Leta yahombye asaga miliyari 4 Frw kubera abarwayi bambuye ibitaro kuva mu 2014

3 11-07-2018 - saa 15:47, Akayezu Jean de Dieu

Minisiteri y’Ubuzima mu Rwanda (MINISANTE), yatangaje ko mu myaka ine ishize imaze kwamburwa amafaranga asaga miliyari enye z’amafaranga y’u Rwanda (4.400.000.000 Frw) n’abarwayi barimo abivuza bagatoroka ibitaro n’ababigana badafite ubwisungane mu kwivuza bamara guhabwa ubuvuzi bakabura ubwishyu.

Ni igenzura Minisante iherutse gukora aho ryagaragaje ko abaturage bamaze kwambura amavuriro, ibigo nderabuzima n’ibitaro bya Leta biganjemo abadafite mitiweri n’ubundi bwishingizi bwo kwivuza.

Mu kiganiro yagiranye na IGIHE, Umuvugizi wa Minisiteri y’Ubuzima, Kayumba Malick, yavuze ko hari ibitaro byambuwe akayabo atanga urugero ku bya Muhima byambuwe 26.440.000 Frw.

Yagize ati “Nko mu bitaro bya Muhima mu mwaka umwe byonyine dufite amadeni agera kuri miliyoni zirenga makumyabiri n’esheshatu (26. 000. 000 Frw), ni amafaranga menshi cyane ku mwaka umwe.”

Ibi bitaro ni bimwe mu byakira abarwayi benshi bo mu Mujyi wa Kigali, biganjemo abagore bagiye kubyara n’abandi baba bakoze impanuka zo mu muhanda.

Muri Kanama 2017 ubwo IGIHE yaganiraga n’ubuyobozi bwabyo, aho byagaragaje ko mu mezi abiri gusa byari bigiwemo umwenda ungana na 6.963.680 Frw. Abenshi mu bari babibereyemo umwenda ni abagore baba bagiye kubyara n’abandi baba babigannye kubera ibibazo byo mu nda bifitanye isano n’urubyaro.

Kayumba yagiriye inama abagana ibitaro ko bakwiye kuzirikana ko mu gihe batishyuye biteza igihombo kandi gishobora nacyo kuganisha ku bindi bibazo byagira ingaruka ku bantu benshi.

Ati “Kuko abaturage baba bakwiye kumenya ko ibitaro bitagomba guhomba, biba bigomba kubona amafaranga kugira ngo nabyo bibone imiti bitange serivisi nziza.”

Malick yakomeje avuga ko abadafite mitiweri aribo bakunze kubura ubwishyu ku bitaro. Ati "Ahanini abantu benshi bahura n’icyo kibazo ni ababa babyaye kandi batwaye inda zidateganyijwe barimo abakiri bato n’ababyara benshi cyane batabona ubushobozi bwo gutangira mitiweri”

Gusa ariko nubwo hari ababura ubwishyu bw’ibitaro mu gihe barwaye, ngo ntawe bijya byanga kwakira ngo avurwe kuko ‘n’ubwo basanga adafite ubushobozi bwo kwishyura leta yashyizeho ibintu byose bishoboka kugira ngo ifashe ba bandi batishoboye’.

Umuntu bigaragaye ko abuze ubwishyu kandi atari mu bo leta ishobora kwishingira kubera amikoro make nk’abari mu cyiciro cya mbere cy’ubudehe, ‘ahabwa amahirwe akagirana amasezerano n’ibitaro akitahira akazajya yishyura mu byiciro ari mu rugo iwe’.

Mu ngamba bafite kuri aya mafaranga abarwayi bahombya Leta, Malick yavuze ko bagerageza gukangurira abaturage kumenya akamaro ko gutanga mitiweri kandi bakibuka kugana serivisi zo kuboneza urubyaro zitangirwa hirya no hino ku bitaro.

Inkuru bifitanye isano:Mu gihe kitageze ku mezi abiri, abarwayi bambuye ibitaro bya Muhima asaga miliyoni esheshatu

Umuvugizi wa Minisiteri y'Ubuzima, Kayumba Malick, yavuze ko abarwayi bamaze kwambura miliyari enye mu myaka ine ishize
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
ukuri 2018-07-12 14:37:27

hhh kandi nirirwa numva ko mu bitaro byinshi bafunga cg ntibavure udafite ubwishingizi cg amafaranga yo kwivuza !! Akanagera aho agwa mu bitaro !! Kugeza naho minisitiri w’ubuzima yagiye mu bitaro kwirebera uburyo abatishoboye batereranywa n’abaganga none ngo miliyali zahombejwe nabambura ibitaro!!!??? Hhh koko iyipfushije ntawutayiryaho

2
Jean 2018-07-11 15:57:16

Inshuro nyinshi usanga Atari ukwambura ibitaro ahubwo abarwayi baba babuze ubwishyu kubera ubukene. Gukena si icyaha baba bakoze. Numva imbaraga zajya zishyirwa mu kubakangurira kugura ubwishingizi kugira NGO bigabanye ibibazo kuko usanga abarwayi bari na services babura kubera ko nta bwishingizi bafite.

3
Philos 2018-07-11 10:13:08

Ndumva ntagihombo kirimo kuko abavuwe nabaturage b’u rwanda

Kwamamaza