Nyamirambo: Skol yatangije umushinga wo kurwanya ubukene uzatwara asaga miliyoni 180 Frw

1 14-04-2018 - saa 20:43, Manzi Rema Jules

Umuyobozi w’Uruganda rukora inzoga rwa Skol ku Isi, Thibault Relecom, yatangije ku mugaragaro umushinga ufite agaciro k’asaga miliyoni 180 z’amafaranga y’u Rwanda, uzashyirwa mu bikorwa n’Umuryango urwanya ubukene, FXB, wagenewe abaturage bo mu Murenge wa Nyamirambo.

Uyu mushinga watangirijwe ku mugaragaro i Nyamirambo kuri uyu wa Gatandatu, tariki 14 Mata 2018, uri mu ruhererekane rw’ibikorwa bizamura imibereho myiza y’abaturage, uruganda rwa Skol rusanzwe rukora.

Umushinga watangijwe uzafasha imiryango itishoboye ituye mu Murenge wa Nyamirambo, mu bijyanye no kwihangira imishinga iciriritse ibafasha mu mibereho ya buri munsi, kwishyurirwa ubwishingizi mu kwivuza n’uburezi bwiza ku bana.

Umuyobozi w’Uruganda rwa Skol ku Isi, Thibault Relecom, yashimye iterambere u Rwanda rumaze kugeraho, avuga ko na Skol nk’uruganda rukorera mu gihugu rufite inshingano zo kugira uruhare mu mibereho myiza y’Abanyarwanda.

Yagize ati “Nyuma y’ibikorwa by’ubucuruzi dukora nka Skol, tugira n’ibindi bitandukanye byo gufasha abantu kugira ubuzima bwiza. Ntabwo tumaze igihe kinini mu Rwanda ariko ni kimwe mu bihugu byiza dufitemo ibikorwa, gitera imbere mu buryo bwihuse kubera ubuyobozi bwiza; niyo mpamvu natwe twumva ko dufite inshingano zo kugira uruhare muri iryo terambere.”

Mu Ukwakira 2017, nibwo uyu mushinga watangiye gukorera mu Rwanda. Skol izatanga ingengo y’imari ingana na miliyoni 185 z’amafaranga y’u Rwanda, muri uyu mushinga uzakurikiranwa n’Umuryango utegamiye kuri Leta wa FXB. Biteganyijwe ko uzagera ku miryango 460 mu gihe cy’imyaka itatu.

Umuyobozi wa FXB mu Rwanda, Habyarimana Emmanuel, yavuze ko intego nyamukuru bafite ari ugufasha abana bavuka mu miryango itishoboye kugira ubuzima bwiza ariko bikazagendana no gufasha ababyeyi babo kubona ibyo bakora kandi bafite icyizere ko mu myaka itatu bazaba bayigezeho.

Mbere yo gufungura uyu mushinga ku mugaragaro mu birori byabereye i Nyamirambo muri Top Gym Muvandimwe, abayobozi ba Skol n’aba FXB basuye umwe mu miryango ifashwa muri uyu mushinga.

FXB ni umuryango Mpuzamahanga ugamije gufasha abantu bakennye n’abafite ubwandu bwa Virusi itera SIDA, washinzwe mu 1989, utangijwe na Albina du Boisrouvray.

Uyu Muryango ukorera mu bihugu 18 ku Isi, umaze kugera ku barenga miliyoni 18 barimo abana n’abakuru. Muri Afurika yo munsi y’Ubutayu bwa Sahara, FXB yakoranye n’imiryango y’abana barenga miliyoni 15 babuze ababyeyi bazize Sida n’abandi bakeneye ubufasha.

Abagenerwabikorwa bahaye impano Umuyobozi w’Uruganda rwa Skol ku Isi, Thibault Relecom
Abagenerwabikorwa b'uyu mushinga bari bitabiriye itangizwa ku mugaragaro ryawo
Abiga mu mashuri yisumbuye na bo bari bitabiriye uyu muhango
Umuyobozi ushinzwe Imenyekanishabikorwa mu Ruganda rwa Skol, Gatabazi Rutikanga Tity, yatangaje ko uyu mushinga ugamije gufasha abatuye muri Nyamirambo kuva mu bukene
Thibault Relecom yahaye abanyeshuri ibikoresho bitandukanye birimo ibiryamirwa
Umuyobozi w’Uruganda rwa Skol ku Isi, Thibault Relecom, yashimye iterambere u Rwanda rumaze kugeraho
Uyu mushinga ufasha n'abana bo mu mashuri abanza kwiga neza
Umuyobozi wa FXB mu Rwanda, Habyarimana Emmanuel (wambaye amadarubindi), ari kumwe n'abagenerwabikorwa b'umushinga
Umuyobozi w’Uruganda rwa Skol ku Isi, Thibault Relecom n'uwa FXB mu Rwanda, Habyarimana Emmanuel, basuye urugo rw'umwe mu bagenerwabikorwa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kkkooo 2018-04-17 02:28:58

Ubu nyamirambo niyo babonyemo ubukene?

Kwamamaza