Perezida Ali Bongo wa Gabon ategerejwe mu Rwanda

0 13-02-2018 - saa 07:07, Ishimwe Israel

Perezida wa Gabon, Ali Bongo Ondimba, aragirira uruzinduko mu Rwanda kuri uyu wa Kabiri, tariki ya 13 Gashyantare 2018, rugamije gutsura umubano hagati y’ibihugu byombi.

Biteganyijwe ko Perezida Paul Kagame yakira mugenzi we wa Gabon, Ali Bongo utegerejwe i Kigali.

Perezida Ali Bongo umaze kubaka umubano uhamye n’u Rwanda muri Kamena 2016 yari i Kigali mu Nama yiga ku mugambi wo kugira umugabane wa Afurika isoko rimwe mu ikoranabuhanga “Smart Africa.” Icyo gihe we na Perezida Kagame bakuyeho amafaranga yacibwaga umuntu ukoresheje umurongo wa telefone mu guhamagara hagati y’ibihugu byombi.

Perezida Ali Bongo w’imyaka 59 yanitabiriye irahira rya Perezida Kagame mu muhango wabaye ku ya 18 Kanama 2017.

Umukuru w’Igihugu Paul Kagame aherutse kugirira uruzinduko muri Gabon ku ya 28 Ukwakira 2016, aho yageze avuye muri Mozambique na Congo Brazzaville.

Perezida Kagame na mugenzi we Ali Bongo baheruka guhurira mu Nteko Rusange ya 30 y’Abakuru b’Ibihugu bigize Umuryango wa Afurika Yunze Ubumwe (AU) mu 2018, yanahuriranye n’itangira rya manda ye nk’umuyobozi wayo.

U Rwanda na Gabon bisanzwe bifitanye imikoranire n’ubuhahirane binyuze mu bwikorezi bwo mu kirere aho Sosiyete Nyarwanda ya Rwandair, ikorera ingendo i Libreville mu Murwa Mukuru wa Gabon.

Gabon ni igihugu gikungahaye ku bucukuzi bwa peteroli, ubucuruzi bw’imbaho n’amabuye y’agaciro.

Urugaga rw’Abikorera mu Rwanda n’inzego zo muri Gabon bateganya kunoza imikoranire yo gutangira kuhakorera ubucuruzi nk’inzira yo guteza imbere ibikorerwa mu Rwanda ‘Made in Rwanda’ no guhanga imirimo myinshi.

U Rwanda na Gabon basinyanye amasezerano y’imikoranire mu 1976, aza kuvugururwa mu 2010. Yashyizweho umukono ubwo Minisitiri w’Ububanyi n’Amahanga w’u Rwanda yagiriraga uruzinduko muri Gabon nyuma y’uko Perezida Ali Bongo yasuraga u Rwanda muri Nzeri 2010 aho yari yitabiriye Inama y’Intego z’Ikinyagihumbi (MDGs) n’ibirori byo kurahira kwa Perezida Kagame wari watorewe manda ya kabiri y’imyaka irindwi.

Ubwo Perezida Kagame yakirwaga na Bongo mu 2016 mu ruzinduko yari yagiriye muri Gabon
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza