Mineduc yatangiye gukoresha intebe ibihumbi 17 z’abana bigaga bicaye hasi no ku mabuye

7 16-05-2018 - saa 06:59, Ndayishimye Jean Claude

Minisiteri y’Uburezi yafashe icyemezo cyo gukemura ikibazo cy’intebe cyagaragaye mu mashuri atandukanye mu gihugu cyatumaga hari abana biga bica hasi no ku mabuye.

Umunyamabanga Uhoraho muri iyi minisiteri, Mulindwa Samuel, yabwiye Abadepite bagize Komisiyo y’Ingengo y’Imari n’umutungo w’igihugu ko byasabye ko bashaka amafaranga yari agenewe ibindi bikorwa kugira ngo yifashishwe mu gukemura icyo kibazo cyari giteye inkeke.

Yavuze ko ubugenzuzi Mineduc imaze iminsi ikora, basanze hari abana biga bicaye hasi abandi bakicara ku mabuye, ikintu avuga ko kitagakwiye kuba kikiriho muri iki kinyejana.

Yagize ati “Aho ujya mu ishuri ugasanga abana 30 bicaye hasi cyangwa umwana yizaniye ibuye, twumvaga mu kinyejana cya 21 bitakagombye kuba bihari.”

Ibyo ngo byatumye hari amafaranga yari agenewe ibindi bikorwa bafata kugira ngo agurwe intebe vuba na bwangu kugira ngo icyo kibazo kibashe gukemuka.
Yagize ati “Turavuga ngo tugire ikindi twigomwa nubwo cyari giteganyijwe ariko turangize ikibazo gikoza isoni cyo kujya mu ishuri ugasanga umwana yiga yicaye hasi, nubwo n’ibindi byari bikenewe kuko byari kuri gahunda, habaye kubyirengagiza dukemura ikibazo.”

Minisiteri yasinyanye n’Inkeragutabara amasezerano yo gukora intebe ibihumbi 17 zizatwa miliyoni 869 Frw, zigomba kuba zarangiye mu gihe cy’amezi atatu.

Uretse intebe, minisiteri yatangaje ko basanze hari n’ahari ikibazo cy’ubwiherero ndetse n’ibyumba by’amashuri bidahagije, aho bagiye kubaka ibigera ku 121 n’ubwiherero 108.

Mu mwaka w’ingengo y’imari wa 2018-2019, Mineduc irateganya kubaka ibindi byumba 1032 no gukoresha intebe ibihumbi 23736.

Muri izo ntebe zindi zizakorwa harimo izigera ku zindi ibihumbi 17 zizunganira izingana zityo zatangiye gukorwa kuko basanze zidahagije abana biga bicaye hasi.

Mu ntangiriro za Werurwe 2018, IGIHE yasuye Ishuri ribanza rya Kabumbwe riherereye mu Karere ka Gisagara rifite abanyeshuri barenga 1800, biga bacucitse mu mashuri kugeza n’aho hari abatabona aho bicara, bakiga bahagaze.

Uretse ikibazo cy’intebe cyagaragaye mu turere dutandukanye, hari n’aho usanga amashuri ashaje ku buryo imvura iyo iguye inyagira abanyeshuri.

Mineduc ivuga ko ubugenzuzi imazemo iminsi mu mashuri yose mu gihugu bwari bugamije kureba ibibazo bihari, kugira ngo bishakirwe umuti, ireme ry’uburezi ribashe gutera imbere kurushaho.

Abana IGIHE yasanze mu Karere ka Gisagara mu ishuri nta ntebe bafite zo kwicaraho
Kwicara babyiganira ku ntebe ni kimwe mu bibangamiye imyigire y'abanyeshuri muri Rwamagana
Umunyamabanga Uhoraho muri Mineduc, Mulindwa Samuel
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
tito 2018-05-26 04:52:33

Yewe biteye agahinda pe; Ko turi abambere mugutera inkunga ama équipe yo muri England kandi ntamwana wumwongereza wicara hasi, twakagombye kubanza gukemura ibibazo nkibi byimyigire mumashuri kuko niho hejo hazaza higihugu cyacu; ibyo dukora byose tubanze d ukemure ikibazo cyuburezi kuko biragayitse

2
kagiraneza 2018-05-25 02:28:29

Kare kose se?ubundi se basanzwe batabizi uretse kudindiza abana bacu???

3
z 2018-05-17 00:47:38

iy’imyigigire abana barimo ntakigenda ntakamaro ishobora kubagiririra.uretse guta igihe cyabo ngo bariga.ni ikinyarwanda ubwacyo basigaye bazamuka batakizi kandi ari abanyarwanda.

4
aloys munyentwali 2018-05-16 04:48:10

Ndashima ubuyobozi bwa MINDUC buriho ubu kuko twebwe abarezi tubona ko burimo kwita byukuri kubibazo technique bigoye uburezi kdi bagasha igisubizo nyacyo banagishakira aho kiri. Turizera ko n’ibindi nk’imishahara bazageraho bakabikemura.

5
RURANGWA ALBERT 2018-05-16 02:26:19

Ba nyakubahwa Bayobozi nimukorere abanyarwanda mureke kubashushanya no kubakinga mu maso amafoto ku mbuga nkoranyambaga

Jye mbona ikibazo ari iki, nta gahunda ihamye isubiza ibibazo mu Rwanda ihaba, habaho guhora
abantu biyeranja no kujijisha.

Ubundi ni ryari hagurwa intebe mu ishuri, zisanwa gute zisimbuzwa ryari gute? iyo iyi gahunda iba ihari nta mwana wakabaye yicara hasi. Ubu se iyo iri genzura ritabaho cyane ko ryabaye muri uyu mwaka ritari risanzwe ribaho abana bana ntibari kuzabona aho bicara? ubu se ni ngombwa ko Ministieri ijya kureba ko abana badafite aho bicara hari Akarere, Umurenge n’Umuyobozi w’Ikigo? ubu se ikigo batagiyemo ho bazabona intebe gute ko n’ahandi ibi bibazo bihari henshi?

6
kabayiza 2018-05-16 02:18:00

None se nizihari ko mbona ziteye nabi?? mwarimu ari kuruhe ruhande egokoooo ni akumiro mba ndoga rwabutogo

7
p 2018-05-16 02:07:30

ese murwanda rwacu hari abantu biga batagira aho bicaro kuriya,ibibazo by’amashyuri murumva hari ireme rishoborwa kuvamo niba biga nabi.

Kwamamaza