‘Moshions’ mu rugendo rwo kumenyekanisha u Rwanda binyuze mu mideli

1 4-12-2018 - saa 21:27, Akayezu Jean de Dieu

Mu myaka mike ishize hari abumvaga gahunda ya ‘Made in Rwanda’ nk’inzozi, gusa uko iminsi yigira imbere nta watinya kuvuga ko ibyafatwaga nk’ibidashoboka biri kugenda bisobanuka.

Urugero rwiza ni umunyamideli Turahirwa Moïse umaze imyaka isaga itatu mu rugendo rwo kumenyekanisha u Rwanda mu ruhando rw’amahanga, abinyujije mu mideli.

Ni umurimo yatangiye nko kwishimisha, aho yashushanyaga ndetse akadoda imyenda ye bwite mu 2012, ababonye ibyo akora bakamubwira ko ari byiza.

Mu 2013 yashinze inzu ye bwite y’imideli yise ‘Moshions’, gusa mu 2015 nibwo yayandikishije mu kigo cy’Igihugu cy’Iterambere, RDB, nk’uruganda rukora rukanatunganya imideli.

Turahirwa w’imyaka 26 yabwiye IGIHE ko yatangiye kwikorera nyuma y’igihe yerekana imyenda y’abandi bakoreshaga ibitenge bakavuga ko ari imyambaro ya kinyafurika, we yiha intego yo kugaragaza umwihariko w’u Rwanda.

Ati “Nagerageje gukoresha nk’umwitero mu buryo bugezweho, nkoresha imigongo itakwa mu nzu n’ayo masaro ubona bataka ku myenda, ku buryo tugira wa mwimerere w’u Rwanda ariko noneho mu myambarire.”

“Ubu nibyo natangiye kugeraho no mu birori by’imideli njyamo hanze y’u Rwanda, babona ‘Moshions’ bakabonamo wa mwihariko w’u Rwanda.”

Yatangiranye n’umudozi umwe ariko ubu afite abakozi bahoraho 13, barimo umunani bashinzwe kudoda n’abandi bashinzwe gushaka amasoko no kumenyekanisha ibikorwa binyuze ku mbuga nkoranyambaga.

Turahirwa ni umwe muri ba rwiyemezamirimo 25 bafite imishinga itanga icyizere, bazatoranywamo iyahize indi izahabwa inguzanyo ku nyungu ya zeru ku ijana, hagamijwe kuyiteza imbere.

Ni gahunda ya Banki ya Kigali yiswe ‘Urumuri Initiative’, iri kuba ku nshuro yayo ya kabiri.

Ni gahunda ahuriyemo na Muhimpundu Jacqueline, umubyeyi w’abana bane ukomoka mu Burundi, uvuga ko muri 2002 aribwo yize gukora isabune y’amazi ubwo yari mu buhungiro mu gihugu cya Kenya.

Mbere y’uko umunsi wa nyuma w’irushanwa ugera, aba ba rwiyemezamirimo bamaze iminsi bahabwa amahugurwa n’ikigo Inkomoko Entrepreneur Development, ku buryo barushaho kunoza ubucuruzi bwabo.

Turahirwa yagize ati “Nk’ubu njye nzi gushushanya imideli no kudoda ariko iyo tugeze mu bucuruzi, barakwigisha ngo ni gute ushakira amasoko ibikorwa byawe, gukora ibaruramari…”

“Batwigisha kumenya ngo ese ubundi mu myaka itatu ikigo cyawe kizaba kigeze ku ruhe rwego, byaradufashije kugira ngo n’ubwo tuzi guhanga udushya ariko tukamenya no kuba twabibyaza umusaruro ukwiye.”

Yavuze ko agize amahirwe yo guhabwa inkunga na BK, amafaranga yayakoresha mu kugura imashini zamufasha kwagura ibikorwa bye ndetse akanatanga akazi ku bantu benshi.

Ati “Yadufasha kwagura ibikorwa, tugakora imyenda ifite ireme tugakuraho n’icyo abantu bavuga ko imyenda ya ‘Made in Rwanda’ idafite umwimerere.”

Muhimpundu yigishijwe n’ubuhunzi

Uyu mugore afite ikigo Ditex Ltd gikorera mu Rwanda ubwoko bugera ku 10 bw’isabune y’amazi, yifashishije imiti itandukanye avanga n’amazi. Avuga ko intego afite ari uguhaza isoko ry’u Rwanda na Afurika y’u Burasirazuba.

Mu kiganiro yagiranye na IGIHE yagize ati “Twavuye muri Kenya ngeze i Burundi mbura ibikoresho byo gushyira mu bikorwa ubumenyi nari mfite bwo gukora isabune y’amazi, mu 2015 imirwano yongeye kwaduka mu gihugu cyacu duhungira mu Rwanda n’umuryango wanjye.”

“Nageze mu Rwanda n’abana banjye bane, tubana na masenge ariko nyuma nawe aza kubura umugabo we ubuzima buba bubi. Naje kwibuka ko nize gukora isabune y’amazi mpita mpamagara umugabo wabinyigishije muri Kenya anyoherereza ibyangombwa mpita ntangira ubwo.”

Yatangiye akorera kwa Nyirasenge ubwoko bumwe bw’isabune, agakora litiro eshanu ku munsi nazo akazishakira abakiliya bigoranye.

Nyuma umwana we yaje kumugira inama ko batangira no gukora isabune ikoreshwa mu bwiherero, gukaraba intoki n’ibindi.

Batangiriye kuri litiro 20 ku munsi ariko kuri ubu ashobora gukora izigera ku 1000 akoresheje amaboko, akavuga ko abonye ubushobozi bwo kubona imashini yakora isabune nyinshi kandi vuba.

Muhimpundu avuga ko aramutse abonye nka miliyoni 20Frw yamufasha kwagura ibikorwa bye.

Ati “Nagura imashini kuko ubu dukoresha amaboko, niba ku kwezi kumwe dukora litiro zirenga ibihumbi 10, urumva tubonye imashini twazirenza kandi n’abakozi bakwiyongera.”

Moses Turahirwa afite inteko yo kugeza kure umwuga wo gukora imideli
Aha niho inzu y'imideli ya Moshions ikorera
Uyu mugabo akorera ikigo Ditex Ltd cyashinzwe na Muhimpundu Jacqueline
Aha niho Ditex Ltd ikorera
Ditex Ltd igeze ku bikorwa byinsho by'amasabune y'amoko anyuranye
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Van 2018-12-04 22:59:12

Moshions ikorera hehe?? Nimuturangire

Kwamamaza