IGIHE

Mushikiwabo yavuze uburyo yashatse abakozi muri OIF, uruhande rwe mu matora ya RDC n’ibindi

6 10-07-2019 - saa 13:09, IGIHE

Amezi atandatu arashize umunyarwandakazi Louise Mushikiwabo atangiye kuyobora Umuryango mpuzamahanga w’Ibihugu bikoresha ururimi rw’Igifaransa, OIF.

Ni umuryango munini kuko ubarizwamo ibihugu 84 birimo ibinyamuryango byuzuye 54, ibihugu bine byiyunze nba wo n’ibihugu 26 by’indorerezi.

Imigabo n’imigambo y’imena ya Louise Mushikiwabo muri OIF harimo guteza imbere ubuvumbuzi mu by’ikoranabuhanga no guha ururimi rw’Igifaransa agaciro rukwiriye.

Ni imigambi mishya imusaba ingufu n’imikorere itandukanye n’iyari isanzwe iranga uwo muryango, dore ko uwo yasimbuye, umunya-Canada Michaëlle Jean yashinjwaga gupfusha ubusa umutungo w’uwo muryango mu nyungu ze bwite.

Mushikiwabo wamaze imyaka 11 ari Minisitiri nyuma yo gukora mu miryango mpuzamahanga nk’Ikigega Mpuzamahanga cy’Imari (FMI) no muri Banki Nyafurika Itsura Amajyambere (BAD) , aherutse kugirana ikiganiro na JeuneAfrique, asobanura ibintu bitandukanye amaze kugeraho n’ibindi bijyanye n’umuryango ayoboye.

Yishakiye abakozi bashya

Mushikiwabo akigera i Paris ahari icyicaro gikuru cya OIF, yahasanze abakozi batandukanye bamwe bumva impinduka yari azanye n’abandi badafite icyo bitayeho.

Ati “Mu miryango mpuzamahanga yose haba hari itsinda ry’abantu bashaka ko ibintu bijya imbere n’abandi baba bashaka ko bigenda uko bisanzwe, barwanya imigambi mishya. Hari ababa batibona mu muryango, baba bategereje ko ukwezi gushira bagahembwa. Abo bombi baba bagomba kugendana.”

Mu gusubiza ku murongo OIF, Mushikiwabo yahisemo bamwe mu bakozi bashya ku myanya imwe n’imwe, bumva imigabo n’imigambi ye ngo atazava aho agaragara nk’uwasezeranye ibyo adashoboye.

Mu guhitamo abakozi bashya, avuga ko nta muntu n’umwe wigeze amutegeka, byose byakozwe na we.

Ati “Kuri buri mwanya nasabye ko banzanira abantu batandukanye nkihitiramo. Nta n’umwe mu baterankunga bakomeye wa OIF wantegetse ibyo nkora.”

Ibyo byatumye ku mwanya w’ushinzwe ubutegetsi muri OIF atoranya umunya-Canada Catherine Cano, Umuyobozi Mukuru mu biro bya OIF aba umufaransa Nicolas Gröper.

Mushikiwabo yanatoranyije abajyana bane barimo babiri bahoze ari abajyanama be i Kigali ubwo yari Minisitiri w’Ububanyi n’Amahanga.

OIF si igikoresho cy’abakoloni

Mu mpera z’umwaka wa 2020, OIF izaba yizihiza imyaka 50 imaze ishinzwe. Ni ibirori bizizihirizwa i Tunis muri Tunisia, hahabwa icyubahiro ab’imena bayishinze barimo Habib Bourguiba wayoboraga icyo gihugu, Léopold Sédar Senghor wayoboye Sénégal, Umunya-Niger Hamani Diori na Norodom Sihanouk wo muri Cambodge.

Mushikiwabo yavuze ko mu kwizihiza iyo myaka, ari umwanya wo kwishimira ibyo OIF imaze kugeraho.

Yavuze ko uyu muryango ntaho uhuriye n’ubukoloni nk’uko bamwe babitekereza cyangwa ngo ube ukorera mu kwaha kw’u Bufaransa.

Ati “OIF ntabwo yashinzwe n’abakoloni nta n’ubwo ari umurizo wa Françafrique (umubano w’u Bufaransa n’ibihugu bwahoze bukolonije) ibyo ntabwo bikiriho. Ni umuryango uhuza ibihugu bitandukanye bitayobowe n’u Bufaransa nk’uko Perezida Macron yabivuze, nubwo igihugu gicumbikiye uwo muryango ari ingenzi.”

Nta kibazo mfitanye n’u Rwanda

Mbere no mu gihe cy’inama ya OIF yabereye i Erevan muri Armenia umwaka ushize ari naho amatora y’uwo muryango yabereye, Mushikiwabo yakunze kutavuga rumwe n’umunya-Canada Michaëlle Jean bari bahanganye.

Kimwe mu byo bapfaga ni ibijyanye n’uburenganzira bwa muntu mu Rwanda, uwo munya-Canada yavugaga ko butubahirizwa ku buryo Mushikiwabo adakwiriye kuyobora OIF.

Jeunafrique yamubajije kuri uko guterana amagambo kwagiye kubaho, Mushikiwabo agira ati “Ibyo byararangiye kandi ntabwo ibyavuzwe byigeze bingiraho ingaruka cyane. Nta kibazo mfite ku gihugu cyanjye nta n’ikibazo mfite kuri Perezida Kagame. Nakoranye na we, yaranyigishije, ni we nirahira sinzamujya kure rero.”

