubukungu, korohereza ishoramari n’ubucuruzi, byanatumye u Rwanda rugira umwanya mwiza mu ruhando mpuzamahanga”.

Yanavuze ko hari n’amategeko y’ubucamanza, Ubushinjacyaha n’Ubugenzacyaha kugira ngo ibikorwa by’izo nzego byizerwe n’Abanyarwanda n’amahanga.

Mukabalisa yanavuze ko Abadepite babashije kugenzura ibikorwa bya Guverinoma, ugatumiza abayobozi ndetse ukajya inama y’ibikwiye gushyirwamo imbaraga, by’umwihariko kurushaho gukora igenamigambi, gukorera ku gihe no kurushaho gucunga neza umutungo w’igihugu.

Gutora abadepite bashya biteganyijwe ku wa 2 Nzeri 2018 uhereye ku Banyarwanda batuye muri Diaspora, abari imbere mu gihugu batore ku wa 3 Nzeri 2018.

Abadepite baririmba Indirimbo y'Igihugu mbere y'umuhango wo gusesa Umutwe w'Abadepite
Nyuma yo gusesa Umutwe w'Abadepite, Perezida Kagame yasabye ko gutora abashya bitazaba umuhango gusa
Abadepite bishimiye ko hari byinshi bakoze mu myaka itanu ishize ya manda yabo
Donatille Mukabarisa yabwiye Perezida Kagame ko mu bibazo 353 bakiriye; 350 byasuzumwe bigafatirwa imyanzuro, ibibazo bitatu gusa bikaba byari bigisuzumwa
Abadepite basoje manda bafashe ifoto y'urwibutso hamwe na Perezida Paul Kagame, Perezida wa Sena Bernard Makuza na Minisitiri w'Intebe Dr Edouard Ngirente

Amafoto: Village Urugwiro

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
yyy 2018-08-12 02:46:55

bakemuye ibihe se koko.iyo babitibwira tukabimenya n ibyo bitakemuwe tukabimenya.nahoze ndeba parlement ya senegal.turi inyuma pe ahubwo muzage kubigiraho na bamwe baza kubigiraho muboherezeyo.kdi nayo irimo abagore!!! démocratie iwacu iracyafite inzira ndende peee

2
mugisha 2018-08-11 10:36:46

turabashimira ku byo bagezeho

3
SILA 2018-08-10 13:22:17

Turabashima cyaneee! Ariko ikibazo cy’ubusumbane mu mishahara cyabaniye burundu. Mu bibazo 3 byaburiwe umuti nacyo kirimo? Aho we yahembwaga arenga 1,500,000Frw na za mission naho teacher wamwambukije inyanja agatinyuka kumuha 40,000Frw. Ibaze nawe!

4
Tugirimana 2018-08-10 08:07:56

Buriya se iyo tutagira abagore benshi mu nteko tuba turi inyuma y’aho turi ubu?

5
Nyiramategeko 2018-08-10 01:47:36

Ibibazo bitatu bitavuzwe aha ni ibihe?! Ibibazo si umubare(3) ahubwo hari no kubwira abaturage ibyo aribyo. Ndumva bitari bikomeye kubisobanura mu huryo burambuye.

6
Ndagijimana Adeodatus 2018-08-10 01:43:10

nyalo batagize fisa ntibibanze ku kibazo cy’ubusumbane bukabije mu mishahara.

7
Edouard 2018-08-09 16:56:08

Uyu wanditse inkuru ko afata agaciro Cheif Justice Prof Sam Rugege kandi ari umunyacyubahiro wa 4 aza imbere ya PM.
Be professional. Muri protocole niko bimeze kandi abanyamakuru nimwe muhugura kandi mukwiye ku mumenyesha abaturage Amakuru ntayo. Ndabashimiye

8
Mazina Davy 2018-08-09 10:44:14

Ubundi njye ndamwera akora ibikwiye

9
Munyakayanza Philbert 2018-08-09 10:40:45

inteko ishinga amategeko yakoze akazi gakomeye nkabanyarwanda turayishima kndi twifurije amahirwe masa abazagaruka muri manda itaha.Abandika inkuru mujye mubanza musubiremo ibyo mwandika harimo amakosa

10
Tegere 2018-08-09 09:06:01

Abadepite bari barangije neza manda iyo bamwe muri bo bataza gushyiraho itegeko ryongera umusoro inshuro 10 zose ku butaka kandi nusanzwe, twawubonaga bitugoye.
Ahari ba senateri bo bazashishoza, Reka dutegreze

Kwamamaza