IGIHE

Madamu Jeannette Kagame yasabye abakristu na Kiliziya Gatolika kuba abagabuzi b’amahoro

8 29-11-2019 - saa 17:44, Rabbi Malo Umucunguzi

Madamu Jeannette Kagame yibukije abakirisitu na Kiliziya Gatolika ko bakwiye guharanira gukomeza kuba abarobyi b’abantu n’abagabuzi b’amahoro, mu gihe u Rwanda rukomeje urugendo rwo kubaka ubumwe n’ubwiyunge nyuma ya Jenoside yakorewe Abatutsi mu 1994.

Ni ubutumwa yatanze kuri uyu wa Gatanu mu ihuriro rigamije kurebera hamwe uruhare rwa Kiliziya Gatolika mu guteza imbere ubumwe n’ubwiyunge nyuma y’imyaka 25 habaye Jenoside yakorewe Abatutsi mu 1994. Ni igikorwa cyitabiriwe n’abantu batandukanye barimo Intumwa ya Papa mu Rwanda, Andrzej Józefowicz n’intumwa zaturutse mu Burundi na Kenya.

Madamu Jeannette Kagame yifashishije igitabo cya Prof. Dr. E.A.J.G. van der Borght mu nyandiko yise “Religions and reconciliation of conflicting sociocultural identities”, agaragaza ko kugira ngo Kiliziya igire uruhare rufatika mu rugendo rw’ubumwe n’ubwiyunge, itagomba gushingira gusa ku nyigisho z’iyobokanama, ahubwo hiyongeraho kumva neza ibibazo byihariye by’imibanire y’abantu.

Yashimiye Kiliziya Gatolika yatekereje gushyiraho urubuga nk’uru rwo kuganira no gusuzuma ingaruka zatewe n’amahano ya Jenoside ndetse ko ibiganiro nk’ibi bifasha mu kuzirikana amahitamo akomeye Abanyarwanda bakoze.

Yakomeje agira ati “Munanyemerere kandi twihanganishe Kiliziya Gatolika kuko nayo yabuze abihayimana n’abakirisitu benshi. Kiliziya kandi yagize n’ibyago byo kugira abayoboke babibye ingengabitekerezo ya Jenoside igihe kirekire no gukora icyaha cya Jenoside. Biri mu nshingano zacu twese gukomeza kwigisha no gufasha abakomoka mu miryango yabo ndetse n’Abanyarwanda muri rusange, kugendera kure uwo murage mubi.”

“Ntitwakwirengagiza kandi ko Kiliziya yagize n’intwari, abavukijwe ubuzima bwabo kuko batsimbaraye ku gihango cy’Ubunyarwanda, igihango cy’ubumuntu no kumenya guhitamo icyiza.”

Madamu Jeannette Kagame yavuze ko igihe Abanyarwanda bari bamaze kubona amahoro nyuma ya Jenoside, kongera kubaka umutima w’Ubunyarwanda byasabaga imbaraga, ubushishozi, ubufatanye no kureba kure, ku buryo nta muntu umwe wari kubyishoboza.

Yavuze ko u Rwanda rwari rufite ibibazo byihariye kandi ugasanga ikibazo cyose cyihutirwa, ku buryo gukemura ibyo bibazo mu muryango ukomeretse, udafite umutekano uhagije, nta n’icyizere mu bantu, byari ibintu bikomeye.

Ati “Turashimira Kiliziya Gatolika kuba yaragendanye na Leta, ikagira uruhare mu gufasha Abanyarwanda muri rusange n’abayoboke bayo by’umwihariko, mu rugendo rw’ubumwe n’ubwiyunge. Ibimaze gukorwa ni byinshi kandi ni na byiza ariko urugendo ruracyari rurerure. Dukomeze ibiganiro byiza dusanganywe mu miryango remezo, bidufashe kwimakaza ubutabera bwunga no gusakaza umuco w’amahoro.”

