Nk’uko bimaze kuba umuco buri mwaka, mu turere hongeye gutangizwa ukwezi kw’imiyoborere myiza, aho abayobozi bamanuka bakegera abaturage bakabagezaho ibibazo bafite.

Umunyamabanga wa Leta muri Minisiteri y’Ubutegetsi bw’Igihugu (MINALOC) ushinzwe Iterambere ry’Abaturage, Harelimana Cyriaque kuri uyu wa Kabiri tariki ya 10 Ukwakira ari kumwe n’abayobozi b’Umujyi wa Kigali, batangirije uko kwezi mu Murenge wa Kanyinya, Akarere ka Nyarugenge.

Harelima yijeje abaturage ko uku kwezi kuzabafasha gukemurirwa ibibazo byabo, anabashishikariza gukomeza kugira ubufatanye na leta bitabira gahunda zayo.

Yagize ati “Hari inzego nyinshi zizamanuka zikegera abaturage zikemura ibibazo byabo, tukagira umwihariko wo kuganira nabo kugira ngo tubibutse uburenganzira bwabo ariko tunabashishikariza ibindi bintu byabateza imbere.”

Yakomeje asaba inzego z’ibanze gukurikirana ibibazo by’abaturage vuba bitagombye kugera mu nzego zo hejuru kandi babifitiye ubushobozi kuko bizatuma abaturage babona ko ubuyobozi bubari hafi.

Umuyobozi wungirije w’Umujyi wa Kigali ushinzwe imibereho myiza y’abaturage, Patricia Muhongerwa, yijeje abaturage ko iyo hari imiyoborere myiza abaturage bagira iterambere rirambye kandi ko bakwiye gushyigikira ibibahuza kuko ari byo bizatuma barushaho kugera ku byiza bifuza.

Yagize ati “Ahatari ubumwe nta terambere, mukomeze rero mushyigikire ibibahuza murwanye ibibatandukanya kuko ibibi ntacyo byatugezaho.”

Ibibazo abaturage bagiye bagaragaza umwanya bijyanye no guhinduranya ibyangombwa by’ubutaka bavuga ko bihenze; abasaba ko abari mu cyiciro cya gatu cy’Ubudehe nabo bajya bemererwa gukora imirimo muri VUP n’ibindi.

Abaturage bahawe umwanya bagaragaza ibibazo bafite n'ibyo bashima abayobozi
Umuyobozi wungirije w'Umujyi wa Kigali ushinzwe imibereho myiza y'abaturage, Patricia Muhongerwa
Abayobozi bijeje abaturage gukemura ibibazo byabo ku gihe
Abayobozi bijeje abaturage gukemura ibibazo byabo ku gihe
Abaturage biyemeje kujya bubahiriza gahunda za leta ku gihe


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved