Madamu Jeannette Kagame yasabye ababyeyi kwita ku burere bw’abana babo abasaba kwibuka ko uburere bw’ibanze bwabo babukura mu miryango bavukamo, babarinda ikintu cyose gishobora kubahutaza.

Yabisabye kuri uyu wa Gatatu tariki ya 11 Ukwakira 2017, ubwo yatangizaga ku mugaragaro ubukangurambaga ku miyoborere n’imibereho myiza mu muryango bwabereye mu Murenge wa Gatore mu Karere ka Kirehe.

Ubu bukangurambaga bwateguwe mu rwego rwo gukomeza guteza imbere imiyoborere myiza hagamijwe kugira umuryango utekanye, harimo kandi gukemura ibibazo ku mitangire ya serivise cyane cyane mu nzego z’ibanze, kurushaho kwimakaza ihame ry’uburinganire no gukemura ibibazo bikigaragara mu miryango no kubungabunga uburenganzira bw’umwana.

Madamu Jeannette Kagame yavuze ko nubwo u Rwanda hari byinshi rumaze kugeraho mu gukemura ibibazo byari byugarije umuryango, hakiri ibigihari, asaba ko ibikibangamiye umuryango nyarwanda buri wese yaharanira ko bikemuka.

Yagize ati “Nubwo hari byinshi twagezeho ariko ni akanya ko kwikebuka tukareba ahagikenewe gushyirwamo imbaraga, kugira ngo abana bacu bakurire mu miryango ibabereye, kuba tugifite abana bata ishuri, abahohoterwa, abafatwa ku ngufu, abakoreshwa imirimo ivunanye n’ababa mu muhanda, ntabwo bitubereye nk’Abanyarwanda.”

Yakomeje agira ati “Nk’ababyeyi, abarezi n’abayobozi dukwiye gukomeza kwita ku mwana wese nk’uwacu tumurinda icyahungabanya uburenganzira bwe n’imikurire ye muri rusange. Ababyeyi turasabwa kugira umwanya uhagije wo kuganira ku burere bw’abana bacu, tukabaha ibikenewe byose ngo babashe gukura no kwiga neza, tukibuka ko uburere bwabo ari twe bureba mbere y’abarezi cyangwa Leta.”

Yabibukije ko uburere bw’ibanze bw’abana babukura ku babyeyi, abasaba kuganiriza abana kugira ngo imbogamizi bahura nazo zirusheho kumenyekana hakiri kare.

Yabasabye kandi kwirinda guha abana akazi karenze ubushobozi bwabo, ababahohotera ntibahishirwe kugira ngo bahanwe hakurikijwe icyo amategeko ateganya.

Ati “Mu nshingano zacu nk’ababyeyi dukwiriye no kuzirikana kwita ku burere bw’abana bacu kuva bakiri bato kuko bizabafasha kuba abagabo n’abagore bahamye. Turabizi twese ko uburere buruta ubuvuke.”

Minisitiri w’Uburinganire n’Iterambere ry’Umuryango, Nyirasafari Esperance, yavuze ko ubukangurambaga nk’ubu bugira akamaro mu muryango nyarwanda ndetse bumaze gutanga umusaruro mu nzego zitandukanye zireba umuryango nyarwanda.

Ubushize hatanzwe inka 327 muri gahunda ya girinka, ku miryango itishoboye, amatungo magufi 521, abantu 1744 batishoboye bishyuriwe ubwisungane mu kwivuza, ibigo mbonezamikurire 40 birubakwa.

Abana bari barataye amashuri bayasubijwemo ku kigero cya 75%, binyuze muri gahunda ya Kora Wigire, abakobwa 713 bari baracikirije amashuri basubiye kwiga imyuga, bibumbira mu makoperative 34.

Icyo gihe kandi abana banditswe mu bitabo by’irangamimerere bari baracikanywe bagera kuri 621862. Ababyeyi babanaga badasezeranye 12632 nabo barasezeranye.

Ubukangurambaga bwatangijwe kuri uyu wa 11 Ukwakira 2017, buteganyijwe kumara ibyumweru bitanu, hakaba hazakorwamo ibikorwa bitandukanye birimo gukingira abana, kwihutisha igikorwa cyo gutunganya ibijyanye n’ubwisungane mu kwivuza, gukora ubukangurambaga ku buzima bw’imyororokere, kubarura imiryango itarasezeranye byemewe n’amategeko, gushyira imbaraga muri gahunda y’umugoroba w’ababyeyi n’ibindi.

Madamu Jeannette Kagame ageza ijambo ku bitabiriye itangizwa ry’ubukangurambaga ku miyoborere n’imibereho myiza mu muryango
Madamu Jeannette Kagame yari kumwe na Minisitiri w’Uburinganire n’Iterambere ry’Umuryango; Esperance Nyirasafari, hamwe n’abandi bayobozi muri Guverinoma
Madamu Jeannette Kagame ari kumwe n’abana bitabwaho muri gahunda yo guha uburezi bukwiye abana bakiri bato
Gutangiza ubu bukangurambaga byitabiriwe n’abanyeshuri bato mu Karere ka Kirehe
Umwe mu babyeyi bari bitabiriye uyu munsi asabana n’umwana we


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved