IGIHE

Nyamagabe: Abana bagendaga ibirometero birindwi bajya kwiga bagiye kubakirwa ishuri

1 12-08-2019 - saa 09:09, Prudence Kwizera

Ubuyobozi bw’Akarere ka Nyamagabe ku bufatanye na Minisiteri y’Urubyiruko batangiye igikorwa cyo kubakira abana bo mu Murenge wa Cyanika ibyumba by’amashuri kuko bakora urugendo rurerure bajya kwiga.

Ni igikorwa cyatangijwe kuri uyu wa Gatandatu ubwo hizihizwaga Umunsi Mpuzamahanga wahariwe urubyiruko.

Ibyo byumba by’amashuri bigiye kubakwa mu Mudugudu wa Nyabisindu mu Kagari ka Nyanza.

Urubyiruko rwo mu Karere ka Nyamagabe rwifatanyije n’abaturage ndetse n’abayobozi mu muganda wo gusiza ikibanza cy’ahazubakwa ibyumba by’amashuri umunani, ubwiherero 12 n’ibiro by’umuyobozi waryo.

Umuyobozi wungirije ushinzwe imibereho myiza y’abaturage mu Karere ka Nyamagabe, Mujawayezu Prisca, yavuze ko bahisemo kubaka iryo shuri ribanza muri uwo mudugudu wa Nyabisindu kuko byasabaga umwana uhavuka gukora urugendo rw’ibirometero birindwi kugira ngo agere ku ishuri mu Cyanika.

Ibyo ngo byagiraga ingaruka zituma bamwe mu bana bava mu ishuri.

Ati “Bizaba bigabanutse kuko abazajya bava kure bazajya bakora kirometero eshatu, bizatuma n’abana bakunda ishuri kuko batazajya bavunika cyane bajya ku ishuri.”

Imibare itangwa n’Akarere ka Nyamagabe, igaragaza ko mu itangira ry’uyu mwaka w’amashuri bari bafite abana basaga 2 000 bataye ishuri ariko kuri ubu bagabanutse hasigara abagera kuri 700.

Ni igikorwa cyashimwe n’ababyeyi batandukanye bavuga ko abana babo bagiye kujya biga hafi.

Bamwe mu rubyiruko rwo mu karere ka Nyamagabe bitabiriye uwo muganda bavuze ko ibikorwa bitabira ndetse n’ubukangurambaga bakora bituma n’urundi rubyiruko rwari mu nzira mbi ruzivamo ndetse bigafasha n’abandi banyarwanda kugira umutima ukunda igihugu.

Ishimwe Eliezel ati “Tubakundisha igihugu kandi iyo umaze gukunda igihugu nawe wumva ko kugikorera bikureba.”

Umunyamabanga uhoraho muri Minisiteri y’Urubyiruko, Bigenimana Emmanuel, yasabye urubyiruko guharanira kujyana n’ikoranabuhanga Isi igezeho uyu munsi kugira ngo rukore ibirufitiye akamaro biteza imbere igihugu.

Ati “Biradusaba ko uburezi nabwo tubuhuza n’icyo Isi ya none idusaba n’icyo ubukungu budusaba. Ibi biravuga ngo tugomba kongera imbaraga mu gukurikirana ikoranabuhanga tukareba ubucuruzi bugezweho n’ubuhinzi bugezweho kugira ngo dushobore guhaza isoko.”

Muri uyu mwaka Akarere ka Nyamagabe karateganya kubaka ibyumba by’amashuri 30 no gusana ibindi 36 no kubaka ubwiherero 24.

Abayobozi batandukanye bitabiriye umuganda wo kubaka ibyumba by'amashuri mu Karere ka Nyamagabe
Hakozwe igikorwa cyo gusiza ahagiye kubakwa ibyumba by'amashuri
Urubyiruko rwavuze ko ibikorwa bitabira ndetse n’ubukangurambaga bakora bituma bagenzi babo bari mu nzira mbi bazivamo
Hashyizwe ibuye ry'ifatizo ahagiye kubakwa ibyo byumba by'amashuri

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Hilary Nizeyimana 2019-08-12 07:19:05

Icyo gikorwa nicyiza cyane

Kwamamaza