Madamu Jeannette Kagame yitabiriye ibiganiro bifasha urubyiruko kumenya amateka nyayo ya jenoside

4 15-04-2018 - saa 09:00, Cyprien Niyomwungeri

Madamu Jeannette Kagame yitabiriye ibiganiro bigamije gusobanurira urubyiruko amateka y’ukuri kuri Jenoside yakorewe Abatutsi mu 1994 no kurufasha kuyigiraho, bigakorwa hifashishijwe abanditsi b’ibitabo bitandukanye mu gikorwa cyiswe Kwibuka24 Café Littéraire.

Muri iki gikorwa cyabereye mu nyubako Kigali Convention Centre, ikiganiro cyatanzwe na Komiseri wa Polisi, Dr Daniel Nyamwasa, wamurikaga ku mugaragaro igitabo yise ‘Le Mal Rwandais: De la racine au paroxysme du Genocide des Tutsi’.

CP Dr Nyamwasa wavutse mu 1957, yasobanuye ko mu byamuteye kwandika iki gitabo harimo uko nyuma y’imyaka ibiri avutse yatangiye ubuzima bw’ubuhunzi kuko ababyeyi be bamuhunganye bamuhetse bakajya mu Burundi, kugeza ubwo nyuma y’imyaka 30 yaje gufatanya n’abandi kubohora igihugu.

Yabwiye urubyiruko ko mu myaka irenga 30 y’ubuhunzi yababajwe no kubaho atagira igihugu, arusaba kubakira ku byagezweho no guhora rwiteguye kwitangira igihugu no kugikorera.

Yagize ati “Icyambabaje mu myaka 31 nibaza ngo njyewe ndi iki mu bandi kuko aho wageraga wasangaga utari umwenegihugu ugasanga utari n’umunyarwanda mbese ukabura inkomoko. Bituma nibaza ngo kuki ari njye na mugenzi wanjye twahunze?”

Mu gitabo cye asobanura uko abanyarwanda babanye imyaka irenga 800 bahana inka, basangiye amasambu, bashyingirana ariko bagashwana umunsi umwe. Indi mpamvu ni ugusobanura uko jenoside yabaye mu Rwanda amahanga arebera ariko Inkotanyi zidafite umubare uhagije n’ibikoresho zigashobora kuyihagarika.

CP Dr Daniel Nyamwasa avuga ko yashatse ko umwana uzavuka azamenya ukuri ku mateka y’u Rwanda ndetse n’utari mu Rwanda akakumenya. Yasabye urubyiruko kugira umuco wo kwandika no gukomeza kuba umwe.

Ati “Abana bakwiye kumva ko u Rwanda ari Umunyarwanda. Nitwemera kuba hamwe tukaba ikintu kinini tuzabaho neza, nitwemera kubaho ubuce tuzaba turi kwiyangiza. Abana ndabasaba ko bakomeza kwibumbira hamwe muri ya nyabutatu y’Abanyarwanda.”

Umuyobozi wa Polisi y’Igihugu, IGP Emmanuel Gasana, yabwiye urubyiruko ko mu rugamba rwo kubohora igihugu Perezida Kagame, yari kumwe n’Inkotanyi bikazitera umuhate bigatuma zikora ibikorwa bikomeye byo gutsinda urugamba no guhagarika jenoside zititaye ku mubare muto wazo ugereranyije n’abo barwanaga.

Yakomeje avuga ko kimwe n’ibimaze gukorwa mu rugamba rwo kubaka igihugu ari ‘amasomo urubyiruko rukwiye kwiga, rugakuramo intambwe rwatera kugira ngo ibyakozwe byose bidapfa ubusa cyangwa ngo habemo icyuho.’

Ibi biganiro bitegurwa na Komisiyo y’Igihugu yo Kurwanya Jenoside (CNLG) ifatanyije n’Isomero ry’Igihugu. Umunyamabanga Nshingwabikorwa wa CNLG, Dr Bizimana Jean Damascène, yasobanuye ko urubyiruko rwitabwaho kuko ari rwo rukeneye kumenya cyane amateka no kuyigiraho kandi bigatuma narwo rutinyuka rukandika.

Muri aya mezi atatu [Mata, Gicurasi, Kamena ] hari gahunda yo gukora iki gikorwa gihuza abanditsi n’urubyiruko muri za Kaminuza zose n’amashuri makuru, aho urubyiruko rwo muri Campus 46 ruzaganirizwa.

