Perezida Kagame yasobanuye ko kuba umubare w’abagore bagaragara mu bikorwa by’iterambere ry’ikoranabuhanga ukiri muto, atari impamvu z’ikoranabuhanga ahubwo byose bishingiye kuri politiki yo gukemura ikibazo cy’uburinganire mu buryo kitagombye gukemukamo.

Mu biganiro nyunguranabitekerezo byabereye mu nama ya Transform Africa kuri uyu wa Kane, Perezida Kagame, yagarutse ku busumbane asobanura ko ari ikibazo gifite indi mvano kandi kigomba kwitabwaho mbere y’ibindi byose.

Muri iki kiganiro yari kumwe n’abandi bakuru b’ibihugu na za guverinoma batandukanye barimo; Visi Perezida wa Zambia, Inonge Wina; Minisitiri w’Intebe wa São Tomé, Patrice Emery Trovoada; Perezida wa Djibouti, Ismaïl Omar Guelleh; Perezida wa Niger, Mahamadou Issoufou; Perezida wa Mali, Ibrahim Boubacar Keïta; Minisitiri w’Intebe wa Gabon, Emmanuel Issoze-Ngondet na Minisitiri w’Intebe wa Guinée équatoriale, Francisco Pascual Eyegue Obama Asue.

Perezida Kagame asanga politiki zikemura nabi ibibazo bishingiye ku buringanire ari zo zituma umusanzu wa bamwe mu iterambere utagaragara, agasaba ko buri gihugu kibanza kureba ibindi byuho bishobora kuba ari imvano y’umusanzu muke w’abagore mu iterambere iryo ari ryo ryose.

Yagize ati “Icyuho mu iterambere ry’ikoranabuhanga gishingiye ku buringanire, mu by’ukuri ntabwo kizanwe n’ikoranabuhanga kandi ntabwo ari ryo rigiye kukizana, ni politiki yo gukemura ikibazo cy’uburinganire uko kitakagombye gukemuka.”

Yakomeje agira ati “Ni ukureba ni gute duhuriza hamwe abagore n’abagabo, abahungu n’abakobwa ngo bagire uruhare, batange umusanzu mu mibereho myiza n’iterambere ry’ubukungu bw’ibihugu byacu. Igihe twasubije iki, igihe politiki iha agaciro abagabo n’abagore mu buryo bungana, bakagira uburenganzira bumwe uko bikwiye, ibindi bizakurikiraho.”

Umukuru w’igihugu yongeyeho ko uburinganire mu burezi bw’abana b’abakobwa n’abahungu, ari byo bizatuma babyaza umusaruro ayo mahirwe y’uburezi butarobanura, bagateza imbere impano zabo bigatuma icyuho mu iterambere gishingiye ku buringanire kidakomeza kuba ikibazo.

U Rwanda rwabaye ishuri

Perezida Kagame yatanze urugero ku Rwanda, avuga ko rwavugutiye umuti ikibazo cy’ubusumbane mu iterambere ruhereye ku guha abana bose amahirwe angana mu burezi, kandi ibi bimaze gutanga umusaruro ufatika.

Ati “Ndabaha urugero iwacu, iyo urebye mu mashuri abanza n’ayisumbuye twagejeje uburezi ku bahungu n’abakobwa mu buryo bungana, twigiye ku mateka y’aho amashuri abanza n’ayisumbuye twari dufite abahungu benshi kuruta abakobwa, ubu byarahindutse imibare yerekana ko abakobwa biga amashuri abanza n’ayisumbuye kuruta abahungu.”

Yongeyeho ko no mu mashuri makuru na za Kaminuza ari ko bimeze kuko abakobwa bashishikarizwa kwiga ibyo bahoze bita ko atari ibyabo ahubwo ari iby’abagabo gusa nk’imibare, siyansi n’ibindi kandi ababyitabira bakarushaho kwiyongera.

Visi Perezida wa Zambia, Inonge Wina, asanga icyakorwa kugira ngo iterambere rishingiye ku ikoranabuhanga rigirwemo uruhare na buri wese ntawe usigaye inyuma, kandi abagore bagahabwa amahirwe menshi kuko ari bo bagize umubare munini w’abaturage ba Afurika.

Yagize ati “Dukeneye kubona ikoranabuhanga ritezwa imbere kandi rigakoreshwa n’abagore. Dukeneye kubona mu rwego rw’ubuzima hakoreshwa ikoranabuhanga kuko abaturage benshi bakenera serivisi z’ubuzima by’umwihariko ku bagore.”

Inonge yagaragaje ko bikwiye ko Afurika ishyiraho uburyo bw’imikorere ku bikorera, hagamijwe guteza imbere abagore. Aha yavuze ko nk’igihe umushoramari aje mu gihugu akamenyeshwa ko politiki zacyo ziha agaciro uburinganire nk’ihame, nawe akarikurikiza.

Icyuho mu iterambere ry’ikoranabuhanga gishingiye ku buringanire, ni kimwe mu byagaragajwe ko bikomeje gusubiza inyuma ubukungu bwa Afurika. Imibare igaragaza ko 30% by’abantu bitabiriye inama ku guhindura Afurika binyuze mu ikoranabuhanga ‘Transform Africa 2017’ ari abagore mu gihe abagabo ari 70%.

Visi Perezida wa Zambia, Inonge Wina(wa kabiri ibumoso); Minisitiri w’Intebe wa São Tomé, Patrice Emery Trovoada; Perezida wa Djibouti, Ismaïl Omar Guelleh; Perezida Kagame; Perezida wa Niger, Mahamadou Issoufou; Perezida wa Mali, Ibrahim Boubacar Keïta; Minisitiri w’Intebe wa Gabon, Emmanuel Issoze-Ngondet na Minisitiri w’Intebe wa Guinée équatoriale, Francisco Pascual Eyegue Obama Asue


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved