IGIHE

Kiliziya Gatolika yasabiye abahamijwe Jenoside bageze mu zabukuru n’abarwaye koroherezwa ibihano

136 10-04-2019 - saa 12:58, Cyprien Niyomwungeri

Abepiskopi Gatolika bo mu Rwanda, basabye ko harebwa uburyo abafungiye icyaha cya Jenoside bageze mu zabukuru n’abafite indwara zitandukanye, bakoroherezwa ibihano ariko kandi na bo bagakomeza kwinjira muri gahunda yo gusaba imbabazi no kwiyunga n’abo bahemukiye.

Ni mu butumwa Abepiskopi Gatolika bo mu Rwanda bageneye abakristu mu Kwibuka ku nshuro ya 25, Jenoside yakorewe Abatutsi mu 1994, bwasomwe muri Kiliziya zose zo mu gihugu ku wa 7 Mata 2019, umunsi abanyarwanda n’inshuti zabo batangiriyeho icyumweru cy’icyunamo.

Muri iyi baruwa yasinyweho n’Abepiskopi bose, bavuga ko muri iyi myaka ishize, batahwemye gushishikariza abagize uruhare muri jenoside kwicuza no gutinyuka gusaba imbabazi, bagashimira ababishyize mu bikorwa kuko byababohoye, bikorohereza ubuzima n’abo bazisabye.

Bashimira kandi abatanze imbabazi kuko na bo byababohoye, biborohereza ibikomere ku mutima, kandi bibegereza Imana n’abavandimwe babo babahemukiye.

Abepiskopi bakomoza ku bari mu magereza kubera inkurikizi za Jenoside yakorewe Abatutsi, barimo abageze mu zabukuru n’abafite indwara zitandukanye, bagasaba ko harebwa uko boroherezwa ibihano.

Bagira bati “Hariho kandi n’abari mu magereza kubera inkurikizi za jenoside yakorewe Abatutsi, harimo abageze mu zabukuru n’abafite indwara zitandukanye. Aba bantu bagomba gufashwa, ‘hakanarebwa uburyo bakoroherezwa ibihano’; ariko kandi na bo bagakomeza kwinjira muri gahunda yo gusaba imbabazi no kwiyunga n’abo bahemukiye”.

“Tubabazwa kandi no kumva ko hari abashyizwe mu kato n’imiryango bakomokamo itakibasura. Turashimira amatsinda y’abakristu abagoboka dukangurira abakristu bose kutabatererana”.

IBUKA yasabye ko hakurikizwa amategeko

Umuryango uharanira inyungu z’abarokotse Jenoside yakorewe Abatutsi, IBUKA, usanga ubusabe nk’ubu butari bukwiye mu gihe cyo kwibuka, ugasaba ko icyasuzumwa cyose cyakurikiza amategeko kuko hari uko bisanzwe bikorwa cyane cyane mu mbabazi za Perezida wa Repubulika.

Umuyobozi ushinzwe ubutabera muri IBUKA, Jean Damascène Ndabirora Kalinda, yabwiye IGIHE ko abasabirwa koroherezwa ibihano ibyaha bakoze babihamijwe n’inkiko zibifitiye ububasha kandi n’inzira zigena ukurekurwa kwabo zigenwa n’amategeko, bityo ko ari yo akwiye gukurikizwa.

Ati “Uko abantu barekurwa bageze mu zabukuru byagiye bikorwa kenshi n’ubundi cyane cyane mu mbabazi za Perezida wa Repubulika, amategeko yashishoza akareba aho bikwiye bigakorwa ariko atari ukugendera gusa ko ari uko ari abakristu cyangwa ari abandi bantu badasanzwe, kuko ikirebwa iki gihe ntabwo ari umuntu harebwa icyaha umuntu yakoze, uburemere bw’icyaha umuntu yakoze n’igihano yahawe, hakarebwa inzira z’uko abantu barekurwa ibindi bikarebwa n’inzego zibifitiye ububasha”.

Ndabirora avuga ko ibi ‘bitaba ubukangurambaga abantu bakwiye gutangira ngo bavuge ngo muturekurire aba bantu kuko bimeze gutya’.

Ati “Twasaba ko hakurikizwa icyo amategeko ateganya, tugasaba ko bikorwa mu bushishozi”.

Impungenge kuri CNLG

Leta y’u Rwanda imaze igihe itangiye gahunda yo gufungura abasaza bari muri gereza, kuko akenshi usanga ubuzima bwabo bugoye, ndetse bamwe batacyumva cyangwa ngo babone.

Gusa hari abagororwa bakoze Jenoside kandi bari mu cyiciro cy’abakuze bagitsimbaraye, aho bari bagakomeza kuyikwirakwiza n’ubuyobozi bwa gereza bubizi nubwo butabura gukomeza kubagorora.

Mu 2016 ubwo CNLG yibukaga imiryango y’abakozi bayo yishwe muri Jenoside yakorewe Abatutsi mu 1994, Umunyamabanga Nshingwabikorwa wayo, Dr. Jean Damascène Bizimana, yashimye iyi gahunda yo gufungura abasaza ariko avuga ko abagifite ingengabitekerezo bakwiye kuguma muri gereza.

Yatanze urugero rw’uko yagiye muri gereza ya Muhanga akabwirwa ko hari umuntu w’umu-parmehutu uhafungiwe batumvikana mu byo avuga, byanatumye asubirayo kumuganiriza.

Yavuze ko uwo mugabo yasanze muri gereza ya Muhanga ari“umusaza waheze mu buriri ariko ingengabitekerezo irajojoba.”

Uwo musaza ngo yavuze ko amakosa bakoze bayemera, ariko ko ahanini byaturutse ku kuba barishe Abatutsi mu 1959 ntihagire ubakurikirana, mu 1963 ntihagira ubavuga, yemwe no mu 1973 ntawamukurikiranye, bityo ngo no mu gihe Habyarimana yapfaga ntiyari kuzuyaza.

Uyu musaza ngo yasoje avuga ko yisaziye ndetse bakwiriye kumufungura agataha.

Dr Bizimana yavuze ko yabuze icyo amusubiza, ariko aza kubiganiriza bamwe mu bayobozi ababwira ko ‘kiriya kintu dukora cyo gufungura abasaza ni cyiza kuko abasaza iyo bari muri gereza batwara imiti, barahenda, rimwe na rimwe ugasanga n’uwo muntu kumurekera muri gereza aryamye atacyumva ntacyo bimaze.’

Icyakora yakomeje agira ati “Umuntu nk’uriya uri i Muhanga kumufungura agasubira mu buzukuru be, agasubira mu baturanyi ni ukuroga sosiyete. Bene nk’uwo ufite ingengabitekerezo nk’iyo nitumureke apfire aho ari, ayihamane mu mutima, nishaka imuhonyore, ariko twoye kumujyana kuturogera abaturage no kuturogera abana.”

Dr Bizimana avuga ko bigomba kwitonderwa kuzana umuntu wakoze Jenoside muri sosiyete.

Ati “Benshi muri abo basaza usanga ari bantu bishe kuva kera mu 1959, 1963, 1973 baragize uruhare mu kwica abatutsi mu 1994 na bwo barica. Jye ndababona nk’uburozi muri sosiyete, bagombye gukomeza kugororwa ntibashyirwe ahantu bazaza kwangiza abanyarwanda.”

Abepiskopi Gatolika bo mu Rwanda basabye ko abageze mu zabukuru n'abarwaye indwara zitandukanye bahamijwe ibyaha bya Jenoside boroherezwa ibihano
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3 | 4 | 5 | 6 | 7 | 8 | 9 | ... | 14  

1
Kumiro 2019-04-16 03:27:37

Ese ko Kiliziya Gatulika tutarumva isabira abagizwe Inshike na Jenoside yakorewe abatutsi kubakirwa cyangwa guhabwa ubundi bufasha ubwo ari bwo bwose? Indyandya mu ndyadya.

2
Kumiro 2019-04-16 03:27:37

Ese ko Kiliziya Gatulika tutarumva isabira abagizwe Inshike na Jenoside yakorewe abatutsi kubakirwa cyangwa guhabwa ubundi bufasha ubwo ari bwo bwose? Indyandya mu ndyadya.

3
Lll 2019-04-13 12:50:17

Abanabo sibyo babamo,abobishe se ntibari abasaza nabakecuru?mubavugira c? Nkande bige kubyanyu ahubwo

4
Lola 2019-04-13 11:42:27

U Rwanda ni urw abanyarwanda bose. Uwumva atarubanamo n abandi banyarwanda niwe ukwiye kuva mu bandi akajya aho ashatse. Qui se sent gêné quitte la place.
Naho Kiliziya Gatolika, yatangira guhunda yo gutanga penetensiya mu ma Gereza, abafite ibyaha bakicuza nta kubeshya.

5
Emmy 2019-04-12 23:50:27

@KAGUTA

6
Emmy 2019-04-12 23:41:51

@KAGUTA

7
Emmy 2019-04-12 23:11:32

@KAGUTA

8
knw where u belong 2019-04-12 14:38:40

kiliziya gatolika yari ikwiye gusaba imbabazi kubwijambo ivuze mu bihe nkibi byo kwibuka kubera ni umva ko ibijyanye ni ubutabera atari inshingano ikwiye kwibutsa abo zireba icyo ni kimwe kiliziya gatolika yari ikwiye gufasha abacitse kwicumu kongera kwiyubaka byimazeyo ikongera imbaraga mu kwigisha abahakana nabapfobya genocide yakorewe abatutsi kandi vuba ndizera haricyo bazabikoraho

9
Silent 2019-04-12 14:18:26

Eh! Mbega comments nyinshi hano!!! Amazina y’abazishyiraho nayo ateye kwibaza; ibaze nko kwiyita "Kaguta" vraiment!!!

10
Tony 2019-04-12 12:52:14

Gilbert wanditse kuri igitabo cya Daniel ni byahishuwe in relation to the Catholic church hano muri comments ndifuza kuganira nawe. Abishoboye ya nyoherereza message kuri WhatsApp kuri 254791801993.

Paji: 1 | 2 | 3 | 4 | 5 | 6 | 7 | 8 | 9 | ... | 14  

Kwamamaza