IGIHE

Nta mwanya dufite wo kuzarira mu byo dukora- Guverineri Gasana

0 23-08-2019 - saa 11:12, Akayezu Jean de Dieu

Umuyobozi w’Intara y’Amajyepfo, Gasana Emmanuel, yabwiye urubyiruko ruri mu mashuri yisumbuye ko rukwiye kwirinda kuzarira no gutakaza umwanya mu bidafite umumaro.

Yabigarutseho mu biganiro byateguwe n’Umuryango uharanira ubwigenge, agaciro n’Iterambere by’Umunyafurika, Ishami ry’u Rwanda (Panafrican Movement Rwanda), hagamijwe kongerera ubushobozi urubyiruko binyuze mu mashuri yigisha ubumenyi ngiro nk’uburyo bwo kuzana impinduka no kwihutisha iterambere rya Afurika.

Ibi biganiro byabereye ku cyicaro cy’Intara y’Amajyepfo ku wa Gatatu tariki 21 Kanama 2019, byitabirwa n’abasaga ku 700 biganjemo urubyiruko rwo mu mashuri yisumbuye by’umwihariko ay’imyuga n’ubumenyi ngiro.

Komiseri Ushinzwe Urubyiruko muri PAM- Rwanda, Shyaka Michael Nyarwaya, yavuze ko impamvu y’ibi biganiro ari ubukangurambaga kugira ngo abanyeshuri by’umwihariko abari kwiga imyuga n’ubumenyi ngiro babashe kugira imyumvire yo kumenya ko igihugu cyabo aribo kigomba kubakirwaho.

Yagize ati “Turashaka ko urubyiruko rumenya ko igihugu cyacu kigomba kubakirwa kuri twe, ariko dufite ubumenyi n’ubuhanga, dukeneye ko abana b’abanyarwanda bakora ibyogajuru, bagakora imodoka.”

Yakomeje agira ati “Uwo mwana w’umunyarwanda naba azi gukora telefone ntabwo azafata impamyabumenyi ngo ayishyire guverineri amusaba akazi ahubwo azamubwira ati ndagukorera telefone umpe amafaranga.”

Guverineri Gasana yavuze ko Isi ya none iri kwihuta mu iterambere ry’ikoranabuhanga kandi uzayibamo ni ufite ubumenyi n’ubuhanga buhanitse.

Yagize ati “Dusigaye tuba mu isi itagira umupaka, n’ubwo ndi hano ariko nshobora kuba ndi aha umuntu wafotoye yamaze kohereza ubutumwa muri Canada. Rero umuntu uzaba agezweho ejo hazaza ni ufite ubumenyi, ubushobozi, ibikoresho n’ubuhanga buhanitse.”

Yakomeje avuga kuba barize bidahagije ahubwo bakwiye kwibaza niba koko ibyo bize babizi ndetse biteguye kubishyira mu bikorwa uko bikwiye.

Ati “Nta mwanya dufite wo kuba tukizarira mu byo dukora, ni ukuvuga ngo dukwiye kuba twibaza ngo uzi iki, ukizi gute? Ushobora kuba wararangije kaminuza, ariko se ibyo wize ubizi ute?”

Guverineri Gasana yagarutse kandi kuri Afurika abanyafurika bifuza n’icyerekezo 2063, avuga ko urubyiruko ruri mu mashuri arirwo rugomba guharanira kuzaba rufite ubumenyi n’ubushobozi bwo kugera ku bukungu bwifuzwa.

Gahunda y’imyaka itatu ya PAM Rwanda, ikubiyemo ibikorwa bigamije gushishikariza abaturage by’umwihariko urubyiruko gukurana umuco wo gukunda igihugu n’umugabane wabo, gukoresha ibikomoka iwabo, guharanira umutekano rusange mu bantu, kuzamura umuco wo gukorera hamwe no guharanira umutekano wa Afurika.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza