Intore z’u Rwanda zatunguye Arsenal mu myitozo, abakinnyi baca umugara (Video)

7 9-08-2018 - saa 13:34, Ferdinand Maniraguha

Mu ntangiriro z’iki cyumweru, abakaraza b’Abanyarwanda n’ababyinnyi bahamiriza batunguye ikipe ya Arsenal FC iri mu myitozo ku kibuga cya London Colney i Hertfordshire, bayikaragira umurishyo w’ingoma ari nako bavuna sambwe mu muhamirizo wizihiye abakinnyi nka Mesut Özil na bagenzi be na bo bagaca umugara.

Amashusho ikipe ya Arsenal FC, yashyize kuri Twitter yayo kuri uyu wa Kane, agaragaza intore Nyarwanda zambaye imigara, zihamiriza imbere y’abakinnyi ba Arsenal FC bitegura gutangira shampiyona ya 2018-2019, bakina na Manchester City kuri iki cyumweru tariki 12 Kanama 2018.

Ntabwo iyo kipe yatangaje umunsi byabereye ho gusa yavuze ko ari mu ntangiriro z’iki cyumweru ku kibuga cyayo cy’imyitozo.

Amagambo yaherekeje ayo mashusho yagiraga ati “Wari umunsi usanzwe turi myitozo. Ibi biza kuba (bashyiraho ingoa n’imirishyo). Rwanda, mwarakoze kuza kutureba.”

Amashusho agaragaza intore nyarwanda zikaraga umubyimba imbere y’abakinnyi ba Arsenal ndetse bamwe bari kuzifasha gukoma amashyi. Zigaragara kandi zivuza ingoma zizenguruka ikibuga cy’imyitozo cya Arsenal FC.

Uko abakaraza n’intore binjiraga mu kibuga rwagati, abakinnyi barimo, Henrikh Mkhitaryan, Lucas Torreira, umutoza Unai Emery, Alexander Lacazette, Aubameyang n’abandi babanje kwibaza ibyo ari byo, gusa nyuma ntibyatinze basanganirwa n’izi ntore zari ziteguye kubabyinira imbyino igaragaza intsinzi.

Uko berekezaga mu kibuga aho abakinnyi bari, niko nabo batangiraga kwizihirwa bakabyina umurishyo w’ingoma bawuceza mu buryo bugezweho. Bidatinze intore zaserutse imbere y’abakinnyi, zitangira kuvuna sambwe ari ko abakinnyi nka Alex Iwobi, Ainsley Cory Maitland-Niles n’umuzamu Martinez babigana.

Umurishyo w’ingoma wasoje iki gikorwa wizihiye cyane Mesut Özil, Mustafi, Mohamed Elneny, Aubameyang, Guendozi n’abandi bawubyinnye bagacutsa mu rufaya rw’amashyi bahundagajeho izo ntore n’abakaraza b’u Rwanda ndetse baranabasuhuza umwe ku wundi babereka urugwiro.

Muri Gicurasi uyu mwaka nibwo Leta y’u Rwanda yatangaje ko yagiranye amasezerano n’Ikipe ya Arsenal agamije kwamamaza ubukerarugendo bw’u Rwanda.

Aya masezerano y’imyaka itatu avuga ko ikipe ya Arsenal nkuru, iy’abatarengeje imyaka 23 ndetse n’iy’abagore zizajya zambara umwambaro wanditseho ‘Visit Rwanda’ (Sura u Rwanda) ku kuboko kw’ibumoso.

Ni amasezerano agamije guteza imbere ubukerarugendo, hongerwa umubare w’abanyamahanga basura u Rwanda.

Ikigo cy’Igihugu gishinzwe Iterambere (RDB) giherutse gutangaza ko mu muhango wo Kwita Izina abana b’ingagi 23 muri uyu mwaka, nta gihindutse umwe mu bakinnyi ba Arsenal FC azaba ahari.

U Rwanda rufite intego yo kongera amafaranga ava mu bukerarugendo akava kuri miliyoni 404 z’amadolari ya Amerika, akagera kuri miliyoni 800 z’amadolari mu mwaka wa 2024.

Leta y’u Rwanda inafite gahunda yo guteza imbere ubukerarugendo isangiza abaturiye pariki ku mafaranga yabuvuyemo. Muri iyo gahunda imaze gutangamo miliyoni 1.28 y’amadolari yashowe mu mishinga 158 ifitiye akamaro abaturiye za pariki.

Ubufatanye bw’Ikipe ya Arsenal FC n’u Rwanda, ni kimwe mu bigize gahunda y’igihe kirekire u Rwanda rwihaye yo guteza imbere ubukerarugendo no kubungabunga urusobe rw’ibinyabuzima, nkuko bikubiye mu cyerekezo 2050 na gahunda y’Imbaturabukungu (EDPRS II).

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
same 2018-08-11 02:36:12

Ariko mbega amacumu wagirango ni zanterahamwe zampekuye puuu toka satani , mujye muhama iwanyu muve mubantu

2
muhire aime 2018-08-10 13:16:59

ntimukavunwe numutwaro mutikoreye ubu nishyari ribishe ubundi se ni wow
e wayatanze mwamenye ibyanyu ibyabanyarwanda birakureba kuvuga ubusa gusa

3
nm 2018-08-10 05:53:50

Ibi bishatse kuvuga iki? Ntabwo nsobanukiwe neza. Bivuze se ko abanyarwanda bose bafana Arsenal bakaba batumye izi ntore ngo zibahagararire cyangwa ni izi ntore zonyine ziyifana?

4
Gashamura 2018-08-09 16:15:51

Abanyafurika tuzapfa tudateye imbere mu gihe cyose tutarumva ko ubugoryi bwo guhora twasamiye abazungu bugomba guhagarara. Kubona abantu bikorera ingoma ziturutse muri Africa bakazishyurira indege cg amato, bakikora bakagenda nta terambere ryabo bagamije, bakajya kubyinira abantu batazi, bagahabwa inkwenene barangiza bagataha, bikwereka ko tugifite indi myaka myinshi yo mu bujiji n’ ubukene cyane cyane bwo mu mutwe.

5
Gahima 2018-08-09 14:18:55

Hahahahah abirabura turasekeje
Hanyuma se byatanze iki? Mwakuruye ba mukerarugendo?

6
Homba 2018-08-09 13:53:50

Barayimagiye ntibagwa nabi. biriya nibintu byokwerekwa aban bivukiye bikinira agapira? izajya 5 dore ndabivuze. man city iraje iyibanze iyibatize

7
phiston ndahayo 2018-08-09 11:30:03

mbega biratangaje kabisa babakoreye surprise idasanzwe gusa agaciro kacu ishema ryabanyarwanda..........follow my est gram for more #phistonndahayo

Kwamamaza