Perezida Kagame yakiriye impapuro zemerera ba Ambasaderi 11 guhagararira ibihugu byabo mu Rwanda, harimo Intumwa ya Papa Francis mu Rwanda, Musenyeri Andrzej Jozwowicz, wamwijeje ubufatanye na Kiliziya yo mu gihugu gukomeza guharanira ubwiyunge bw’abanyarwanda n’iterambere rusange.

Ba Ambasaderi bakiriwe n’Umukuru w’Igihugu kuri uyu wa Kabiri barimo Anvire Djabia Joachim wa Côte d’Ivoire; Yevhenii Tsymbaliuk wa Ukraine; Raza Bashir Tarar wa Pakistan; Antonio Louis Pubillones Izaguirre wa Cuba; Elizabeth Taylor wa Colombia; Benson Keith Chali wa Zambia; Musenyeri Andrzej Jozwowicz wa Vatican.

Hari kandi Ambasaderi Benoit Ryelandt w’u Bubiligi; Elman Abdullayev wa Azerbaijan; Oliver Wonekha wa Uganda na Adamu Onoze Shuaibu wa Nigeria.

Nyuma yo kwakirwa na Perezida Kagame, Musenyeri Andrzej Jozwowicz yavuze ko yiteguye gufasha Kiliziya kubaka amateka mashya y’ubufatanye na Leta y’u Rwanda nk’uko Papa Francis yabyemereye Umukuru w’Igihugu muri Werurwe uyu mwaka mu ruzinduko yagiriye i Vatican.

Yagize ati “Mu bushobozi bwanjye bwose nzafasha Kiliziya yo mu gihugu gushyira mu bikorwa ubu bufatanye by’umwihariko mu bwiyunge kandi tuzanakora icyo aricyo cyose yaba mu iterambere rya gikiristu n’iterambere risanzwe ry’igihugu.”

Ambasaderi Anvire Djabia Joachim wa Côte d’Ivoire yabwiye itangazamakuru ko ibihugu byombi byiteguye gukomeza kwagura umubano bifitanye mu bucuruzi, umuco, ubukerarugendo, uburezi n’ibindi.

Yagize ati “Hari ibijyanye n’ubwikorezi bwo mu kirere muzi ko RwandAir ikorera ingendo Abidjan inyuze Cotonou, hari ubufatanye mu bumenyi n’umuco kandi twifuza kubwagura.”

Abahagarariye ibihugu byabo mu Rwanda bose bahuriye ku ngingo y’ubufatanye mu bucuruzi n’ishoramari, aho nka Ambasaderi wa Nigeria, Adamu Onoze Shuaibu, yavuze ko ashaka guteza imbere ishoramari hagati y’ibihugu byombi kandi asanga u Rwanda rwujuje ibisabwa byose ngo abashoramari barugane.

Yagize ati “Abashoramari bo muri Nigeria bakeneye ahantu bashora imari mu mutuzo n’umutekano kandi hano ndemeza ko bihari, Nigeria nayo amarembo arafunguye kandi twiteguye kwakira umushoramari wese.”

Ambasaderi wa Ukraine, Yevhenii Tsymbaliuk, wa mbere ugiye guhagararira iki gihugu mu Rwanda; yavuze ko azakoresha imbaraga zose umubano w’ibihugu byombi ugatera imbere yaba mu bucuruzi, ishoramari n’uburezi kuko bafite kaminuza zikomeye zafasha Abanyarwanda kurahura ubwenge.

Amb. Yevhenii uzaba afite icyicaro i Nairobi, yijeje ko hazanibandwa ku buhinzi aho Ukraine nk’igihugu gikomeye ku Isi mu buhinzi bw’ingano, ibigori n’indabo, bazatanga ubunararibonye buzafasha u Rwanda. Hazongerwa kandi ishoramari hagati y’ibihugu byombi.

Ambasaderi wa Cuba, Antonio Louis Pubillones Izaguirre, yavuze ko igihugu cye cyifuza kugira uruhare mu iterambere ry’u Rwanda; yasabye ko u Rwanda rwabavuganira hagakurwaho ibihano by’ubukungu bimaze imyaka 50 bafatiwe na Leta Zunze Ubumwe za Amerika.

Ba Ambasaderi bakiriwe, bane nibo bafite ibyicaro mu i Kigali, batatu babifite i Nairobi muri Kenya, abandi bane babifite Kampala, Kinshasa, Dar es Salaam na Addis Ababa muri Ethiopia.

Ambasaderi wa Pakistan mu Rwanda, Raza Bashir Tarar, ashyikiriza Perezida Kagame impapuro zimwemerera guhagararira igihugu cye
Intumwa ya Papa Francis mu Rwanda, Musenyeri Andrzej Jozwowicz, ishyikiriza Perezida Kagame impapuro ze
Ambasaderi w’u Bubiligi mu Rwanda, Benoît Ryelandt, ashyikiriza Perezida Kagame impapuro zimwemerera guhagararira igihugu cye mu Rwanda
Ambasaderi wa Uganda mu Rwanda, Oliver Wonekha, ashyikiriza Perezida Kagame impapuro zimwemerera guhagararira igihugu cye mu Rwanda
Intumwa ya Papa Francis mu Rwanda, Musenyeri Andrzej Jozwowicz
Ambasaderi wa Pakistan mu Rwanda, Raza Bashir Tarar
Ambasaderi wa Uganda mu Rwanda, Oliver Wonekha
Ambasaderi wa Ukraine mu Rwanda, Yevhenii Tsymbaliuk
Ambasaderi wa Zambia mu Rwanda, Benson Keith Chali aganira n'itangazamakuru nyuma yo kwakirwa na Perezida Kagame
Ambasaderi wa Azerbaijan mu Rwanda, Elman Abdullayev
Ambasaderi w’u Bubiligi mu Rwanda, Benoît Ryelandt
Ambasaderi wa Colombia mu Rwanda, Elizabeth Taylor
Ambasaderi wa Côte d'Ivoire mu Rwanda, Anvire Djabia Joachim
Ambasaderi wa Cuba mu Rwanda, Antonio Louis Pubillones Izaguirre
Ambasaderi wa Nigeria mu Rwanda, Adamu Onoze Shuaibu

Amofoto: Moses Niyonzima


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved