Perezida Kagame yasabye impinduka mu turere twa nyuma mu mihigo ‘twiganje mu gice kimwe cy’igihugu’

39 9-08-2018 - saa 13:57, Philbert Girinema

Perezida Kagame yasabye ko uturere twaje mu myanya ya nyuma mu mihigo y’uturere mu mwaka w’ingengo y’imari wa 2017/2018, abatuyobora bashyira mu bikorwa ibyo bashinzwe ari byo gukorera abaturage abo binaniye bakagaragaza ko batabishoboye.

Ibi Umukuru w’Igihugu yabigarutseho ubwo yagezaga ijambo ku bitabiriye umuhango wo gushimira uturere twahize utundi mu mihigo y’umwaka ushize no gusinya iy’umwaka utaha.

Ibi bikorwa kandi byahuriranye no gusesa Inteko Ishinga Amategeko umutwe w’Abadepite ku mpamvu z’amatora; usoje manda yawo ya gatatu hakaba hateganyijwe amatora y’abayigize muri Nzeri uyu mwaka.

Akarere ka Rwamagana kongeye kuza ku mwanya wa mbere mu mihigo y’umwaka wa 2017/2018 gakurikirwa na Gasabo na Rulindo; mu gihe Nyamagabe, Ruhango na Nyanza aritwo twaje mu myanya ya nyuma.

Mu turere 15 twaje mu myanya ya nyuma, munsi y’amanota fatizo 68.8; umunani ni utwo mu Ntara y’Amajyepfo, tune ni utwo mu Burengerazuba, kamwe ko mu Majyaruguru, kamwe ko mu Mujyi wa Kigali n’akandi ko mu Burasirazuba.

Perezida Kagame yavuze ko kuba duhuriye mu gice kimwe cy’igihugu bifite icyo bisobanuye; agaruka ku kuba abayobozi badakorana ndetse batanegera abaturage.

Ati “Abari hasi naje kureba nsanga biganje mu gice kimwe cy’igihugu. Ubwo bigomba kuba bifite icyo bivuze, ntabwo byabaye bityo gutyo gusa. Sinzi ibyo aribyo. Icya kabiri naje kubaza, baza kumbwira aho bitagenze neza, bafite ikibazo mu buyobozi. Abayobozi birirwa mu makimbirane, bakemura ibibazo hagati yabo kurusha gukemura iby’abo bayobora.”

Yakomeje agira ati “Amakimbirane, kutavugana, kutumvikana, kudakorana neza biragenda bikavamo iriya myanya n’amanota byagaragaje. Nta kuntu wabinyura iruhande. Ingaruka yabyo ni ibi twabonye hano, nta kuntu wabihisha, ushobora kubihisha igihe gito ariko iyo byageze mu kubiteranya no kubitumurikira biraboneka.”

Perezida Kagame yavuze ko abayobozi badakwiye gukemura ibibazo byabo bwite ngo bibagirwe ibyo abo bashinzwe; ahubwo ko buri kimwe gikwiye guharirwa umwanya wacyo. Yabibukije ko inshingano bahawe, bari bazemeye bagaragaza ko bazanazishyira mu bikorwa, akibaza impamvu bidakorwa.

Ati “Gukorera abo ushinzwe, uba waravuze ngo nibo ugiye gukorera mu gihe uri umuyobozi, nabyo tujye kubisabira inkunga abaduha inkunga bicaranye natwe? Mwebwe abayobozi abaterankunga babahe no gukorana? Nabyo barabishinzwe?”

Babatunga ku byo mushoboye no ku byo mudashoboye? Ni ko mubyumva? Abanyafurika ubwo ni uko mwapfuye? Mwumva ko hari undi ushinzwe ubuzima bwanyu? Nta buzima mushaka se? ntabwo mufite, ntabwo mushaka? Kuki wumva ko watungwa n’undi muntu?”

Hari abaturage batazi abayobozi

Perezida Kagame yavuze ko hari abaturage bo mu bice bimwe na bimwe bagaragaza ko batajya babona abayobozi, akibaza impamvu baguma mu biro aho kujya kureba abo bashinzwe.

Yatanze urugero rw’abaturage bo mu Karere ka Nyaruguru babwiye Minisitiri w’Ubutegetsi bw’Igihugu, Francis Kaboneka ko batajya babona abayobozi.

