IGIHE

Minisitiri w’Intebe yasuye ibikorwa bikomeye mu Karere ka Gakenke (Amafoto)

0 10-08-2019 - saa 13:56, IGIHE

Minisitiri w’Intebe, Dr Edouard Ngirente, yasuye ibikorwa by’iterambere mu Karere ka Gakenke birimo Koperative Dukunda Kawa imaze guhindura imibereho y’abatuye muri aka karere, Ibitaro bya Ruli, umuhanda Nzove-Ruli-Gakenke urimo kubakwa n’ibindi.

Mu ruzinduko yakoze kuri uyu wa Gatandatu, tariki 10 Kanama 2019, Minisitiri w’Intebe Dr Ngirente yaherekejwe n’abayobozi barimo Minisitiri w’Imari n’Igenamigambi, Dr Ndagijimana Uzziel, Minisitiri w’Ubuzima Dr Diane Gashumba, Minisitiri Ushinzwe Imirimo y’Inama y’abaminisitiri, Kayisire Marie Solange, Guverineri w’Intara y’Amajyaruguru, Gatabazi Jean Marie Vianney n’abandi.

Ubwo yasuraga ahari kubakwa umuhanda Nzove-Ruli-Gakenke, Minisitiri w’Intebe yasabye Ikigo cy’igihugu gifite gutunganya imihanda mu nshingano (RTDA), gukurikirana ubuziranenge bw’uyu muhanda uri kubakwa no gufatanya n’abatsindiye isoko ryo kuwubaka kwihutisha iyi mirimo.

Minisitiri w’Intebe, Dr Ngirente yasuye kandi Koperative Dukunde Kawa y’abahinzi ba kawa ihurije hamwe abahinga iki gihingwa mu Mirenge itandukanye y’akarere ka Gakenke.

Koperative Dukunde Kawa yatangiye mu 2000, ifite abanyamuryango 30 ariko kuri ubu imaze kugira 1129 barimo abagore 299.

Umuyobozi w’iyi koperative, Ntahomvukiye Jeremie, yagaragaje ko iyi koperative ifite amasoko hirya no hino mu bihugu bigera kuri 18 ku Isi.

Minisitiri w’Intebe, Dr Ngirente yabwiye abanyamuryango b’iyi koperative n’abahinzi ba kawa muri rusange ko Leta itazahwema gushyigikira igihingwa cya kawa kandi ko izakora uko ishoboye ngo igiciro umuturage ahabwa ku kilo kidahungabana nubwo ku isoko mpuzamahanga byaba bitifashe neza.

Yasuye kandi Ibitaro bya Ruli bizwiho kuba indashyikirwa mu gutanga ubuvuzi aho ubuyobozi bw’ibi bitaro bwabwiye Minisitiri w’Intebe Dr Ngirente n’abashyitsi bari kumwe ko mu myaka ibiri ishize nta mugore wigeze apfa abyaririra muri ibi bitaro.

Umuyobozi w’Ibitaro bya Ruli, Dr Kaneza Deogratias yavuze ko bifite ibigo nderabuzima icyenda aho bikorana n’abajyanama b’ubuzima 764.

Bitanga serivisi z’ubuvuzi bw’amenyo, amaso n’izindi ndwara zitandukanye cyane ko bafite inzobere zishinzwe zimwe mu ndwara. Akandi karusho ni uko muri ibi bitaro buri mu gitondo umurwayi ahabwa igikombe cy’igikoma n’umugati

Mu bibazo byagaragarijwe Minisitiri w’Intebe harimo umubare muke w’abaganga, amazi akiri ikibazo muri aka gace, ndetse n’umubare w’imbangukiragutabara ukiri muke dore ko ibitaro bifite umubare munini w’ibigo nderabuzima aho kuvanayo abarwayi b’indembe bazanwa ku bitaro bikiri ingorabahizi.

Mu bindi bikorwa yasuye harimo Ishuri ry’abaforomo rya Ruli, Ibitaro bya Gatonde Perezida Paul Kagame yemereye abatuye aka Karere, byitezweho kuzatanga umusanzu mu rwego rw’ubuvuzi muri aka karere, Umudugudu w’Icyitegererezo wa Nyundo na Koperatibe COTAMU itubura imbuto y’ibishyimbo n’ibigori n’imbuto.

Muri uru ruzinduko rwe Minisitiri w’Intebe Dr Ngirente yagejejweho ibibazo n’abaturage bimwe abiha umurongo ndetse ibindi asaba inzego zibishinzwe kubikurikirana no kubishakira umuti mu gihe cya vuba.

Minisitiri w'Intebe Dr Ngirente yasuye ibikorwa bitandukanye mu Karere ka Gakenke kuri uyu wa Gatandatu
Aherekejwe n'abandi bayobozi yasuye umuhanda Nzove-Ruli-Gakenke n'ibindi bikorwa
Yasuye ibitaro bya Ruli bizwiho gutanga serivisi z'indashyikirwa
Minisitiri w'Intebe yanasuye ishuri ryigisha ubuforomo n'ububyaza rya Ruli
Minisitiri w'Intebe yasabye RTDA gukurikirana iyubakwa ry'umuhanda Nzove-Ruli-Gakenke
Yanasuye kandi koperative y'abahinzi ba kawa abizeza ko leta izaharanira ko umuhinzi abaho neza
Minisitiri w'Intebe Dr Ngirente yanakiriye ibibazo by'abaturage abiha umurongo
Guverineri w'Intara y'Amajyaruguru Gatabazi JMV mu bayobozi bari kumwe na Minisitiri w'Intebe
Minisitiri w'Intebe Dr Ngirente yatuwe ikibazo cy'imbangukiragutabara zikiri nkeya ku bitaro bya Ruli

Amafoto: Muhizi Serge

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza