IGIHE

Kaspersky yagiriye inama ibihugu birimo u Rwanda bishaka guhangana n’ibitero by’ikoranabuhanga

0 14-05-2019 - saa 19:38, Ferdinand Maniraguha

Eugene Kaspersky, Umuyobozi Mukuru wa Sosiyete yo mu Burusiya ikora ubwirinzi bw’ibitero byifashisha ikoranabuhanga, Kaspersky Lab, yagiriye inama ibihugu bya Afurika yo kubaka ibikorwa remezo bihagije bifite ubushobozi bwo kutinjirirwa n’abagizi ba nabi.

Ibihugu byinshi cyane ibifite ubushobozi buke bigabwaho ibitero by’ikoranabuhanga buri munsi bimwe bikangiza, ibindi bigakumirwa.

Mu 2017, ubujura bwifashisha ikoranabuhanga bwahombeje Isi miliyari zigera kuri 600 z’amadolari. Byitezwe ko nihadafatwa ingamba zikomeye ubwo bujura buzaba bumaze guhombya Isi tiliyari esheshatu mu mwaka wa 2021.

Ku munsi wa Kabiri w’inama yiga ku mutekano iri kubera mu Ishuri Rikuru rya Gisirikare i Nyakinama mu Karere ka Musanze, haganiriwe ku ngamba zo kurwanya iterabwoba ryifashisha ikoranabuhanga.

Eugene Kaspersky umwe mu batanze ikiganiro, yavuze ko ibitero byifashishije ikoranabuhanga bikomeje kwiyongera ku Isi ku buryo hakenewe ingamba zihuse kandi zirambye.

Yatanze urugero ko muri Kaspersky Lab buri munsi bagabwaho ibitero bisaga 350,000.

Yavuze ko ibyaha by’ikoranabuhanga byabaye ubucuruzi bwubatse neza kandi bufite abaterankunga bakomeye ku buryo kuburwanya bisaba imbaraga zikomeye.

Yagize ati “Ikibazo gikomeye ni uko hari inzobere z’urubyiruko muri ibi byaha by’ikoranabuhanga kandi ubunararibonye bwabo bwiyongera umwaka ku mwaka. Ikindi ni uko aba banyabyaha bari mu dutsiko dukomeye tw’abanyabyaha kandi bakoze n’amashyirahamwe.”

Yakomeje agira ati “Tubona za Leta zishyigikora ibyo bitero, hari ibihugu byinshi biri muri uyu mukino. Bamwe ni abacancuro babyo, baguha amafaranga, ugakora ibyo bashaka.”

Kaspersky yavuze ko kubera internet n’inzego z’umutekano bitazorohey kumenya aho ibitero runaka byaturutse.

Yavuze ko mu guhangana n’ibyo bitero, igisabwa ari uko ibihugu byubaka ubwirinzi bukomeye ku buryo bizahenda ushaka kubusenya.

Ati “Bitandukanye n’intambara za kera aho wamenyaga uti igisasu kivuye hakurya hariya. Bifata igihe ngo umenye uwabikoze. Nkeka ko uburyo bwiza bwo kwirinda ari ukubaka ibikorwa remezo bidashobora kwinjirirwa ku buryo bizagera kuri rwa rwego ushaka kwinjirira amakuru bizaba bimuhenze kurusha amakuru ashaka kwangiza.”

Umunyamabanga Mukuru w’Urwego rw’Igihugu rw’Iperereza n’Umutekano w’Igihugu, Gen. Maj. Joseph Nzabamwita, yavuze ko kuri ubu inzego z’umutekano zifite ikibazo gikomeye cyane mu guhangana n’abaketsweho iterabwoba ryifashisha ikoranabuhanga.

Yavuze ko amategeko ahana ibyaha byifashishije ikoranabuhanga atariho ndetse n’abakora mu rwego rw’ubutabera badafite ubumenyi buhagije mu by’ibyaha by’ikoranabuhanga.

Yagize ati “Amategeko dufite ntabwo atworohereza gukora neza akazi kacu ko kurinda abaturage. Dufata abanyabayaha bakarekurwa. Iyo bigeze ku iterabwoba ho byinshi ntibizwi. Abantu benshi ntibabizi haba mu bakora igenamigambi, abashyiraho amategeko, mu butabera.”

Yavuze ko “ibikwiriye gukorwa icya mbere ni ugushyiraho amategeko ajyanye n’ibibazo biriho kuko amategeko asanzwe dufite ntabwo ari gukemura ibibazo dufite. Urwego rw’ubutabera narwo rugomba kwigishwa.”

Umuyobozi wa Smart Africa, Dr Hamadoun Touré, yavuze ko Afurika by’umwihariko ikeneye kubaka ibikorwa remezo bikomeye ndetse no guharanira ko ububiko bw’amakuru y’abanyafurika abikwa kuri uwo mugabane aho kuyabika hanze nkuko biri ubu.

U Rwanda ni urwa 76 ku Isi mu bihugu byibasirwa n’ibitero by’ikoranabuhanga nkuko byatangajwe na Sosiyete icuruza ubwirinzi mu by’ikoranabuhanga, Kaspersky.

Kaspersky yavuze ko kubera internet n’inzego z’umutekano bitazoroheye kumenya aho ibitero runaka byaturutse
Umunyamabanga Mukuru w’Urwego rushinzwe umutekano, Gen. Maj. Nzabamwita Joseph atanga ibitekerezo muri iyi nama
Ku munsi wa Kabiri w’inama yiga ku mutekano iri kubera mu Ishuri Rikuru rya Gisirikare i Nyakinama mu Karere ka Musanze, haganiriwe ku ngamba zo kurwanya iterabwoba ryifashisha ikoranabuhanga
Umugaba Mukuru w'Ingabo z'u Rwanda, Gen Patrick Nyamvumba (iburyo) ni umwe mu bakurikiranye ikiganiro ku byaha byifashisha ikoranabuhanga
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza