Perezida Kagame yagaragaje icyizere cy’iterambere rya serivisi z’ubwishingizi muri Afurika

4 12-02-2018 - saa 14:48, Cyprien Niyomwungeri

Perezida Kagame yavuze ko gukoresha ikoranabuhanga, kwiyongera k’ubukungu bw’abaturage no kwishyira hamwe kw’Abanyafurika mu bijyanye n’ubucuruzi, ari bimwe mu bizakomeza guteza imbere urwego rwa serivisi z’ubwishingizi muri Afurika.

Mu nama ya 42 y’Ihuriro Nyafurika ry’Amasosiyete y’Ubwishingizi (FANAF), iteraniye i Kigali, Umukuru w’Igihugu yagaragaje ko ubwishingizi budasigana n’iterambere ry’ubukungu bw’igihugu kuko bufite uruhare runini rungana na 70% rw’ibyinjira na 60% mu mirimo.

Yavuze ko ibigo by’ubwishingizi bifite uruhare rukomeye mu bucuruzi bwambukiranya imipaka, cyane cyane uko bikomeza gufasha ababigana bigatuma bibika amafaranga menshi yifashishwa mu ishoramari ry’imbere mu gihugu, bityo bikongera umubare w’imishinga ishobora gukorwa mu bukungu bw’igihugu.

Iyi nama izasozwa tariki 15 Gashyantare 2018, ihurije hamwe abagera kuri 800 baturutse mu bihugu 32 bya Afurika, barimo abatanga serivisi z’ubwishingizi n’abandi bafatanyabikorwa.

Perezida Kagame yavuze ko nubwo ubwishingizi ari ingenzi mu gukomeza guhindura ubukungu bwa Afurika, uru rwego rutaragera ahashimishije kuko Afurika itanga ibingana na 1.5% by’amasezerano y’ubwishingizi ku Isi, ni ukuvuga Miliyari 75 z’amadolari.

Kimwe cya kane cy’amasezerano y’ubwishingizi ku mugabane wa Afurika ava muri Afurika y’Epfo, ibihugu bisigaye byose bigatanga munsi ya 0.5%. Ibyinjizwa ku mwaka na buri kigo mpuzamahanga cy’ubwishingizi muri 15 bya mbere cyinjiza ku mwaka amafaranga angana n’agaciro mbumbe k’isoko ry’ubwishingizi rya Afurika.

Perezida Kagame yagaragaje ko ibi byerekana ko inzira ikiri ndende ariko hari icyizere cy’uko ubwishingizi buzakomeza gutera imbere.

Yagize ati “Icya mbere ni uko nubwo imibare atari myiza, hari amahirwe agaragaza ko serivisi z’ubwishingizi zizakomeza gutera imbere muri Afurika, cyane ko abari mu cyiciro cy’ubukungu cyo hagati bakomeje kwiyongera.”

Yakomeje avuga ko ibigo by’ubwishingizi byo muri Afurika bigomba kwagura izi serivisi kandi bigashishikarira gukoresha ikoranabuhanga nkuko amabanki n’amasoko y’imari n’imigabane arikoresha, rigatuma ageza serivisi ku bantu benshi.

Mu ijambo rye Umukuru w’Igihugu yakomeje avuga ko kuba inzitizi zibangamiye ubucuruzi muri Afurika zigenda zigabanuka bizatuma ubwishingizi butera imbere kuko abantu bazatinyuka gukora. Aha yagarutse ku masezerano yo gushyiraho akarere k’ubucuruzi muri Afurika azasinyirwa i Kigali mu kwezi gutaha.

Umuyobozi wa FANAF, Adama Ndiaye, yavuze ko hari intambwe imaze guterwa mu bwishingizi muri Afurika ariko hari inzego zikwiye kubyazwa umusaruro zirimo ikoranabuhanga, ubuhinzi n’izindi.

Minisitiri w’Imari n’Igenamigambi, Gatete Claver, yabwiye abitabiriye ko ibijyanye n’imiturire, impinduka mu rwego rw’ubuhinzi, ubwiyongere bw’abaturage, impinduka z’ibidukikije n’ikoranabuhanga mu bukungu bwa Afurika, ari amahirwe ibigo by’ubwishingizi byigira hamwe uko byabyaza umusaruro.