Yasabye Kiliziya Gatolika gutanga umusanzu no mu zindi nzego z’ubuzima zirimo kurushaho kwimakaza ubumwe n’ubwiyunge, ubutabera n’amahoro.

Ati “Dukwiye gukomeza gushyira imbaraga mu rugendo rwo gusaba imbabazi, guhindura imyumvire, guhinduka no kubaka u Rwanda, urugendo rwo kubabarira narwo rugakurikiraho, kuko bituma uwakorewe icyaha abohoka, cyane ko aba agomba no kubaho, kandi kubaho abohotse nibyo bimufasha kurushaho, byombi bikadufasha komora uwahemukiwe n’uwahemutse.”

Yanasabye umusanzu mu guhangana n’ihungabana rikigaragara; kuzamura ireme ry’uburezi; gukumira no gukemura amakimbirane mu miryango. Harimo kandi kwita kuri gahunda mbonezamikurire y’abana bato ifite uruhare mu kurema umuntu wuzuye, asaba abihayimana gukoresha “ahantu dufite ibyumba n’ubushobozi twifitemo, abakirisitu bayitabire kurushaho, bityo tuzaba dutanze umusanzu ukomeye mu kubaka umuryango w’uyu munsi n’uw’ejo.”

Yabwiye abakirisitu n’abashumba ba Kiliziya Gatolika ko bafite amahirwe y’ikirenga, kuko bafite Yezu ubwe, abasaba kuzirikana ko yitanze atitangiriye itama ngo yunge abantu n’Imana.

Ati “Icyo tubifuriza ni ukudacogora mu kumwiga ingiro n’ingendo no gukomeza gusangira isano isumba iy’amaraso, kuko n’ubundi Kiliziya irenze kure amoko n’irindi vangura iryo ari ryo ryose. Ahubwo kiliziya ishinzwe roho, ishinzwe ubwoko bw’Imana aribwo kiremwamuntu kandi nta vangura.”

“Kuko n’ubundi, kiliziya irenze kure amoko n’irindi vangura iryo ari ryo ryose ryose. Ahubwo kiriziya ishinzwe roho, ishinzwe ubwoko bw’Imana aribwo kiremwamuntu, kandi nta vangura. Mbifurije gukomeza kuba abarobyi b’abantu n’abagabuzi b’amahoro, mwibuka kandi mutwigisha ko kubaho ari ukubana.”

Umushumba wa Arkidiyosezi ya Kigali, Musenyeri Antoine Kambanda, yavuze ko nyuma y’imyaka 25 Jenoside ibaye, wabigereranya nk’umuntu umaze igihe aterera umusozi akaba ageze mo hagati, agasubiza amaso inyuma ngo arebe inzira igoye amaze gucamo n’urugendo agifite imbere.

Yashimiye ingabo za RPF zahagaritse Jenoside zirangajwe imbere na Perezida Paul Kagame, agaragaza ko urugendo rwo gusana u Rwanda rwari rugoye kuko rwabanjirijwe no gushyingura abishwe no kubaha icyubahiro bambuwe, kubakira imfubyi n’abapfakazi no guharanira kuvugisha ukuri mu rugendo rwo kwiyubaka.

Yashimangiye ko Kiliziya Gatolika izakomeza kugira uruhare mu kubaka amahoro n’ubwiyunge, cyane ko ifite n’abo ireberaho barimo abarinzi b’igihango n’abandi bagiye bita ku mfubyi n’abapfakazi.

Intumwa ya Papa mu Rwanda, Musenyeri Józefowicz, yavuze ko imyaka 25 ishize nyuma y’amahano yagwiriye u Rwanda, ari ngombwa ko Abanyarwanda bashyira hamwe mu kubaka igihugu buri wese yibonamo, kandi akubaha ubuzima bwa mugenzi we.

Muri iki kiganiro kandi hatanzwe ikiganiro cyagarutse ku rugendo rumaze guterwa mu bumwe n’ubwiyunge, cyatanzwe na Musenyeri Hakizimana Célestin wa Diyosezi ya Gikongoro, Padiri Ubald Rugirangoga, Umunyamabanga Nshingwabikorwa wa Komisiyo y’Ubumwe n’Ubwiyunge, Ndayisaba Fidèle na Francine Zimulinda ushinzwe Urubyiruko muri Kiliziya Gatolika.

Mu mateka ya Jenoside yakorewe Abatutsi, Kiliziya Gatolika inengwa ko hari bamwe mu bapadiri bayo bijanditse muri aya mahano, ariko inashimirwa umusanzu yatanze mu kurushaho kwimakaza ubumwe n’ubwiyunge.

Bimwe mu bikorwa yagizemo uruhare birimo ko kuva mu 1994 kugeza mu 1996 yatanze umusanzu mu bikorwa by’ubutabazi n’ubufasha ku mfubyi n’abapfakazi ba Jenoside, aho yabubakiye inzu inabaha n’ibindi byangombwa nkenerwa.

Naho mu gihe cya 1997-1999 haje Sinodi Gacaca Nkirisitu, yashyize imbere ibiganiro binyuze mu miryango remezo, Abakirisitu basasa inzobe baganira ku kibazo cy’amoko n’ibyagwiriye igihugu byose.

Biteganyijwe ko abitabiriye iri huriro bazarisoza ku Cyumweru mu misa izasomerwa muri Paruwasi Regina Pacis, ndetse kuri uyu wa Gatandatu bazakora urugendo rwo kwibuka banasura Urwibutso rwa Jenoside rwa Kigali ku Gisozi.

Mufti w'u Rwanda Hitimana Salim aramutsa Arikiyepiskopi wa Kigali, Musenyeri Antoine Kambanda
Musenyeri Smaragde Mbonyintege wa Diyosezi ya Kabgayi agera kuri Sainte Famille mu Mujyi wa Kigali
Iri huriro ryitabiriwe n'abatumirwa batandukanye, Abihaye Imana, Abalayiki n'abayobozi mu nzego za Leta
Mufti w'u Rwanda, Salim Hitimana yitabiriye iri huriro
Umuhanzi Ngarambe François Xavier ni umwe mu bitabiriye iri huriro
Iri huriro ryitabiriwe n'abatumirwa batandukanye, Abihaye Imana, Abalayiki n'abayobozi mu nzego za Leta
Hatanzwe ibiganiro byakomeje gushimangira uruhare abihaye Imana bakwiye kugira mu kwimakaza Ubumwe n'Ubwiyunge
Ni ihuriro ryitabiriwe n'abakuru n'abato
Musenyeri Hakizimana Célestin uyobora Diyosezi ya Gikongoro na Cyangugu yinjira ahabereye ibi biganiro mu cyumba cy'inama cya Hotel Sainte Famille
Urubyiruko rwitabiriye ku bwinshi ibi biganiro nk'ishingiro ry'u Rwanda rw'ejo hazaza
Musenyeri wa Diyosezi ya Byumba Servilien Nzakamwita mbere y'uko ibiganiro bitangira
Abashumba ba Kiliziya Gatolika bitabiriye iki kiganiro
Arikiyepiskopi wa Kigali Musenyeri Antoine Kambanda yari muri iri huriro
Musenyeri Servilien Nzakamwita wa Diyosezi ya Byumba
Intumwa ya Papa mu Rwanda, Musenyeri Andrzej Józefowicz
Iri huriro ryatangijwe n'isengesho ryakozwe bose bahagaze
Madamu Jeannette Kagame mu isengesho ryabimburiye ibiganiro
Musenyeri Kambanda yavuze ko hari intambwe imaze guterwa mu bumwe n'ubwiyunge nubwo nta mwanya wo kwirara
Intumwa ya Papa mu Rwanda, Andrzej Józefowicz, yavuze ko igihe kigeze ngo Abanyarwanda bubake igihugu buri wese yibonamo
Musenyeri Kambanda yavuze ko umwanya nk'uyu aba ari uwo kwisuzuma harebwa intambwe imaze guterwa mu bumwe n'ubwiyunge
Madamu Jeannette Kagame yavuze ko Kiliziya Gatolika ikwiye kurushaho gutanga inyigisho zitarangirira gusa ku ijambo ry'Imana
Madamu Jeannette Kagame yashimye uruhare rwa Kiliziya Gatolika mu kubaka Ubumwe n'Ubwiyunge mu Banyarwanda
Padiri Nyombayire Faustin ni we wayoboye ikiganiro ku ntambwe yatewe mu bumwe n'ubwiyunge
Umunyamabanga Nshingwabikorwa wa Komisiyo y'Igihugu y'Ubumwe n'Ubwiyunge, Fidèle Ndayisaba ubwo hatangwaga ikiganiro
Padiri Ubald Rugirangonga yasangije abandi urugendo rwe mu kubaka ubumwe n'ubwiyunge muri Paruwasi ya Mushaka
Musenyeri Hakizimana Célestin mu kiganiro cyagarutse ku bumwe n'bwiyunge
Francine Zimurinda yavuze ko urubyiruko rufite umusanzu ukomeye mu kwimakaza ubumwe n'ubwiyunge
Uhereye ibumoso: Iki kiganiro cyayobowe na Padiri Nyombayire Faustin, gitangwa na Padiri Ubald Rugirangonga, Umunyamabanga Nshingwabikorwa wa Komisiyo y'Ubumwe n'Ubwiyunge Fidèle Ndayisaba, Musenyeri wa Diyosezi ya Gikongoro na Cyangugu, Hakizimana Célestin na Francine Zimulinda wari uhagararaiye urubyiruko
Madamu Jeannette Kagame hamwe n'abandi bayobozi bakurikiye ibiganiro byatangwaga
Padiri Faustin Nyombayire ni we wayoboye ikiganiro
Madamu Jeannette Kagame akurikiye ibiganiro
Madamu Jeannette Kagame mu ifoto y'urwibutso hamwe n'abayobozi ba Kiliziya Gatolika
Padiri Ubald Rugirangoga ashyikiriza Madamu Jeannette Kagame igitabo cye Forgiveness Makes You Free
Madamu Jeannette Kagame aganira na Arkiyepiskopi wa Kigali Antoine Kambanda

Amafoto: Muhizi Serge

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
KAMUZINZI 2019-12-01 23:48:17

Ni ukuguma mu bunyarwanda, nta kurangara kuko Vatikani ifite pilitiki irenze. Ni ugukanura amaso n’amatwi by’umutima

2
KAMUZINZI 2019-12-01 23:48:16

Ni ukuguma mu bunyarwanda, nta kurangara kuko Vatikani ifite pilitiki irenze. Ni ugukanura amaso n’amatwi by’umutima

3
Mukristo 2019-11-30 23:42:13

@atos Ibyo uvuze ni ukuri gusa hari icyo ukwiriye gutandukanya Umuremyi waremye ijuru n’isi cyangwa ubukristu ntaho bihuriye na Kiliziya Gaturika, kuko nkuko wabivuze Kiliziya ni bwa butegetsi bw’Abaromani bwakomeje gahunda yabwo yo kwigarurira isi nkuko yari isanzwe iriho mu mbaraga za gisirikare na politiki ariko ibyo binaniwe bahitamo kubinyuza mu iyobokamana, rero gufata amakosa ya Kiliziya y’iroma ukayagereka ku bukristo aho uba wongeye kwibeshya kabiri, ibyakozwe na Kiliziya nko kurera Parmehutu na za curriculum zirimo amacakubiri zigishwaga mu mashuri n’ingengabitekerezo ya Genocide nibibazwe Kiliziya Gaturika y’i Roma kuko ariyo yatumye ba Perodin na Classe n’abandi nkabo, ariko byigerekwa ku bukristo kuko bwatangiye mbere y’uko kiliziya itangira sinzi rero uko byahuzwa, ibyo byaba ari ukongera kuyobya abanyarwanda kabiri. Bibiliya ntaho ihuriye na Kiliziya Gaturika y’i Roma, yaje iyisanga kandi izagenda iyisige, habe n’abo bayahudi uvuga bakwijwe imishwaro n’abasirikare b’Abaroma nyuma yo kubica urwagashinyaguro mbere y’uko iyo Kiliziya Gaturika ibaho. Rero ntikwiriye kwitiranywa n’Ubukristu kuko bwo bufite Ijambo ry’Imana ribuyobora ariyo Bibiliya, naho Kiliziya Gaturika y’i Roma ikagira nayo amahame yayo ayiyobora ihabwa na Vatican

Yesu yaravuze ngo amagambo yanjye ntabwo azavaho n’inyuguti imwe

4
Eric 2019-11-29 17:40:37

Uzi ko hari abantu bazi ko ibi bikorwa byateguwe na leta igatumira Kiliziya, nyamara ahubwo ari Kiriziya yabiteguye igatumira Leta? Ari Leta se, muyobewe ko guhuza ibikorwa byari kuba ibya Fideli? Mwabonye se atari umutumirwa?

5
Atos 2019-11-29 15:51:57

Nta na rimwe nzibagirwa ko Kiriziya Gatolika yinjije abakoroni bakaroga umuryango nyarwanda
Nta na rimwe nzibagirwa ko Kiriziya Gatolika yacuze kandi ikarera Parimehutu n’ amacakubiri mu maseminari (nange ni ho nize)
Nta na rimwe nzibagirwa ko Kiriziya Gatolika kuva ku gihe cy’ abaromani yahisemo gukina politiki n’ ubutegetsi aho kuyobora ukwemera
Nta na rimwe nzibagirwa ko Imana y’ i Rwanda ntaho ihuriye n’ Imana y’ Abayahudi (ngo ifuha, ihora, ...n’ andi manjwe)

Ariko usibye ibyo ntazibagirwa, niba bahisemo kubaka u Rwanda, nta kindi nzabashinja !

6
padiri Anicet Ndazigaruye 2019-11-29 13:46:22

Nyagasani Yezu tugire abagabuzi b’AMAHORO yawe maze ahari urwango tuhashyire URUKUNDO. (Isengesho rya Mutagatifu Fransisko wa asize).

7
Habana Eric 2019-11-29 11:07:40

Ubumwe n’ubwiyunge ni umusingi w’iterambere mu buzima bw’igihugu bwose, dushimiye Nyakubahwa Madame Jeannette Kagame hamwe na Kiliziya Gatolika mu musanzu ugaragarira bose mukubaka no gusana imitima y’abanyarwanda yashegeshwe na Genocide n’ubutegetsi bubi. Imana ibagende imbere

8
Mary 2019-11-29 10:42:57

Izi mpanuro Kiliziya yahawe izikurikije, u Rwanda rwaba paradizo ndababwiye! Mbega speech nziza yuje ubwenge n’impanuro??! Murakoze cyane First lady wacu natwe twigiyemo byinshiiii!! Ni ukuri President na First Lady bacu ni umugisha Imana yatwihereye. Ubuse ni nde utaba inspired koko? Ibikorwa byabo, speech yuje impanuro n’ubwenge,....njye mbura amagambo yasobanura uburyo banyubaka mu buzima bwanjye bwa buri munsi, batuma mparanira kuba the best I can be, ntago ndabigeraho ariko ndabiharanira. Imana ibaturindire bakomeze batubere role models!!! Ndabakunda bihebuje!

Kwamamaza