IGIHE

Perezida Kagame yagiranye ibiganiro na Dr Adesina uyobora BAD (Amafoto)

0 11-07-2019 - saa 13:49, IGIHE

Perezida Paul Kagame yakiriye mu biro bye Dr Akinwumi Adesina uyobora Banki Nyafurika Itsura Amajyambere (BAD) akaba n’umuyobozi w’inama y’ubutegetsi y’ikigega Africa50, gitera inkunga imishinga y’ibikorwa remezo kuri uyu mugabane.

Dr Adesina yari mu Rwanda yitabiriye inama y’abanyamigabane ba Africa50, bamaze iminsi ibiri mu Rwanda mu nama y’Inteko rusange yabaye ku wa 9-10 Nyakanga.

Muri iyo nama yibanze ku guhanga ibishya, Minisitiri w’Intebe, Dr Edouard Ngirente, yavuze ko Afurika igomba gushyiraho gahunda yayo ijyanye n’ikoranabuhanga no guhanga ibishya kugira ngo bifashe urubyiruko kwibona no kubyaza umusaruro aho Isi igeze mu ikoranabuhanga.

Banki nyafurika Itsura Amajyambere Dr Adesina ayobora, isanzwe ari umufatanyabikorwa ukomeye w’u Rwanda mu mishinga minini, nk’aho mu 2016 yemereye Guverinoma y’u Rwanda inguzanyo ya miliyoni 94 z’amadolari zo gusana no kwagura umuhanda Kagitumba-Kayonza-Rusumo ungana na kilometero 208.

Mu Ukwakira 2018 bwo hasinywe amasezerano y’inguzanyo ya miliyoni €229 zigenewe ibikorwa byo gukwirakwiza amashanyarazi, ndetse muri Mutarama uyu mwaka, hagati ya Guverinoma y’u Rwanda na BAD hasinywe amasezerano y’inguzanyo ya miliyoni €115 zo gushyirwa mu mishinga yo gukwirakwiza amazi.

Ni kimwe n’ikigega Africa50 aho mu Ugushyingo 2018 cyasinyanye na Guverinoma y’u Rwanda amasezerano y’ubufatanye afite agaciro ka miliyoni $400, agamije kunoza no gutera inkunga umushinga wa Kigali Innovation City (KIC).

Muri ayo masezerano, Africa50 izaba ari nk’umuterankunga n’umufatanyabikorwa, maze yifashishije ubunararibonye ifite mu bijyanye n’ibikorwa remezo, ifatanye n’Ikigo cy’Igihugu cy’Iterambere, RDB, mu kunoza uwo mushinga witezweho gutuma u Rwanda ruba igicumbi cy’ikoranabuhanga no guhanga ibishya.

Umushinga wa KIC wubatswe mu gace kahariwe inganda mu Karere ka Gasabo uzatwara miliyari $2. Uzaba igicumbi cya kaminuza mpuzamahanga, ibigo by’ikoranabuhanga, inyubako z’ubucuruzi n’ibindi.

Inyubako ziyibarizwamo ni nka Kaminuza ya Carnegie Mellon (CMU), African Leadership University (ALU) n’Ikigo Nyafurika cy’Ubumenyi bushingiye ku mibare (AIMS).

Biteganywa ko KIC izafasha mu gukurura ibigo by’ikoranabuhanga biturutse impande zose z’Isi kugira ngo bikorere mu Rwanda, hagamijwe ko rurushaho kuba igicumbi cy’ikoranabuhanga ndetse rwubake ubukungu bushingiye ku bumenyi.

Perezida Kagame hamwe na Dr Akinwumi Adesina uyobora BAD
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza