Julian Assange washinze wikileaks yahawe ubwenegihugu bwa Equateur

2 11-01-2018 - saa 21:32, Rabbi Malo Umucunguzi

Leta ya Equateur yahaye ubwenegihugu Julian Assange washinze urubuga rwa WikiLeaks rwamenyekanye mu gushyira ku ka rubanda amabanga y’ibihugu, nyuma y’imyaka itanu yibera muri Ambasade y’icyo gihugu i Londres mu Bwongereza.

Minisitiri w’Ububanyi n’Amahanga wa Equateur , Maria Fernanda Espinosa, mu kiganiro n’abanyamakuru mu murwa mukuru Quito kuri uyu wa Kane, yatangaje ko igihugu cye cyahaye Assange ubwenegihugu kuwa 12 Ukuboza 2017 nyuma y’ubusabe bwe, mu gihe bagishakisha uburyo burambye bwo gukemura ikibazo cye.

Equateur yahaye Assange ubuhungiro bwa politiki ubwo yayiganaga muri Ambasade yayo mu Bwongereza mu 2012, ahunga koherezwa muri Suède mu iperereza ku byaha byo gufata ku ngufu, ibyaha we ahakana.

Suède yaje gukuraho ibyo birego ariko Assange aguma muri iyo Ambasade kuko u Bwongereza bukimushakisha, cyane ko yahunze akimara kurekurwa by’agateganyo hatanzwe ingwate, mu gihe haburanwaga niba yakoherezwa aho bikekwa ko yakoreye icyaha.

U Bwongereza kuri uyu wa Kane bwatangaje ko butahaye agaciro ubusabe bwa Equateur yasabaga ko Assange ahabwa uburenganzira nk’umudipolomate, bwashoboraga kumuhesha ubudahangarwa bwo kudatabwa muri yombi.

Umuvugizi wa Minisiteri y’Ububanyi n’Amahanga yagize ati “Guverinoma ya Equateur iheruka gusaba ko Assange ahabwa uburenganzira bw’umudipolomate hano mu Bwongereza.”

Yakomeje agira ati "U Bwongereza ntabwo bwemeye ubwo busabe, nta n’ubwo turi mu biganiro na Equateur kuri iyi ngingo. Equateur izi neza ko uburyo bwo kurangiza iki kibazo ari uko Julian Assange yava muri Ambasade akagezwa imbere y’ubutabera.”

Assange w’imyaka 46 akomoka muri Australia, anatinya ko ashobora kohereza muri Leta Zunze ubumwe za Amerika nazo zimukeneye ngo abazwe ku mabanga y’igisirikare n’ay’igihugu yashyizwe hanze na WikiLeaks mu 2010.

Julian Assange ku ibaraza rya Ambasade ya Equateur mu Bwongereza
Minisitiri w’Ububanyi n’Amahanga wa Equateur, Maria Fernanda Espinosa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
dunia 2018-01-11 15:32:36

Mbega tekinike!baramukiniye daa!wend har icyo bizatanga

2
De wae 2018-01-11 14:33:34

Ntabwo ari equateur ni Ecuador,

Kwamamaza