Minisitiri Biruta yatangije imirimo yo kubakira ibiro umudugudu wakumiriye ibyaha muri Kicukiro

2 15-05-2018 - saa 19:01, Evariste Nsengimana

Minisitiri w’Ibidukikije, Dr Vincent Biruta, n’abandi bayobozi barimo aba Polisi, batangije imirimo yo kubaka Ibiro by’Umudugudu wa Cyankongi uherereye mu Murenge wa Masaka, Akarere ka Kicukiro wesheje umuhigo mu gukumira ibyaha, imiryango 100 yawo yabaga mu kizima ihabwa amashanyarazi akomoka ku mirasire y’izuba.

Kuri uyu wa 15 Gicurasi 2018, Polisi y’u Rwanda yatangije icyumweru cyahariwe ibikorwa byayo gifite insanganyamatsiko igira iti “Duture mu mudugudu utarangwamo icyaha.”

Ku rwego rw’Umujyi wa Kigali, iki gikorwa cyatangirijwe mu Karere ka Kicukiro aho cyitabiriwe n’abayobozi barimo Minisitiri w’Ibidukikije, Dr Vincent Biruta; Umuyobozi w’agateganyo w’Umujyi wa Kigali, Busabizwa Parfait, abayobozi ba Polisi n’abandi.

Nyuma yo gutangiza imirimo yo kubaka ibyo biro no gucanira imiryango 100 ituye muri uwo mudugudu, Umuvugizi wa Polisi y’u Rwanda, CP Theos Badege, yavuze ko Polisi yishimira ibimaze kugerwaho mu myaka 18 imaze iri mu bufatanye n’abaturage, birimo kuba haboneka umudugudu utagira icyasha.

Ati “Nyuma yo kubona uwo musaruro, twafatanije n’inzego dukorana buri munsi duhitamo imwe mu midugudu iza ku isonga mu gihugu cyose, duhitamo umwe muri buri Karere wesheje imihigo ku rwego rwo hejuru mu kubungabunga umutekano no gukumira ibyaha. Uyu twajemo uyu munsi ni umwe muri iyo myinshi twaje gushima no gutera inkunga.”

Umuyobozi w’Umudugudu wa Cyankongi, Bicamumpaka Alexis, yavuze ko mu myaka yashize wahoze urangwamo ubucuruzi bw’ibiyobyabwenge, ubusinzi, urugomo, amakimbirane mu ngo ariko kubera ubufatanye n’abaturage bikaba bitakiharangwa.

Ati “Kubera ubufatanye na Polisi, ibyo bikorwa nta bikiharangwa. Ibikorwa igiye kutugezaho, ibiro by’umudugudu bizadufasha muri byinshi. Twajyaga dukora inama, tugakorera hafi yo ku muhanda, imvura yagwa tugakwirwa imishwaro kuko nta nzu yo kugamamo ariko ubu turasubijwe.”

Umwe mu baturage bahawe amashanyarazi akomoka ku mirasire, Mukeshimana Félicité, yagize ati “Ubu imibereho yanjye igiye guhinduka, abana banjye bavaga kwiga bakabura icyo bigiraho kuko nacanaga agatoroshi gashyirwamo amabuye, kagura 500Frw. Byageraga nijoro agatoroshi nakabura ugasanga kubona ibyo nkeneye birangoye. Bagiye kujya basubira mu masomo, nibamara kwiga, bazanteza imbere nanjye niyiteho kuko ntazaba ngitaha mu mwijima.’’

Mukeshimana Félicité wahawe amashanyarazi akomoka ku mirasire y'izuba ari kumwe na Minisitiri w’Ibidukikije, Dr Vincent Biruta; Umuyobozi w'agateganyo w'Umujyi wa Kigali, Busabizwa Parfait n'Umuvugizi wa Polisi y’u Rwanda, CP Theos Badege (inyuma)

Minisitiri Dr Biruta yashimiye Polisi y’u Rwanda ku bikorwa byayo bigamije gufasha abaturage mu iterambere rirambye.

Yagize ati “Mu buryo bwagutse mvuga, si ukureba gusa ngo nta bujura n’ubugizi bwa nabi buhari ni no kureba ngo turatanga ibisubizo ku bibazo abaturage bafite n’uwo mutekano ushobora kubakiraho bikarama. Niwo musingi w’ibi byose dukora, udahari gutera imbere ntabwo bishoboka. Ntiwatera imbere urara ku nkeke y’abajura, uziko uhinga abandi bagasarura, uziko ufite ubworozi ariko urarana n’amatungo.”

Yashishikarije abaturage kwita ku bikorwa byo kubungabunga ibidukikije nko gutera amashyamba, kwirinda guta amashashi aho babonye n’ibindi mu rwego rwo kwirinda ingaruka z’ihindagurika ry’ikirere.

Icyumweru cyahariwe ibikorwa bya Polisi kizasozwa ku wa 16 Kamena 2018, ubwo Polisi y’u Rwanda izizihiza isabukuru y’imyaka 18 imaze ishinzwe. Biteganijwe ko muri uku kwezi ingo 3000 zizahabwa amashanyarazi akomoka ku mirasire y’izuba, hazubakwa ibiro bimwe by’umudugudu muri buri karere bishyirwemo ibikoresho by’ibanze na Televiziyo ifasha abaturage kumenya amakuru n’ibindi.

Mu cyumweru cya mbere hazibandwa ku bikorwa byo kurwanya ikoreshwa ry’ibiyobyabwenge, icya kabiri kigaruke ku byo gukumira impanuka mu muhanda, icya gatatu ni ku bikorwa byo kurwanya ibyaha bikorerwa mu ngo naho icya nyuma ni ku kurwanya ruswa.

Umwaka ushize, ibyakozwe byose hamwe bifite agaciro k’amafaranga y’u Rwanda miliyoni 372, birimo amashanyarazi aturuka ku mirasire y’izuba yahawe ingo 3200 n’ibigo nderabuzima 30 mu gihugu; ubwisungane mu kwivuza ku baturage 700; hubatswe ibibuga by’umupira bibiri kimwe mu Karere ka Rutsiro no mu ka Gasabo, bifite agaciro k’amafaranga y’u Rwanda miliyoni 53 n’ibihumbi 800; gufatanya n’abaturage n’izindi nzego kurwanya nkongwa n’ibindi byonnyi mu bihingwa ku buso bugera kuri hegitari 46.

Hanubatswe ubwiherero 150 bufite agaciro k’amafaranga y’u Rwanda miliyoni 23; hatanzwe ibigega by’amazi ku miryango 600 yo mu turere twa Gasabo, Burera, Kirehe, Rwamagana, Rutsiro na Nyamagabe; hatewe ibiti mu rwego rwo kurengera ibidukikije; hubatswe ndetse hasanwa imihanda ireshya na kilometero 72; hubatswe inzu 53 z’abatishoboye n’ibiraro icyenda bihuza abaturage ndetse hanatunganywa n’ubusitani.

Minisitiri w’Ibidukikije, Dr Vincent Biruta, yatangije imirimo yo kubaka Ibiro by’Umudugudu wa Cyankongi uherereye mu Murenge wa Masaka
Minisitiri w’Ibidukikije, Dr Vincent Biruta n'Umuvugizi wa Polisi y’u Rwanda, CP Theos Badege batangiza imirimo yo kubaka Ibiro by’Umudugudu wa Cyankongi utarangwamo icyaha
Polisi y'Igihugu yifatanyije n'abaturage mu mirimo yo kubaka Ibiro by’Umudugudu wa Cyankongi uherereye mu Murenge wa Masaka
Abaturage bishimiye ko bagiye gufashwa kubona ibiro by'umudugudu
Umuyobozi w'Akarere ka Kicukiro, Dr Nyirahabimana Jeanne
Umuvugizi wa Polisi y’u Rwanda, CP Theos Badege, yavuze ko Polisi yishimira ibimaze kugerwaho mu bufatanye n’abaturage
Akanyamuneza kari kose
Umuyobozi w'agateganyo w'Umujyi wa Kigali, Busabizwa Parfait, yashimiye Polisi n’Ingabo z’u Rwanda ku bikorwa bigamije iterambere ry’abaturage
Minisitiri w’Ibidukikije, Dr Vincent Biruta, yasabye abaturage kwita ku bikorwa byo kubungabunga ibidukikije
Hanatewe ibiti mu rwego rwo kubungabunga ibidukikije
Senderi Hit yasabanye n'abaturage mu ndirimbo ze zikunzwe na benshi

Amafoto: Niyonzima Moses

[email protected]

Kwamamaza
Kwamamaza

Izindi nkuru wasoma

19 3 20-08-2018
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
z 2018-05-16 00:38:27

murwego rwo kwihutisha iterambere nogushyira mubikorwa vuba gahunda za leta,polisi n’igisirikare.nibamanuke bafatanye na leta kuzamura abaturage m’ubuhinzi ni ubworozi kuko nabyo biri mumutekano w,abaturage kandi nabo babifitiye ubumenyi harimo ababyize cyane.kuko iyo umuturage ashonje buriya ntamutekano aba afite.ikindi izengo zose zifatanye gukomeza kubaka ibikorwa remezo by’abaturage kugira ngo dukomeze kurandura burundu inzitizi mu iterambere nokugera kubirenzeho kubyo twihaye kugeraho.mubufatanye byose birashoboka cyane.

2
z 2018-05-16 00:35:21

murwego rwo kwihutisha iterambere nogushyira mubikorwa vuba gahunda za leta,polisi n’igisirikare.nibamanuke bafatanye na leta kuzamura abaturage m’ubuhinzi ni ubworozi kuko nabyo biri mumutekano w,abaturage kandi nabo babifitiye ubumenyi harimo ababyize cyane.kuko iyo umuturage ashonje buriya ntamutekano aba afite.ikindi izengo zose zifatanye gukomeza kubaka ibikorwa remezo by’abaturage kugira ngo dukomeze kurandura burundu inzitizi mu iterambere nokugera kubirenzeho kubyo twihaye kugeraho.mubufatanye byose birashoboka cyane.

Kwamamaza