Ati “Minisitiri Kaboneka wahoze aha, ejo bundi yagiye mu giturage bamubwira ko aribwo bwa mbere babonye umuyobozi. Ngo nibwo bwa mbere babonye abayobozi, bwa mbere. Bishoboka bite? Nyaruguru ntabwo ari igice cy’u Rwanda? Muvuga ko mumanuka mukajya mu baturage, Nyaruguru mukayisiga? Cyangwa muriruka mukinyabyayo kugira ngo bigaragare ko mwagezeyo. […] Bakagufotorera i Rusizi, ukavuga ko wagezeyo kubera ko wageze mu ifoto.”

Yakomeje agira ati “Abaturage ni abacu, ni abo dukomokamo ntabwo ari ab’ahandi tutazi. Ntabwo naza aha ngo mbabeshye, ngo mbashimishe ngo nyure iruhande ukuri kandi imyaka ibaye myinshi tubivuga, tubisubiramo buri munsi […] Igihe kirageze bigomba guhinduka. Aba turiya turere baje hanyuma; ibyo mukora bituma muza muri iriya myanya […] ni zo ngaruka ziza ku baturage muyobora. Ni yo ngaruka iri ku baturage.”

Umukuru w’Igihugu yakomeje avuga ko usanga abana baragwingiye cyangwa abandi barwaye bwaki mu gihe hari inzego zishinzwe ibyo bibazo byose.

Ati “Inzego munyumve, ejo mutazagira ibibazo, ndabararitse. Namwe bayobozi muri hano, muri munsi y’amanota y’impuzandengo; niba udashobora kugira intego yo gukorera abaturage ngo ubazamure, waza ukavuga uti ibi bintu simbishoboye cyangwa sinshaka kubikora. Kuza ukavuga ngo simbishoboye ni mushake undi ubikora, waba uri umugabo nagushimira; ariko niba wemeye inshingano zikore cyangwa se hakwiye kuboneka ingaruka.”

Perezida Kagame ubwo yageraga mu Ngoro y'Inteko Ishinga Amategeko
Perezida Kagame yitegereza ibyavuye mu isuzuma ry'imihigo
Perezida Kagame aganira na Minisitiri w'Intebe, Dr Edouard Ngirente
Abadepite basoje manda yabo, bafashe ifoto y'urwibutso na Perezida Kagame
Umukuru w'Igihugu yashimye abadepite uburyo bashyize mu bikorwa inshingano zabo
Perezida Kagame ari kumwe na Minisitiri w'Ubutegetsi, Francis Kaboneka (ibumoso), Umuyobozi w'Akarere ka Rulindo, Kayiranga Emmanuel (uwa kabiri uhereye ibumoso), Umuyobozi w'Akarere ka Rwamagana, Mbonyumuvunyi Radjab (uwa gatatu uhereye ibumoso), Umuyobozi w’Akarere ka Gasabo, Stephen Rwamurangwa (uwa kabiri uturutse iburyo) n'Umuyobozi w'Akarere ka Gakenke, Nzamwita Deogratias (ubanza iburyo)
Umuyobozi w'Akarere ka Rwamagana, Mbonyumuvunyi Radjab (hagati) mu ifoto y'urwibutso hamwe na Perezida Kagame na Minisitiri w'Ubutegetsi bw'Igihugu, Francis Kaboneka
Umuyobozi w'Akarere ka Rwamagana, Mbonyumuvunyi Radjab (hagati) mu ifoto y'urwibutso hamwe na Perezida Kagame na Minisitiri w'Ubutegetsi bw'Igihugu, Francis Kaboneka
Umuyobozi w'Akarere ka Gakenke, Nzamwita Deogratias, afite igihembo cyahawe akarere ke ka kabaye aka Kane
Umuyobozi w’Akarere ka Gasabo, Stephen Rwamurangwa, afite igihembo cyahawe akarere ke ka Kabiri
Umuyobozi w'Akarere ka Rwamagana, Mbonyumuvunyi Radjab, afite igihembo cyahawe akarere ke kongeye kuba aka mbere
Umuyobozi w'Akarere ka Rulindo, Kayiranga Emmanuel, afite igihembo cyahawe akarere ayobora ku bwo kwegukana umwanya wa gatatu
Abadepite baririmba Indirimbo y'Igihugu mbere y'umuhango wo gusesa Umutwe w'Abadepite

