IGIHE

Minisitiri Gashumba yagaragaje icyuho mu ngengo y’imari yagenewe gusana ibitaro

1 14-05-2019 - saa 15:53, Evariste Nsengimana

Minisitiri w’Ubuzima, Dr. Diane Gashumba, yasabye Inteko Ishinga Amategeko umutwe w’Abadepite gukorera ubuvugizi urwego rw’ubuzima rukongererwa ingengo y’imari yagenewe gusana ibikorwa remezo birimo ibitaro n’ibigo nderabuzima bishaje.

Yabivuze kuri uyu wa Mbere ubwo yagaragarizaga Komisiyo y’Ingengo y’Imari n’Umutungo by’Igihugu mu Nteko Ishinga Amategeko ibikubiye mu mbanzirizamushinga y’Ingengo y’Imari y’umwaka wa 2019/2020 mu nzego akuriye.

Dr. Gashumba yavuze ko kubaka ibikorwa remezo by’urwego rw’ubuzima ari kimwe ariko kubisana ari ikintu gihora gikenerwa buri gihe kugira ngo birusheho kuramba.

Ati “Iyo urebye ingengo y’imari iba yateganyijwe, aracyari make. Ntabwo twakubaka ngo tureke guteganya gusana, nibwo usanga twubaka amavuriro agasenyuka.”

Minisitiri Gashumba yavuze ko mu ngengo y’Imari yagenewe urwego rw’ubuzima, ijyanye no gusana ibikorwa remezo harimo icyuho cya miliyoni 700 Frw.

Ati “Twabonye miliyoni 598 Frw, dufite icyuho cya miliyoni 700 Frw kandi nacyo ni ikintu cyihutitwa.”

Dr. Gashumba yavuze ko ingengo y’imari yagenewe Minisiteri y’Ubuzima mu bikorwa byo gusana ibitaro n’ibindi bikorwa remezo by’urwego rw’ubuzima usanga ntacyo byayifasha.

Ati “Iyo turebye ingengo y’imari buri bitaro bigenerwa, ni hagati ya miliyoni 17 Frw na 31 Frw buri mwaka kandi ibiganiro twagiranye n’impuguke mu kubaka zatugaragararije ko ibitaro iyo bicyubakwa nta kibazo.”

Izo mpuguke ngo zivuga ko iyo ibitaro bicyubakwa, gusana ahangiritse biba bikiri mu nshingano z’ababyubatse ariko guhera ku mwaka wa kabiri kugera ku wa gatanu haba hakwiye guteganywa nibura 1-2% by’amafaranga yabyubatse.

Ati “Ni ukuvuga ngo dukurikije impuzandengo y’amafaranga yubatse ibitaro, haba hakwiye guteganywa nibura miliyoni 45 Frw kugera kuri miliyoni 90 Frw aho kuduha miliyoni 17 Frw.”

Yavuze ko izo mpuguke zigaragaza noneho ko iyo bimaze imyaka irenga 6-10, ari nayo byinshi biri mu Rwanda birengeje hakwiye guteganywa nibura 2.5% by’amafaranga yabyubatse, byarenga imyaka 10, hagateganywa nibura 5%.

Ati “Ingengo y’imari rero iracyari hasi kandi kubaka ntuteganye ingengo y’imari yo gusana ntacyo uba ukora, aha naho turagira ngo mudukorere ubuvugizi.”

Inteko Ishinga Amategeko yijeje Minisante ko inzego zose zizakomeza gufashanya mu kunoza imbanzirizamushinga y’ingengo y’imari, kugira ngo umushinga wayo uzasohoke unoze kandi usubiza ibibazo by’abanyarwanda.

Minisitiri Gashumba yagaragaje icyuho mu ngengo y’imari yagenewe gusana ibitaro

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
mugume 2019-05-14 13:53:48

nubona budget uzibuke umusanzu wa rayon sport

Kwamamaza