Ndayisaba yasabye amadini gufasha abayoboke bayo kuvugisha ukuri ku byo bazi muri Jenoside

4 4-06-2018 - saa 19:51, Ferdinand Maniraguha

Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge, Ndayisaba Fidèle, yasabye amadini n’amatorero mu Rwanda gufasha abayoboke bayo kuvugisha ukuri, berekana ahajugunywe imibiri y’Abatutsi bishwe muri Jenoside.

Ndayisaba yabitangaje kuri iki Cyumweru ubwo yifatanyaga n’abakirisitu b’Itorero Methodiste Libre au Rwanda kwibuka ku nshuro ya 24 Jenoside yakorewe Abatutsi.

Uyu muhango wabereye kuri Paruwasi y’iryo torero i Gikondo ahiciwe Abatutsi benshi bari bahahungiye, ndetse benshi mu bahiciwe ntibaramenyekana.

Ndayisaba yavuze ko kimwe no hirya no hino mu gihugu, hari imibiri myinshi y’Abatutsi bishwe muri Jenoside itaraboneka ngo ishyingurwe mu cyubahiro nyamara hari bamwe mu bakirisitu bazi aho iri.

Yagize ati “Itorero rya Kirisitu rikwiriye kudufasha koko guteza imbere ukuri. Hari ukuri ku mibiri itaraboneka ngo ishyingurwe mu cyubahiro.Twemera ko amatorero abishyizemo imbaraga, akabishishikariza abayoboke, nitugira amahirwe bakarenga kuba abayoboke bakaba abakirisitu nyakuri bakabyigishwa bakumva n’akamaro kabyo, ababyigisha bakabikora babyemera bizarengera imitima ya benshi.”

Yavuze ko abafitanye isano n’abishwe atari bo bonyine bakeneye ayo makuru gusa ahubwo byanafasha n’abandi barimo abari inshuti z’abishwe.

Yasobanuye ko kwigisha abakirisitu kuvugisha ukuri bizanabohora bamwe bakavuga ibyo bazi ku buryo Abatutsi bishwemo muri Jenoside.

Umuyobozi w’Itorero Methodiste Libre au Rwanda, Musenyeri Kayinamura Samuel, yavuze ko inyigisho zigamije gufasha abakirisitu kuvugisha ukuri bagiye kuzishyira muri gahunda.

Ati “Baratubwira bati ‘nyamuneka nimuve muri iryo pfunwe, nimuve muri izo soni mukagira ngo ni inyungu zabo kandi ari inyungu zacu.’ Ibyo dupfundikiye imbere ni urupfu ntabwo ari ubuzima. Kubivamo ni ukujya mu kuri. Ntabwo twakagombye kubisabwa.”

Musenyeri Kayinamura yavuze ko bibabaje kuba Jenoside yarabaye mu Rwanda ariko kuba yarakozwe n’abanyamadini byo bikaba agahomamunwa.

Ati “Jenoside yakorewe Abatutsi ntabwo kubisobanura byoroshye. Ni agahomamunwa kandi byagera ku itorero bikarushaho kuko mu nshingano z’itorero kwamamaza ubutumwa bwiza ni ukwamamaza agakiza, ariko igihe cyarabaye biba kwamamaza urupfu.”

Depite Kankera Marie Josée yasabye Abanyarwanda basengera mu madini guhinduka buri wese yihereyeho, akabona guhindura abandi kugira ngo Jenoside itazasubira.

Ati “Iyo Abanyarwanda tuba twarahuriraga mu matorero no mu madini dufata icyemezo cy’agakiza buri muntu ku giti cye, ibyabaye ntibyajyaga kuba. Yesu yabwiye Simoni ati ‘ubanze uhinduke ubwawe ubone guhindura abandi’ […] Abanyarwanda turasabwa gufata icyemezo tugahinduka kugira ngo ahari urwango tuhasimbuze urukundo.”

Abatutsi bari bahungiye ku Rusengero rwa Methodiste i Gikondo barishwe bajugunywa mu cyobo cyari cyahacukuwe. Hari bamwe mu bakirisitu bafunzwe bagize uruhare mu kwica abo Batutsi ariko hari na bamwe mu bapasiteri bijanditse muri Jenoside bahunze batarashyikirizwa ubutabera.

Ndayisaba yasabye amadini gufasha abayoboke kuvugisha ukuri
Musenyeri Birindabagabo Alexis (hagati) yaje kwifatanya n'Itorero Methodiste Libre au Rwanda
Abanyamadini batandukanye bitabiriye umuhango wo kwibuka Jenoside yakorewe Abatutsi
Abato baje kwifatanya n'abandi kwibuka
Bamwe mu banyamahanga bitabiriye uyu muhango wo kwibuka
Depite Kankera Marie Josée yasabye Abanyarwanda basengera mu madini guhinduka buri wese yihereyeho
Musenyeri Kayinamura yavuze ko bagiye gutangira kwigisha abakirisitu kuvugisha ukuri ku byo babonye muri Jenoside
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
xavier 2018-06-07 04:45:34

Haribinti biba bisekeje kandi bibabaje, mutecyereze mwitonze niba koko ariko yavuze atari icyahimbwe n’umunyamakuru (Musenyeri Kayinamura yavuze ko bagiye gutangira kwigisha abakirisitu kuvugisha ukuri ku byo babonye muri Jenoside) uhita ubonako neza ko idini umugambi waryo udafitanye isano n’Imana. uti kubera iki? dore impamvu nuko ijambo ryambere Imana isaba umuntu n’ukwiyambura ibinyoma ukarangwa nukuri, ngiye intambwe yambere y’uwakwiswe Umwemera Mana nyakuri, none ati tugiye gutangira kwigisha ukuri, ukibaza uti mbese ubwo bigishije iki?, kandi ntiwagirana isano n’Imana utaraba umunyakuri, mbabazwa ninzirakarengane ziba mubyo zitanzi Umwami Yesu abatabare.

2
man 2018-06-05 23:39:53

Mbega méthodiste y’a kamembe itorero ryabaye iry’akazu !!!!!! Mbega amacakubiri !!,

3
thoma 2018-06-05 23:30:59

Methodiste ikwiye kwigishwa ndi umunyarwanda .

4
jd 2018-06-05 14:17:36

Munsenyeri kayinamura ari kuvuga iki kandi ashyigikira abaregwa amacakubiri ex méthodiste kamembe gucyemura ibibazo byaho byaramunaniye !!!!!!!!!

Kwamamaza