Ngororero: Umusore yafatanwe moto agiye kuyihagurisha ayivanye i Musanze

0 9-08-2018 - saa 07:25, IGIHE

Polisi ikorera mu karere ka Ngororero, ku itariki ya 07 Kanama 2018, mu masaha y’igicamunsi yafashe moto bikekwako yari injurano biturutse ku makuru yari imaze guhabwa n’abaturage.

Iyi moto ifite icyapa kiyiranga RD 348B yafatiwe mu kagari ka Mashya, umurenge wa Muhanda, akarere ka Ngororero, ifatanwa umusore w’imyaka 23 y’amavuko.

Umuvugizi wa Polisi y’u Rwanda mu Ntara y’Iburengerazuba CIP Innocent Gasasira yavuze ko uwo musore yari asanzwe ari umumotari mu karere ka Musanze; akaba yarafashwe aje kugurisha iyo moto muri aka karere ka Ngororero.

CIP Gasasira yagize ati “Yaje aturutse i Musanze, ageze mu kagari ka Mashya akajya kunywa icyayi mu gasanteri, hanyuma abasaba ko baba bamubikiye iyo moto ko agiye kureba umukanishi uyimukorera kuko yatobotse ipine. Abaturage bagize amakenga bumvise ko agiye kureba umukanishi kandi moto yari ayijeho babona nta kibazo ifite, ikindi babona ntibamuzi muri ako gace”.

Yakomeje agira ati “Abaturage bakomeje kumubaza aho akorera ndetse n’aho aturutse ababwira ko akorera mu karere ka Musanze kandi ko ashaka n’uwayimugurira. Abaturage bahise bahamagara Polisi ikorera mu karere ka Ngororero bayiha ayo makuru yose hanyuma abapolisi bajyayo gukurikirana ayo makuru”.
CIP Gasasira yavuze ko uwo musore amaze kumenya amakuru ko abaturage bahamagaye Polisi yahise ayikura hahandi yayibikije ajya kuyihisha mu murima w’icyayi hafi aho, ariko abaturage bakomeza kumucungira hafi.

Amaze gufatwa yahise yiyemerera icyaha abwira Polisi ko moto ari iya Se witwa Gahabanyi Philippe w’imyaka 48 utuye mu kagari ka Rusasa, Umurenge wa Nyankenke, mu karere ka Gicumbi wayimuhaye ngo akore yiteze imbere, ariko akaba yari yaraje kuyigurishiriza mu karere ka Ngororero ngo azabeshye se ko bayimwibye.

Ubu yashyikirijwe Urwego rw’Igihugu rw’Ubugenzacyaha rukorera Kabaya aho ari gukurikiranwa.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza