IGIHE

Minisante yasabye abaturarwanda kwitwararika nyuma y’uko Ebola igaragaye muri Uganda

2 12-06-2019 - saa 09:51, Evariste Nsengimana

Minisiteri y’Ubuzima (Minisante) yasabye abaturarwanda n’abarusura ko hagize ugaragaza kimwe mu bimenyetso by’icyorezo cya Ebola kimaze iminsi cyibasiye Repubulika Iharanira Demokarasi ya Congo, ubu kikaba cyagaragaye no muri Uganda, kwihutira kujya ku kigo nderabuzima ngo ahabwe ubufasha byihuse.

Amezi umunani arashize Ebola yongeye kwibasira abaturage mu Ntara ya Ituri na Kivu y’Amajyaruguru muri RDC, aho imaze kugaragara ku barenga 2000 barimo abarenga 1300 yishe.

Minisiteri y’Ubuzima muri Uganda hamwe n’Ishami ry’Umuryango w’Abibumbye ryita ku buzima, OMS, bemeje ko Ebola yagaragaye muri icyo gihugu nyuma y’igihe inzego zinyuranye n’abaturage bikanga ko yaba ihari.

Gusa kugeza ubu, Ebola nubwo imaze kugaragara mu bihugu bibiri bihana imbibi n’u Rwanda, nta muturarwanda cyangwa uwarurusuye iragaragaraho cyangwa ngo agaragaze ibimenyetso byayo ku butaka bwarwo.

Itangazo Minisitiri w’Ubuzima, Dr. Diane Gashumba, yashyizeho umukono risaba abaturarwanda n’abarusura ko uwagaragaza kimwe mu bimenyetso byayo yakwihutira kugera ku kigo nderabuzima, ivuriro cyangwa ibitaro bimwegereye kugira ngo ahabwe ubufasha bwihuse.

Ati “Minisiteri y’Ubuzima irasaba abanyarwanda bose n’abarusura bagaragaza ibimenyetso bya Ebola birimo guhinda umuriro, gucika intege bidasanzwe bikurikiwe no guhitwa cyangwa kuruka, kubabuka uruhu, gutukura amaso, kuva amaraso bidasanzwe, uwakoze ku muntu ufite ibyo bimenyetso cyangwa uwagiye gushyingura uwabigaragaje; kwihutira gushaka ubuvuzi ku ivuriro rimwegereye.”

Minisitiri Gashumba yasabye kandi abafatanyabikorwa barimo abaturage, itangazamakuru, Sosiyete Sivile, ibigo byigenga, ibigo bitwara abagenzi, hoteli n’ibindi gufatanya mu gushyira mu bikorwa ingamba zafashwe zo kurwanya no gukumira Ebola ko yagera mu Rwanda.

Yasabye kandi buri wese cyane abayobozi b’inzego z’ibanze gushishikariza abaturage n’abajyanama b’ubizima kuba maso no gukurikiza amabwiriza yatanzwe.

Minisiteri y’Ubuzima kandi ivuga ko mu rwego rwo kwirinda ko bagira ibyago byo kwandura virus ya Ebola, bakwiye kwimakaza umuco w’isuku bagakaraba intoki n’amazi meza n’isabune, kwirinda kujya mu bice byagaragayemo Ebola, kwirinda gukora cyangwa guhura n’amaraso cyangwa amatembabuzi by’umuntu wagaragaje ibimenyetso byayo, uyirwaye cyangwa uwo yishe.

Hari kandi kwirinda gukora no kurya inyama batazi aho zakomotse no kwihutira kumenyesha inzego zibishinzwe mu gihe bahuye na kimwe muri ibyo bimenyetso cyangwa ikibazo badasobanukiwe bagahamagara ku murongo utishyurwa wa 114 cyangwa bakamenyesha abajyanama b’ubuzima na Polisi.

Virus ya Ebola ni imwe mu zikaze kuko yandurira mu gukoranaho k’umuntu uyifite n’utayifite binyuze mu matembabuzi. Umuntu uhuye n’uwanduye Ebola ahita ahabwa urukingo agakurikiranwa ari ahantu ha wenyine mu gihe cy’iminsi 21.

U Rwanda nk’igihugu cyegeranye na Uganda na RDC, ruheruka gutangiza gutanga urukingo rwa Ebola rwitwa “rVSV-ZEBOV” ku bajyanama b’ubuzima n’abandi bakozi bakira abarwayi mu duce twegereye imipaka ya Repubulika Iharanira Demokarasi ya Congo (RDC) dushobora gukwirakwiramo icyorezo cya Ebola kurusha utundi.

Ni ingamba yafashwe mu kurushaho kwitegura guhangana na Ebola, yiyongereye ku zirimo imyitozo yahawe abakora mu rwego rw’ubuzima mu duce twegereye umupaka no gupima umuntu wese winjira mu Rwanda aturutse mu bihugu birangwamo iyi ndwara.

U Rwanda rwiteguye guhangana n'icyorezo cya Ebola
Minisitiri w'Ubuzima, Dr. Diane Gashumba, yasabye abaturarwanda kugana ibitaro mu gihe bagaragaje ibimenyetsso bya Ebola

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Rugwe 2019-06-13 13:20:58

Abarenga kumategeko yo kujya muri Uganda no kuvayo bajye babarasa batazatuzanira iyo nyagwa.

2
Mahoro 2019-06-12 07:23:35

Imana irinde u Rwanda

Kwamamaza