IGIHE

Mu Rwanda hari gukorwa inkoranyamagambo y’ururimi rw’amarenga

1 11-07-2019 - saa 17:28, Thamimu Hakizimana

Ihuriro ry’Imiryango y’abafite ubumuga mu Rwanda (NUDOR), ritangaza ko hari gukorwa inkoranyamagambo y’ururimi rw’amarenga mu rwego rwo gufasha abafite ubumuga bwo kutumva no kutavuga.

Ibi byatangajwe kuwa Kabiri w’iki cyumweru, mu nama igamije kurebera hamwe aho Guverinoma y’u Rwanda, igeze ishyira mu bikorwa uburenganzera bw’abafite ubumuga.

Iyi nkoranyamagambo y’ururimi rw’amarenga yatangiye gukorwa nyuma y’aho abafite ubumuga bwo kutumva no kutavuga bakomeje kugaragaza ko bifuza ko ururimi rw’amarenga rujya mu ndimi zemewe gukoreshwa mu Rwanda.

Umuyobozi wa NUDOR, Bizimana Dominique, yabwiye IGIHE ko bateganya ko iyi nkoranyamagambo y’ururimi rw’amarenga izarangira muri uyu mwaka.

Yagize ati “Nibyo koko abafite ubumuga bwo kutavuga no kumva bakeneye ko ururimi rw’amarenga rwakwemera kuko kuvugana n’abandi nirwo bakoresha, ubu rero turacyarwana n’imyumvire ariko habayeho intambwe ya mbere yo kugaragaza ko ari ururimi rushobora gukoreshwa.”

Yongeyeho ko bamaze guhuza abanyarwanda bafite ubumuga bwo kutumva bitewe n’aho umuntu yakuriye cyangwa yigiye kugira ngo bagire amarenga yihariye y’u Rwanda, ku buryo ariyo mpamvu bari gukora inkoranyamagambo izatuma babona ururimi rw’amarenga nyarwanda.

Ushinzwe ubushakashatsi no kwinjiza abafite ubumuga muri gahunda z’Iterambere mu nama y’abafite ubumuga, Murera Emmanuel, nawe yemeza ko bari gushyira imbaraga nyinshi mu kurangiza inkoranyamagambo y’ururimi rw’amarenga ya Kinyarwanda.

Yagize ati “Ubu icyo turimo dukora ni ukurangiza inkoranyamagambo y’ururimi rw’amarenga kandi twizera ko ku rwego rugezeho mu gihe kitari icya kera tuzaba tumaze kuyibona maze urwo rurimi rwigishwe mu nzego zose.”

Yongeyeho ko bazakomeza gukora ubuvugizi kugira ngo abafite ubumuga bwo kutumva no kutavuga barumenye ndetse banarwigishe abanyarwanda bose bityo banakomeze gushyiramo imbaraga kugira ngo n’ururimi rw’amarenga rwemerwe.

Nubwo harimo gukorwa iyi nkoranyamagambo, bamwe mu bafite ubumuga cyane cyane ubwo kutumva no kutavuga, bemeza ko kuba ururimi rw’amarenga rutaremerwa mu mategeko y’u Rwanda ari icyuho gikomeye.

Umunyamabanga Nshingwabikorwa w’abafite ubumuga bw’uruhu mu Rwanda,Hakizimana Nicodemus, nawe yemeza ko kuba uru rurimi rw’amarenga rutari rwemerwa ari ikibazo gikomeye ku bafite ubumuga bwo kutavuga no kumva.

Yagize ati “Ruriya rurimi ruramutse rwemewe byafasha cyane abafite ubumuga bwo kutumva no kutavuga gutanga imbaraga zabo mu kubaka igihugu kuko kugeza ubu birabagora cyane kugira ngo bashyikirane n’abandi haba muri gahunda z’iterambere kuko batazimenya yewe no kugira ngo bahabwe serivise biba bigoye cyangwa gutanga ibirego igihe bahohotewe.”

Yasoje agaragaza ko uru rurimi rw’amarenga nirwemerwa bizatuma n’abafite ubumuga bwo kutumva no kutavuga nabo bagira uruhare mu kwitabira ibikorwa bya Leta.

Ubwo abafite ubumuga bwo kutumva no kutavuga bagaragazaga ko bifuza ko ururimi rw'amarenga rwemerwa
Umwe mu bafite ubumuga bwo kutumva no kuvuga ari gusobanurirwa ibiri kuvugirwa mu nama hakoreshejwe amarenga yo kumufata intoki
Umunyamabanga Nshingwabikorwa w’abafite ubumga bw’uruhu mu Rwanda,Hakizimana Nicodemus
Umuyobozi wa NUDOR, Bizimana Dominique avuga ko iyi nkoranyamagambo izaba yarangiye mu minsi mike
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
mm 2019-07-12 00:37:48

Ni byiza ariko n’ikinyarwanda gisanzwe gikwiye kwigishwa. Uburyo bamwe basigaye bavuga n’uko bandika ikinyarwanda biteye agahinda. Hari igihe umuntu akwandikira ubutumwa mu Kinyarwanda ntiwumve icyo ashatse kuvuga cyangwa ukabwumva bibanje kugutwara umwanya munini.

Kwamamaza