Nubwo umubano w’u Bufaransa n’u Rwanda nyuma ya Jenoside wajemo agatotsi, Mushikiwabo avuga ko u Rwanda ari kimwe mu bihugu byashinze uwo muryango kandi bikomeje guteza imbere intego zawo.

Ati “Igihugu cyarakuze. N’ikimenyemenyi ubwo natorwaga babyakiranye ishema, n’Igifaransa kiragenda gisubirana agaciro kacyo.”

Uruhande rwa OIF mu matora ya Congo

Ubwo hatangazwaga ibyavuye mu matora ya Perezida muri Repubulika Iharanira Demokarasi ya Congo muri Mutarama uyu mwaka, Mushikiwabo yabikurikiraniraga hafi.

Yavuze ko icyo kibazo yakiganiragaho n’Umuyobozi wa Komisiyo y’Umuryango wa Afurika Yunze Ubumwe, Moussa Faki Mahamat. Ni umwe mu bashyigikiye itangazo ry’abakuru b’ibihugu bya Afurika ryanenze uburyo amatora yagenze muri Congo.

Nyuma yo kwemeza burundu ko Felix Tshisekedi ari we watsinze, Mushikiwabo ngo yaramuhamagaye aramushimira nyuma ajya n’i Kinshasa guhura na we.

Ati “Byagenze neza. Twahuye mu minsi yashize kandi nta kibazo cyabayemo. Azi icyo ashaka kandi icyo yifuza ni uko ibintu bihinduka.”

Kuba ari umwe mu banenze itorwa rya Tshisekedi ubu bakaba bari gukorana, Mushikiwabo asanga nta kibazo kirimo kuko nk’Umuyobozi wa OIF agomba kujya inama.

Yagize ati “Turi muri demokarasi ntabwo ari uguhana. Inshingano zanjye ni ukujya inama rimwe na rimwe hakazamo kutumvikana ariko ntabwo bisonanuye ko duhita dusohora itangazo. Politiki ya OIF ntabwo ikorerwa mu itangazamakuru.”

Uyu muryango wa OIF washingiwe i Niamey muri Niger tariki 20 Werurwe 1970, utangizwa n’ibihugu 21 byiganjemo ibyahoze bikolonijwe n’u Bufaransa.

Louise Mushikiwabo yavuze ko OIF atari igikoresho cy'abakoloni nkuko bamwe babitekereza
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kigeme 2019-07-11 10:19:20

Urebye position yafashe ku matora ya Kongo hamwe na Perezida Kagame wari uyoboye AU, ukongeraho amagomba yavuze kuri France 24 muri interview yakoreye muri KCC, akongera ati utwo tuzungu, usanga politiki koko ari umwuga.

2
Mukristo 2019-07-10 17:12:25

Nyakubahwa muyobozi wa OIF, mutuvuganire bilinguisme (ikoreshwa ry’Igifaransa n’Icyongereza) ryongere ryemerwe mu Rwanda, nka cya gihe bamwe mu banyeshuri bigaga mu mashuri makuru na kaminuza, bakubitwaga, abandi bakirukanwa, bazira kwigaragambya banga kwiga igifaransa/kwiga mu gifaransa; vuba rwose, muri uyu mwaka turimo, ubwo umunyeshuri wasabaga gukora PhD muri kaminuza y’u Rwanda yarimo adéfenda proposal, banze ko akoresha Igifaransa kandi aricyo kimworohera ugereranije n’Icyongereza. Byamubereye bibi cyane. 😔 MUDUFASHE RWOSE.

3
mazuru 2019-07-10 08:53:12

Rugumire wigize ndabizi witwaje idini.

4
mazuru 2019-07-10 08:53:12

Rugumire wigize ndabizi witwaje idini.

5
mazuru 2019-07-10 08:53:12

Rugumire wigize ndabizi witwaje idini.

6
Rwangamazimwe Rugumire 2019-07-10 06:59:41

Erega modern colonialism ntikeneye ko haboneka gashakabuhake winjira mu gihugu agategeka ibigomba gukorwa byose bitegurirwa ahantu hihishe ubundi ikoranabuhanga rigatumika nyirugishyira mu bikorwa ibyo asabwa akabihabwa mu ibanga kandi akaba agomba gufunga umunwa kuko abo muri Illuminati babikurikiranira mu bwihisho bwihishe mu ikoranabuhanga. Muzakurikirane impamvu hari abakomeye (abaririmbyi, abakinnyi ba sinema, abaherwe ku isi, abakinnyi ba ruhago, n’abandi bagiye bazamuka m’uburyo butunguranye ku isi) bagiye bapfa impfu zitunguranye ibyabo bikibagirana hagakorwa za anketi ariko ntizigire ikizivamo. Isi iyobowe n’imbaraga z’umwijima zitaboneshwa amaso y’umubiri keretse ufite amaso amurikiwe n’umwuka w’Imana nibo bamenya amabanga yihishe muri iyi si y’umwijima. Umwuka w’Imana nabamanukira nibwo muzamenya ukuri kandi nibwo muzabatuka by’ukuri. Udafite uwo mwuka atura mu isi y’umwijima kandi ntabimenye ko aturanye n’umwijima akamera nk’inkingi ya Mbonabihita gusa. Mushake uwo mwuka wera nibwo muzasobanukirwa n’isi ya none muzatangazwa n’igihe cyahise mwibwira ko mubona ukuri kandi mwari mupfukiranwe n’umwijima ukomeye. Abakunda kwegera Imana abo nibo bamenya amabanga ahishwe muri iyi si.

Kwamamaza