Isabelle Kamariza yahembwe n’Umwamikazi w’u Bwongereza ku bwo kwita ku barwayi

5 4-06-2018 - saa 20:38, Cyprien Niyomwungeri

Kamariza Isabelle yahembwe n’Umwamikazi w’u Bwongereza, Elisabeth II, kubera ibikorwa by’indashyikirwa akora byo gufasha abarwayi batagira kivurira mu bitaro kubona amafunguro no kubakemurira ibindi bibazo bahurira nabyo mu bitaro mu Rwanda.

Kamariza yashinze Umuryango w’Ubugiraneza ‘Solid Africa’, aho ukorera ibi bikorwa cyane cyane mu bitaro bya Kaminuza bya Kigali (CHUK) n’ahandi.

Iki gihembo kizwi nka ‘Commonwealth Point of Light award’ gihabwa abakoranabushake bo mu bihugu 53 bigize Umuryango w’ibihugu bikoresha Icyongereza, bagashimirwa ibikorwa bidasanzwe bakoreye abaturage mu gihugu bakomokamo no hanze yacyo.

Umuryango Solid Africa ukora ibikorwa by’ubugiraneza birimo kwishyurira abarwayi baba barabuze ubwishyu bw’ibitaro, kubaha amatike abasubiza iwabo, kubaherekeza bagategerwa imodoka kuko usanga abenshi baba barageze i Kigali batwawe n’imbanguriragutabara, ugasanga ntibazi aho bategera imodoka ibasubiza iwabo.

Itangazo rigenewe abanyamakuru rya Guverinoma y’u Bwongereza, rivuga ko Kamariza yegukanye igihembo kuri uyu wa Mbere kubera ibikorwa by’indashyikirwa akora birimo na gahunda yo kwegereza abarwayi amazi yo kunywa, imishinga yo kwita ku buzima ndetse no kugemurira abarwayi batagira kivurira cyangwa bakenewe kwitabwaho mu mirire.

Afite kandi imishinga irimo gushinga igikoni kigaburira abarwayi 1000 inshuro eshatu ku munsi mu bitaro bitatu byo muri Kigali. Ibi byose abigeraho abafatanyije n’abakorerabushake bagera kuri 50.

Nyuma yo kwegukana iki gihembo, Kamariza yashimiye abakorerabushake bamufasha kuva mu ntangiriro z’umuryango Solid Africa n’abandi barimo n’abanyamahanga bakomeje gushyigikira ibikorwa bye.

Yagize ati “Iki gihembo ni ikindi kimenyetso cy’uko tugomba gukomeza gukora ibyiza. Kubw’ubufasha bwanyu, tubasezeranyije gukomeza ibyo dukora ndetse no mu myaka iri imbere tukabyagurira mu gihugu cyose no hanze y’u Rwanda uko Imana izabishaka.”

Ambasaderi w’u Bwongereza mu Rwanda, Jo Lomas, yashimiye cyane Kamariza, avuga ko urugero rwe rw’indashyikirwa ari rwo rukwiye kuranga abantu.

Iki gihembo azagishyikirizwa ku wa 8 Kamena 2018, kuri Ambasade y’u Bwongereza i Kigali, akazagihabwa n’Ambasaderi w’iki gihugu mu Rwanda, Jo Lomas, nka kimwe mu bizaranga ibirori byo kwizihiza isabukuru y’amavuko y’Umwamikazi Elisabeth II.

Kuri uwo munsi Umunyarwandakazi, Mary Balikungeri washinze umuryango Rwanda Women’s Network (RWN), azerekana igihembo yahawe n’Umwamikazi w’u Bwongereza muri Mata uyu mwaka, ku bwo kwita ku bahuye n’ihohoterwa rishingiye ku gitsina.

Ibihembo bya Point of Light award bigamije gushimira abakorerabushake buri gihe bakora ibikorwa by’indashyikirwa muri sosiyete, kandi bikaba bishobora kumurikira abandi bakabigenderaho bashaka ibisubizo by’ibibazo byugarije abaturage mu gihugu cyabo no hanze.

Ibi bihembo byatangiye gutangirwa muri Leta Zunze Ubumwe za Amerika, ku ngoma ya Perezida George H.W Bush. Kugeza ubu abarenga 6000 bamaze kubihabwa muri iki gihugu.

Kuva mu 2014, Minisitiri w’Intebe w’u Bwongereza yashyizeho gushimira abakoze ibikorwa by’indashyikirwa mu Bwongereza aho abarenga 900 bamaze guhabwa igihembo cya Point of Light. Ibihembo bya Commonwealth Point of Light akaba ari urukurikirane rw’ibi bihembo.

Mu 2013, Kamariza yanahawe na Madamu Jeannette Kagame igihembo kigenerwa urubyiruko rw’indashyikirwa cya ‘Celebrating Youth Rwandan Achievers (CYRWA)’.

Kamariza Isabelle yagenewe igihembo n’Umwamikazi w’u Bwongereza, Elisabeth II
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
kamatari wa kamatari 2018-06-06 15:48:26

kamariza felicitation, tu merite, knd ukomezerezaho. Imana iguhe imigisha.Thanks

2
lg 2018-06-06 01:36:16

KAMAR IZA IMANA YAGUHAYE UWO MUTIMA IZANABIGUHEMBERA IZANAHEMBE ABABYEYI BAWE BAKWIGISHIJE URUKUNDO RURENZE URUGERO DUKWIYE KUMENYA IBYIZA BIKORWA NA BANA BACU MBERE YUKO BMENYWA NABANYAMAHANGA IBITANGAZAMAKU AHO GUTANGAZA IBIDAFITE UMUMARO BIJYE BIVUGA KUBIKORWA BYINDASHYIKIRWA NKIBI BINAKANGURURE ABANTU KUBITANGA MO INKUNGA BAFASHE UYU MUKOBWA ABO AFASHA, NABABYEYI NABAVANDIMWE BACU KAMARIZA IMANA IKURINDE

3
Good 2018-06-06 00:19:59

Uri indashyikirwa mukobwa mwiza komereza aho ureke abirirwa biyambitse ubusa ngo barerekana ibimero bidafite icyo bitumariye..

4
Intwali 2018-06-05 04:57:39

Bravo, wanduze abanyarwanda bose uyu mutima mwiza

5
Janvier twagirumukiza 2018-06-04 14:39:48

Imana ikomeze kumuba hafi,ibyo akora nibyiza rwose igihembo aragikwiye.

Kwamamaza