Yakomeje agaragaza ko hakiri inzitizi zikwiye kuvugutirwa umuti binyuze mu bufatanye bw’inzego z’abikorera n’abatanga serivizi z’ubwishingizi.

Yagize ati “Hari umubare muto w’abakoresha ikoranabuhanga, kudahanga udushya, ubumenyi buke mu by’imari n’ubwishingizi, kuba nta buryo bw’ubwishingizi buri muturage yibonamo n’uguhangana ku masoko.”

Ihuriro Nyafurika ry’amasosiyete y’ubwishingizi ryashinzwe mu 1976 rigamije guteza imbere abatanga serivisi z’ubwishingizi muri Afurika. Ubu rigizwe n’ibigo by’ubwishingizi 206 byo mu bihugu 29.

Umunyamabanga Nshingwabikorwa w'Ishyirahamwe ry'Ibigo by'Ubwishingizi mu Rwanda, Jean Pierre Majoro, aganira n'abanyamakuru mu itangizwa ry'iyi nama
Umuyobozi wa Polisi y’Igihugu, IGP Emmanuel Gasana, yari yitabiriye iyi nama
Umuyobozi wa gahunda muri iyi nama yari Regis Isheja
Guverineri wa Banki Nkuru y’Igihugu, John Rwangombwa ari kumwe na Visi Guverineri wa Banki Nkuru y’Igihugu, Dr Monique Nsanzabaganwa baganira n’umwe mu bitabiriye inama
Umuyobozi w’Ikigo cy’Igihugu cy’Iterambere, Clare Akamanzi, aganira n’umwe mu bitabiriye iyi nama yiga ku bijyanye n’ubwishingizi
Minisitiri w'Ubucuruzi n'Inganda, Vincent Munyeshyaka, nawe yari yitabiriye iyi nama
Perezida Kagame yahaye ikaze abitabiriye iyi nama abifuriza kuzagira ibiganiro byiza mu minsi bazamara mu Rwanda
Minisitiri w’Imari n’Igenamigambi, Amb. Claver Gatete ageza ijambo ku bari bitabiriye iyi nama
Perezida Kagame yabwiye abitabiriye iyi nama ati "Kuba mwahuye muturutse mu bihugu bigera kuri 32 byo ku Mugabane wa Afurika, tutirengagije n'abandi baturutse hakurya ku yindi migabane, byerekana urukundo mukunda Afurika kandi turabishima cyane"
Perezida Kagame yasabye imikoranire hagati y'abikorera na Leta mu kugeza ubwishingizi ku baturage
Perezida Kagame yavuze ko 1/4 cy'amasezerano y'ubwishingizi ku mugabane wa Afurika ava muri Afurika y'Epfo, igice gisigaye cyose gitanga munsi ya 0.5%
Umuyobozi wa FANAF, Adama Ndiaye, yavuze ko hari intambwe imaze guterwa mu bwishingizi muri Afurika
Perezida Kagame yabwiye abari bitabiriye iyi nama ko ibigo by’ubwishingizi bituma abashoramari batinyuka

Amafoto: Niyonzima Moses

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
BAZIKI ISMAEL 2018-02-13 07:31:23

YEGO UBYEYI NUYU NYAGASANI AZAJYE AMUGENDA IMBERE

2
Kamina 2018-02-12 16:20:54

Insurance companies ntacyo zitumariye uretse kunyunyuza imitsi y’abanyarwanda kandi BNR ikabiha umugisha. Muhere ku cyemezo giherutse gufatirwa ubwishingizi bw’amamodoka it is a shame! Ibintu abantu baragenda bakabyihererana bakaza baturaho ibyemezo ku baturage. Imiyoborere myiza twirirwa turirimba iherereye he? Ni mu magambo gusa Nina tudafite ijambo kubyemeza bidufatirwa. Nzaba mbarirwa ejo hazaza h’iki gihugu.

3
k.fred 2018-02-12 16:07:48

Dadi twari twakubuze

4
KAGABO 2018-02-12 09:35:14

Great work and well done, Excellency , the price of insurance in Rwanda will is too high; hope GOR will discuss with ASSAR to reduce a bit.

Kwamamaza