IGIHE

Musanze: Abasirikare bakuru biyemeje guharanira ko Afurika igira amahoro arambye

0 10-09-2019 - saa 13:04, N.Kubwimana Janvière

Abasirikare bakuru 34 baturutse mu bihugu icyenda by’Afurika, bari mu mahugurwa mu Kigo cy’Igihugu cy’Amahoro giherereye i Nyakinama mu Karere ka Musanze, biyemeje guharanira ko Afurika igira amahoro arambye mu gihe cyose bazaba bari mu butumwa bw’amahoro.

Aya mahugurwa yatangijwe kuri uyu wa 09 Nzeri 2019, aho afite intego yo kongerera ubumenyi aba basirikare bakuru mu butumwa bw’amahoro bajyamo mu muryango w’abibumbye hirya no hino ku isi by’umwihariko muri Afurika yo hagati

Mu kiganiro Capt Dina Mutesi wo mu ngabo z’u Rwanda yagiranye na IGIHE, yavuze ko kimwe na bagenzi be amasomo bazigiramo azabafasha gusohoza neza akazi kabo, bagakomeza kuba urugero rwiza mu butumwa bw’amahoro.

Yagize ati “Aya mahugurwa tugiyemo kimwe na bagenzi banjye, amasomo tuzigiramo azadufasha gukora neza akazi dushinzwe, tugakomeza gutanga urugero rwiza mu butumwa bw’amahoro nk’ingabo z’u Rwanda. Bizanadufasha gukorana neza hagati yacu kuko mu kazi tuba turi kumwe n’abaturutse mu bihugu bitandukanye, intego ni imwe ni uguharanira ko Afurika yacu irangwa no kugira amahoro arambye n’isi muri rusange”.

Umuyobozi uhagarariye ikigo cyo muri Leta zunze ubumwe za Amerika gitera inkunga ibikorwa byo kubungabunga amahoro hirya no hino ku isi Mathew Dieter, avuga ko ibisanzwe bibera muri Afurika yo hagati bifite umwihariko ariyo mpamvu amasomo azigirwa muri aya mahugurwa aribyo azibandaho.

Yagize ati “Muri Afurika yo hagati hakunze kuberamo ibibazo by’intambara bitandukanye, ugasanga abasivile babirenganiramo cyane kuko bahohoterwa, abasirikare nabo usanga bafite akazi kenshi ko guhosha izo mvururu”.

Umuyobozi w’Ikigo cy’Igihugu cy’Amahoro Col Jill Rutaremara, avuga ko aya mahugurwa azunganira aba basirikare akabafasha kuzuza neza inshingano zabo mu mirimo itandukanye bashinzwe.

Yagize ati “Mu butumwa bw’amahoro cyangwa mu gisirikare gisanzwe haba hari abayobora abandi (commander) ariko akagira abamwungirije, baba bashinzwe imirimo itandukanye, gucunga ibikoresho, ubutasi, abashinzwe abakozi n’ibindi, aya mahugurwa agamije kuzamura ubumenyi bwabo mu kunganira ubutumwa kugira ngo bugere ku ntego yabwo”.

Aya mahugurwa azamara ibyumweru bibiri yitabiriwe n’abasirikare bakuru baturutse mu bihugu icyenda bya Afurika birimo; Benin, Kenya, Mauritania, Niger, Rwanda, Senegal, Tanzania, Togo na Zambia.

Abasirikare bakuru baturutse mu bihugu icyenda bya Afurika bitabiriye aya mahugurwa
Umuyobozi wa RPA Col Jill Rutaremara avuga ko aya mahugurwa azafasha abasirikare kurangiza neza ubutumwa bwabo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza