IGIHE

Kigali: Hagaragajwe sitasiyo moto zikoresha amashanyarazi zizajya zifashisha

14 8-10-2019 - saa 19:29, Thamimu Hakizimana

Ikompanyi yitwa Safi Ride E-mobility, yerekanye sitasiyo zizajya zifashishwa mu gusharija moto zikoresha amashanyarazi igiye kuzana mu Rwanda.

Kuri uyu wa Kabiri Safi Ride E-mobility izajya izana moto zikoresha amashanyarazi yagaragarije abanyarwanda batandukanye izi sitasiyo inasobanura uko izo moto zikora.

Izi moto zikoreshwa amashanyarazi zisharijwa iminota iri hagati ya 45 na 50 ndetse iyo bateri zazo zuzuyemo umuriro zibasha kugenda ibirometero 90 byose umuriro ukirimo.

Umuyobozi wungirije wa Safi Ride E-mobility, Niyonkuru Christella, yavuze ko bateganya kuzana moto 60 mu mpera z’uku kwezi.

Yagize ati “Moto zacu zishobora kugenda kugeza ku birometero 90, hanyuma bateri yazimye ushobora kuyisharija iminota 45 kugira ngo yuzure kandi iyo yuzuye igenda idahagaze kugeza ku birometero 90.”

Yakomeje avuga ko moto bazazana mu mpera z’uku kwezi bazazishakira abamotari bazitwara, nyuma akaba ari bwo bazazana izindi nyinshi.

Niyonkuru yongeyeho ko bateganya gushyiraho sitasiyo nyinshi z’izi moto zizajya zikoresha amashanyarazi mu Mujyi wa Kigali no mu ntara mu rwego rwo gufasha abazajya bazitwara.

Umuyobozi w’ikigo cyo kubungabunga ibidukikije (REMA) Eng. Collette Ruhamya, yavuze ko izi moto nizitangira gukoreshwa bizagabanya ikintu kinini mu bijyanye no guhumanya ikirere kuko mu nyigo bakoze basanze ibinyabiziga ari byo bihumanya ikirere cyane.

Yagize ati “Turabona harimo ikintu kinini bizagabanya cyane cyane nibyitabirwa n’abantu benshi kuko nababwiye ko inyigo twakoze nka REMA twasanze ibinyabiziga byanduza umwuka wacu duhumeka n’ikirere cyacu cyane cyane mu Mijyi kandi ari nabyo biri hejuru”.

Yongeyeho ko izi moto zikoresha amashanyarazi nizimara kuba nyinshi ndetse iyo gahunda ikagera no ku modoka, igihugu kizaba kigeze ku kintu kinini mu bijyanye no guhangana n’ibihumanya umwuka n’ikirere.

Ushinzwe ishami ryo gutwara abantu n’ibintu muri Minisiteri y’Ibikorwa remezo, Byiringiro Alfred, yemeza ko izi moto zikoresha amashanyarazi zizatanga umusaruro mwinshi mu bijyanye no kubungabunga ibidukikije.

Ati “Umusaruro wo ni mwinshi mu bushakashatsi bwakozwe bwagaragaje ko muri bimwe mu byangiza umwuka wo mu kirere duhumeka ibinyabiziga biza mbere kuko habanza ibyo guteka kuko turacyatekesha inkwi n’ibyatsi, ubwo rero kuba tugiye kubigabanya tukava ku moto kandi muzi ko mu Rwanda dufite moto zirenga ibihumbi 100 nkeka ko hari umusaruro bizatanga.”

Moto zigiye gutangira gukoreshwa mu Rwanda nyuma y’aho Perezida Kagame ubwo yari mu biganiro bihuza urubyiruko rw’imbere no hanze y’igihugu, bizwi nka ‘Meet the President’ yavuze ko hari umushyitsi wasuye u Rwanda baganiriye, amugezaho igitekerezo cyo gukoresha moto z’amashanyarazi.

Abamotari bagaragaje amatsiko y'uburyo izi moto zizajya zongerwamo umuriro
Aho bongerera umuriro muri moto z'amashanyarazi
Imiterere ya moto zikoresha amashanyarazi
Uko zongerwamo umuriro
Umuyobozi wa REMA, Eng Ruhamya avuga ko izi moto zizarengera ibidukikije
Niyonkuru Christella avuga ko muri uku kwezi bazazana moto 60
Ushinzwe ishami ryo gutwara abantu n’ibintu muri Minisiteri y’Ibikorwa remezo, Byiringiro Alfred, avuga ko izi moto zizagabanya ihumana ry'umwuka

Amafoto: Niyonzima Moise

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
Sam 2019-10-11 00:00:23

Hazashatswe uburyo iyo Battery yazajya isharizwa na moto ubwayo iri kugenda cyangwa ubundi buryo yazajya ishyirwamo umuriro nka cashpower bidatwaye iyo minota yose

2
Natal 2019-10-09 23:23:22

Ibitekerezo ni cyiza ariko 45 mins yo guhagarara ucharging battery harimo ikibazo. Uramutse utwaye umugenzi wihuta yavaho akitegera indi ubwo ukaba udahombye? Byari kuba byiza nibura bazanye izinywa ibindi bidahumanya ikirere ariko motard ntarenze nibura 2 min kuri station.

3
alpha 2019-10-09 14:56:25

njye nazikunze ahubwo zize vuba

4
mironko patrice 2019-10-09 06:41:18

Ni byiza ko turengera ibidukikije natwe twirengera ariko dukore step by step hato tudahutaza n’uburyo twari dusanganywe.

Njye natanga inama ko bahera ku bantu ku giti cyabo byagenda neza bakazimukira kuri taxi moto.Hagati aho wenda n’igihe cyo gusharija cyaba cyagabanutse ndetse n’izindi brands zageze ku isoko.

5
fidel 2019-10-09 05:22:17

Please , ntabwo uzajya utegereza ahubwo uzajya uhasanga iyuzuye.

6
#gukunda igihugu# 2019-10-09 03:50:28

iki gitekerezo ni cyiza cyane ariko bazabirebe neza kuko hari ubwo ukemura ikibazo ukaba uteje ikindi .uti gute? i burayi baciye ibinyabiziga bimwe na bimwe abantu bagendera kuri trautinette electrique. utu ni utuntu bagenderaho tujya kumera nk’igare.
ubu kumugoroba aho ukandagiye hose mwiyo mijyi uhasanga trautinette abantu bagenda begeranya kugira ngo zige gusharijwa(kongeramo umuriro) babirebe batazatera mobilette pollution ugasanga ni nyinshi cyane kuburyo nabyo byanduza umujyi.
ikindi ziriya baterrie sinzi niba zikoresha lithium bazarebe environment assesment nizisaza zizajya zijyahe?...igitekerezo cyanjye mugihe agaciro.

7
nura 2019-10-09 00:56:39

Ikibazo kibidukije cyane ibihumanya ikirere bisaba ko ibihugu byishyira hamwe cyane ibyegeranye kuko ikirere cyu Urwanda kidahumanyijwe nibituruka mu gihugu cyahumanywa nibituruka mubihugu duturanye. Iyi initiative ninziza ariko ikwiriye no kuganirwaho kurwego rwimiryango mpuzamahanga nka EAC na CONGO wenda byagira akamaro gafatika naho ubundi Impact izaba nto cyane.

8
John 2019-10-09 00:48:53

Byari byiza
Ariko umumotari ugenda 90km agaparika 50 minites ategerje ko batiri yuzura... Aho harimo akabazo

9
Peter 2019-10-09 00:33:21

Iyi minota umara (iminota 45) usharija battery ni myinshi bazareba uburyo yagabanyuka, naho ubundi birakemura ikibazo cy’ibidukikije

10
L’Ohm 2019-10-08 23:02:45

Moto bayicaginga iminota 45 ikuzura ubwabyo 45 min kuri chargeur ni myinshi ibaze umuntu ugiye gushaka amanyarwanda akamara iminota 45 ategereje ko moto yuzura !!!
Moto iruzuye umuriro imaze iminota 45 yose ihagaze ( reka tuvuge isaha), noneho igiye mu kazi igomba gukora 90 kms ( urugendo rwa Kigali -Muhanga kugenda no kugaruka soit 2hours), zonyine harya ubwo iyo moto yaba ikora ikazagira icyo icyura ra ?! Niba mu masaha 3 igomba guhagararamo imwe ngo yuzuze umuriro na none?! Nizere ariko ko zigira na break-down kuko abo umuriro uzashiriraho si bakeya !!!
Gusa igitekerezo ubwacyo ni kiza peee ariko gikeneye kunozwa kurushaho turebye neza situation y’imikorere mu Rwanda , kuko simpamya ko dukeneye isaha imwe y’ikiruhuko buri masaha atatu

Paji: 1 | 2  

Kwamamaza