Amafoto: Village Urugwiro

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3 | 4  

1
king 2018-08-14 12:12:53

Hhhhhh, naho ndetse, muri turiya turere tumwe turazira ubuswa bwabakozi buhaterwa nitotezwa nitonesha, ahusanga abakozi bamwe bariswe ibimana bakigira ibimana bagakandagira bagenzi babo kdi ntabuhanga cg kumenya gukora akazi babarusha uretse kuba barateretswemo bagatoneshwa gusa, mbahe nkrugero muturere tumwe nkako ka nyaruguru gahora kavugwamo ibyo byabakozi batari mumyanya yabo, nabandi bayigabiwe byo guterekamwo ndetse murwego rwo kujijisha isi bakayifatanya ari itatu cg ibiri,, mbahe ibyaho, igitutu cyarabokeje bayishyira kwisoko imwe nimwe biyerurutsa, dukorana nababatoni babo bateretswemo arikose besnhi ntibakuboneye 10!!!!!! Ngaho namwe nimumbwire abo bahanga baho. ubwo baona uwuhe mwanya ko abenshi usanga arurunwa nokuba bagera kwasebuja bagahuza amagambo gusa??? Ahhhh, rero ngo bazayisubiza kwisoko nibyo bari kwirukankamo ngokuko hatsinze abatarabbo batazi da!!!

2
kayumba 2018-08-13 04:18:44

Ahaaaa uwa Nyaruguru we ngo yigererayo ntaho yajya, kdi bigaragara ko ananiwe ntaho ateze kugeza akarere, kuko bigaragaraga ko aho gukora ibyo akwiye gukora ashyize imbere ubusahuzi no kwirukanka ku baturage nabakozi ataejwe nabamuhora mu matwi batunzwe nakarimi nubugamb nkawe bagahishira ubuswa bwabo, kuba ntacyo bakora cg bashoboye bakabihishira murubwo buryo. Impinduka zirakenewe mu majyepfo kuko niho harangwa ubuyozi budahwitse reka hahore ibibazo bitandukanye. Muzehe natabare amajyepfo

3
musirikare 2018-08-11 03:37:01

Akarere ka gasabo kweri, kaba akakabiri gute kadahemba abanyabiraka?

4
nyanti 2018-08-11 03:04:28

Akarimi gasize umunyu kamaze kuvumburwa kuko hari abashyira imbaraga mukuvuga utugambo turyoshye bakagirango nibyo bikorwa

5
Magie 2018-08-10 06:47:05

Inama zanyu ni ingirakamaro mubyeyi

6
Sam Mukuru 2018-08-10 06:22:53

Rwamagana mukomereze Ahongaho.

7
Erica 2018-08-10 05:49:09

mubigomba guhinduka vuba hajyemo n’abakora mubijyanye n’ibyangimbwa by’ubutaka nabashinzwe ibyangombwa byo kubaka muturere tw’umujyi wa kigali.

8
Musoni peter 2018-08-10 02:30:25

Nyakubahwa Perezida wacu ntako utagira ahubwo ubwira abatumva. Akarere ka Nyarugenge natwe abayobozi ntituzi aho baba, amazi twarayabuze kandi ubu wasanga bakubeshya ko bayaduhaye. natwe uzatwoherereze Minister Kaboneka abatubarize icyo bakora mu biro.

9
Karinganire Bonane 2018-08-10 01:33:08

Ibyo Perezida wacu avuga nibyo rwose, hari abayobozi bakwiye gushyira mu bikorwa igenamigambi mu rwego rwo gukorera umuturage kuko umuturage niwe shingiro rya byose.Duhora dushima inama tugirwa n’intore izirusha intambwe

10
Umutoni 2018-08-10 01:06:03

Reka dushimire abadepite bacu bashaje ikivi cyabo dore ko muri madat baragije batoye amategeko meza bakatwumvira ubwo twabasabaga ko duhindura itegekoshinga. Ariko ndabona abayobozi bu uturere twaje mu mumya ya nyuma ubutaha bazagendere Ku mpanuro za nyakubahwa perezida bazatera imbere ndakurahiye.

Paji: 1 | 2 | 3 | 4  

Kwamamaza