Igitabo ya CP Dr Daniel Nyamwasa, kiraboneka muri Librairie Ikirezi, Caritas, ku rwibutso rwa Jenoside rwa Kigali, mu ngoro y’amateka ya Jenoside yakorewe Abatutsi mu 1994 no kuri internet, kikaba kigura amayero 17 ni ukuvuga ibihumbi 17 by’amafaranga y’u Rwanda. Cyanditse mu Gifaransa aho kizashyirwa no mu Cyongereza.

Dr Daniel Nyamwasa, wanditse igitabo "Le Mal Rwandais" (iburyo) ari kumwe na Dr Jean Damascène Gasanabo wari uyoboye ibiganiro
Madamu Jeannette Kagame ari kumwe na Minisitiri w’Umuco na Siporo, Uwacu Julienne (ibumoso) n’Umunyamabanga Nshingwabikorwa wa Komisiyo y’Igihugu yo Kurwanya Jenoside, Dr Bizimana Jean Damascène (iburyo)
Urubyiruko rwavuze umuvugo ugendeye ku magambo yanditse mu gitabo “Le Mal Rwandais” cya Dr Daniel Nyamwasa
Abantu b'ingeri zitandukanye bahawe umwanya wo kubaza ibibazo
Igitabo ya CP Dr Daniel Nyamwasa, kiboneka muri Librairie Ikirezi, Caritas, ku rwibutso rwa Jenoside rwa Kigali, mu ngoro y’amateka ya Jenoside yakorewe Abatutsi mu 1994 no kuri internet, kikaba kigura amayero 17 ni ukuvuga ibihumbi 17 by’amafaranga y’u Rwanda. Cyanditse mu Gifaransa aho kizashyirwa no mu Cyongereza
Komiseri wa Polisi, Dr Daniel Nyamwasa, wamuritse ku mugaragaro igitabo yise ‘Le Mal Rwandais: De la racine au paroxysme du Genocide des Tutsi’
Umunyamabanga Nshingwabikorwa wa CNLG, Dr Bizimana Jean Damascène, yasobanuye ko urubyiruko rwitabwaho kuko ari rwo rukeneye kumenya cyane amateka no kuyigiraho kandi bigatuma narwo rutinyuka rukandika
Minisitiri w'Ubutaka n'Amashyamba, Tumushime Francine
Umuvugizi wa Polisi y'Igihugu, CP Theos Badege, nawe yari muri iki gikorwa
Umuyobozi wa Polisi y’Igihugu, IGP Emmanuel Gasana, yabwiye urubyiruko ko mu rugamba rwo kubohora igihugu Perezida Kagame, yari kumwe n’Inkotanyi bikazitera umuhate bigatuma zikora ibikorwa bikomeye byo gutsinda urugamba no guhagarika jenoside zititaye ku mubare muto wazo ugereranyije n’abo barwanaga
Depite Jean Baptiste Rucibigango atanga ibitekerezo muri iki gikorwa

Kanda hano urebe andi mafoto yo muri iki gikorwa

Amafoto: Niyonzima Moise

Kwamamaza
Kwamamaza

Izindi nkuru wasoma

20 3 20-08-2018
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Alma 2018-04-17 05:48:38

Ni umunyabwenge pee! kandi yanashatse neza Minister Francine. Bombi ni abahanga kandi abakristo. Imana ikomeze ibashyigikire, ibateze intambwe ikomeye mukomeze kwandika n’ibindi bitabo byinshi, ibyo kwandika birahari.

2
Mary 2018-04-15 07:10:41

Nkunda cyane ko First Lady wacu yitabira ibikorwa nkibi. Ni geste igera ku mutima, kd iha imbaraga ababitegura. Dufite ubuyobozi bwiza buha agaciro Abanyarwanda, nta gushidikanya tuzakomeza kugera kuri byinshi byizaaa!

3
Teddy 2018-04-15 05:22:42

Ni ibyishema kugira Ibitabo bisobanura ku mateka y’Igihugu cyacu ari avuga k’uguhagarika Genoside cyangwa k’urugamba rwo kubohora Igihugu cyacu. Urubyiruko rukwiye kwitoza umuco wo gusoma rukabisoma rukarushaho kumva no gusobanukirwa icyakozwe ngo ibyo bikorwa byombi bibiri bikorwe kdi bigere ku ntego ariko n’abakuru nibitabira gusoma barushaho kumenya ukuri nyako
CP Dr D Nyamwasa wakoze gutanga ikigega n’isoko yaho gukura amakuru akenewe

4
rk 2018-04-15 04:55:39

kwandika. yes. bibanzirizwa no gusoma.

Kwamamaza