Ngoma: Ubuyobozi bwahumurije abaturage nyuma ya veterineri bikekwa ko yishwe n’indwara yibasiye amatungo

1 13-06-2018 - saa 13:48, David Eugène Marshall

Inzego zishinzwe ubuzima mu Karere ka Ngoma ziri gusuzuma ibimenyetso by’urupfu rw’umuganga w’amatungo, witwa John Kabeza wo mu Murenge wa Rurenge, witabye Imana avuye mu bikorwa byo kuvura no gukingira inka indwara y’ubuganga bwo mu kibaya cya Rift (Rift Valley Fever, RVF).

Minisiteri y’Ubuhinzi n’Ubworozi iheruka guhagarika ingendo z’amatungo mu turere twa Ngoma, Kirehe na Kayonza, hagamijwe kurwanya no gukumira ikwirakwira ry’indwara y’ubuganga ya RVF yagaragaye mu matungo yuza yororerwa muri utwo turere.

Hari amakuru yakomeje kuvugwa ko iyo ndwara iterwa na virusi ikwirakwizwa n’imibu igafata amatungo yuza n’abantu, ariyo yahitanye umwe mu baganga b’amatungo muri ako karere.

Gusa Umunyamabanga Nshingwabikorwa w’uyu murenge, Mapendo Gilbert, yabwiye IGIHE ko bigoye guhuza iby’urupfu rw’uyu muganga w’amatungo n’iyo ndwara ya RVF ifata inka yari avuye kuvura no gukingira mu Kagali ka Akagarama.

Yakomeje agira ati “Yari kumwe n’ikipe nini bafatanije iyobowe na veterineri w’Umurenge, kandi muri abo bose nta n’umwe wigeze agira ikibazo. Gusa ibitaro byakoze ibizamini mu rwego rwo gushakisha impamvu na n’ubu turacyategereje ibisubizo ngo hamenyekane koko icyateye uwo muganga gupfa″.

Uretse iyi ndwara yaba yamuhitanye, hari indi mpamvu ikekwa ariko igisuzumwa, ko yaba yarariye ku biryo bihumanye nyuma yo kuva mu kazi.

Inama zitangwa ku baturage zirimo gukingiza amatungo atarwaye agejeje amezi atatu, kwirinda imibu, gutema ibigunda, gutera imiti yica imibu, kwirinda ibizenga by’amazi hafi y’urugo, gukoresha inzitiramubu (ku bantu) no gukinga amadirishya n’inzugi saa kumi n’imwe z’umugoroba mu turere yagezemo.

Aborozi basabwa guhamagara umuveterineri ubegereye igihe babonye ibimenyetso by’iyi ndwara kandi nawe akambara uturindantoki igihe cyose agiye gukora ku itungo ryaramburuye, ku ryapfuye ndetse no ku maraso yasohowe n’itungo ryarwaye. Inka zirwaye n’izihaka ntabwo byemewe ko zikingirwa.

Veterineri Kabeza witabye Imana, ngo yari asanzwe ari umuganga w’amatungo wikorera, ariko yapfuye nyuma y’igikorwa barimo cyo gufasha abandi baganga mu bikorwa byo kuvura no gukingira amatungo.

Kuva iyo ndwara ya RVF yatangira kwigaragaza ku wa 18 Gicurasi, inka umunani zimaze gupfa mu gihe izaramburuye kubera ubu burwayi ari 12 naho izikiri kuvurwa ni esheshatu muri uyu Murenge wa Rurenge.

Ibimenyetso byayo birimo kuramburura mu byiciro byose byo guhaka, kunanirwa kurisha, umuriro mwinshi hejuru ya dogere 40, gucika intege, kuva amaraso mu mazuru, gutukura cyane ku nda y’amaganga, kugabanyuka k’umukamo n’ibindi.

Ubuyobozi buvuga ko iyi ndwara iyo ivuriwe igihe ikira nk’uko byagaragaye ku matungo amaze guvurwa ndetse n’izimaze gukingirwa ngo iyo zifashwe biroroha gukira. Abaturage kandi barasabwa kutarya inka zishwe n’icyo cyorezo.

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
MBONIZANYE 2018-06-14 10:37:05

NI BYIZA GUKURIKIZA INAMA ZA VETERINAIRE NO KUZISHYIRA MU BIKORWA. UWO WASINZIRIYE AVUYE MU KAZI UMURYANGO WE WIHANGANE.

Kwamamaza