Imibare ya Polisi y’Igihugu igaragaza ko utumashini tugabanya umuvuduko mu modoka rusange tuzwi nka ‘Speed Governor’, twagabanyije impanuka mu modoka rusange zitwara abantu ku kigero cya 65% ariko hakiri ikibazo cy’abashoferi barangwa n’imyitwarire mibi iteza ibibazo.

Ibi byatangarijwe mu nama nyunguranabitekerezo yareberaga hamwe uburyo bwo gukumira impanuka zo mu muhanda, yahuje Polisi y’Igihugu n’izindi nzego bireba harimo Minisiteri y’Ibikorwa Remezo.

Kuva uyu mwaka watangira, impanuka eshatu zikomeye nizo zabaye zirimo iyo kuwa 27 Mutarama 2017 ya Coaster yaguye i Shyorongi ikagwamo abantu 15 naho abandi barindwi bagakomereka bikomeye.

Indi ni iya bisi ya RITCO yabereye i Nyagatare igakomerekeramo abantu 26 ku wa 22 Nyakanga naho ku wa 4 Ukwakira 2017 indi igwamo abantu batatu, abandi 29 barakomereka baguye mu mpanuka ya RITCO na none.

Umuyobozi w’ishami rya Polisi rishinzwe umutekano wo mu muhanda, CP George Rumanzi, yavuze ko ‘imodoka imwe itwara abantu mu buryo bwa rusange, iyo ikoze impanuka ikomeye biba bishoboka ko iri bugwemo abantu benshi kurusha moto. Kugira ngo abantu 15 bazagwe kuri moto, bitwara igihe kinini.’

Abitabiriye inama barebeye hamwe icyakorwa ngo impanuka zo mu muhanda zigabanuke

CP Rumanzi yavuze ko utwuma tugabanya umuvuduko twagize uruhare mu kugabanya impanuka. Yakomeje agira ati “Impanuka mu modoka zirimo turiya twuma ubona zaragabanutseho 65% bitugaragariza ko ikibazo ntabwo kikiri mu muvuduko kubera ko buriya bwuma bwawugabanyije, ikibazo kiri mu myitwarire y’abatwara ibinyabiziga ari naho hakwiriye gushakirwa umuti.”

CP George Rumanzi yavuze ko guhera muri Mutarama kugeza muri Nzeri 2017, impanuka zakozwe na moto ari 1595 zingana na 61%. Abaguye mu mpanuka zifite aho zihuriye na Moto ni 116 bangana na 66% z’abantu bose baguye mu mpanuka.

Yakomeje agira ati “Biratwereka rero ko ikibazo cya moto kigikomeye hagakurikiraho bisi nini zitwara abagenzi hamwe na minibus zaguyemo abantu 44 bangana na 25% by’abaguye muri izo mpanuka bose, abakomeretse akaba ari 27%. Amakamyo manini impanuka zayo zifite 10%, hanyuma za rukururana ziguyemo abantu 4 bangana na 1%.”

CP Rumanzi avuga ko kimwe mu bibazo bihari mu gutwara abantu harimo ikijyanye na koperative z’abamotari zasenyutse n’kibazo cy’abashoferi batwara basinze.

Ku bijyanye n’ubujura bwa moto, yavuze ko hatangiye gahunda yo kuzishyiraho uburyo bw’ikoranabuhanga bubashisha kubona aho ziri mu gihe icyo aricyo cyose ku buryo bitanga umutekano. Ati “Buri moto yose ikwiye kuba ifite aka kuma kagaragaza aho iri n’uko irimo igenda.”

Zimwe mu ngamba zafatiwe muri iyi nama harimo kuba abatwara abagenzi bajya bahugurwa, gufasha amashyirahamwe atwara abagenzi by’umwihariko ay’abamotari kongera gukora neza no gukoresha ikoranabuhanga, kureba amateka y’abatwara abagenzi kandi bagahabwa n’amahugurwa y’imyitwarire ndetse ngo bakazajya bakorerwa isuzuma, hamwe no gutanga amakuru ku gihe mu rwego rwo kunoza imikorere.

Umunyamabanga wa Leta muri Minisiteri y’Ibikorwaremezo ushinzwe gutwara abantu n’ibintu, Uwihanganye Jean de Dieu yavuze ko amategeko yo gutwara abantu n’ibintu arimo kuvugurwa kugira ngo hongerwe ibihano.

Yagize ati “Tugiye gutangira gushyira mu bikorwa ibiba bikubiye mu masezerano tugirana bidufasha kurinda ubuzima bw’abanyarwanda[…]ku bijyanye n’abamotari turashaka gukoresha ikoranabuhanga mu kureba uburyo ibintu byose bishyirwa ku murongo. Vuba aha rwose turabishyira mu bikorwa.”

Yakomeje asaba ibigo bitwara abagenzi mu modoka nini kujya bireba ko abashoferi babo baruhutse mbere yo gutwara abagenzi kandi bagakurikirana imikorere yabo umunsi ku munsi.

Kuva muri Mutarama kugeza muri Nzeri 2017 impanuka zo mu muhanda zimaze kugwamo abantu 18, zikomerekeramo 62
Imwe muri Coaster yari itwaye abagenzi igakora impanuka i Shyorongi
CP Rumanzi avuga ko impanuka zagabanutse kubera utwuma tugabanya umuvuduko mu modoka
Bamwe mu bitabiriye inama ku mutekano wo mu muhanda


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved