Ingo zisaga 800 zo mu misozi ya Ndiza zatangiye guhabwa amashanyarazi

1 4-06-2018 - saa 08:35, Akimana Jean de Dieu

Sosiyete ishinzwe Ingufu (REG) yatangiye gucanira abatuye mu misozi ya Ndiza iherereye mu Mirenge ya Nyabinoni na Rongi yo mu Karere ka Muhanga mu mushinga uzasozwa ingo zisaga 800 zikuwe ku gatadowa; amavuriro, ibigo by’amashuri bihabarizwa bigahabwa amashanyarazi.

Imirenge ibiri yatangiye gucanirwa muri itatu itarangwagamo amashanyarazi muri Muhanga, yari yiganjemo abaturage bakoreshaga udutadowa, amatoroshi n’imbingo mu gushaka urumuri.

Abatuye muri aka gace bahuriza ku cyerekezo kimwe cyo kuba amashanyarazi azabafasha kwihangira imirimo kuko hari ibyo bakeneraga birimo gukoresha inzugi n’ibindi bakajya kubigura muri Nyabihu cyangwa mu mujyi wa Muhanga mu bilometero birenga 45.

Iyamuremye Jonas yatangarije IGIHE ko bari baraheze mu bwigunge bakaba babonye amashanyarazi nyuma y’imyaka bayarebera hakurya ya Nyabarongo mu Karere ka Ngororero.

Yagize ati “Aka gace dutuyemo kagizwe n’imisozi ihanamye. Nyuma y’igihe gishize tutagira amashanyarazi ubu tugiye kuyakoresha icyo Perezida wa Repubulika yayaduhereye; tugiye gushyiraho ibyuma bisya umusaruro tweza kandi tujye dukora akazi kacu amasaha yose kuko twajyaga dutaha hakiri kare kubera gutinya ijoro.”

Ubwo Perezida Kagame yiyamamarizaga mu Karere ka Muhanga ku wa 18 Nyakanga 2017 yatangaje ko imyaka irindwi iri imbere ari iyo gukora biruseho.

Yagize ati “Dufite indi myaka irindwi yo gukora, tukagera ku bindi byinshi biri imbere bidutegereje. Twubake andi mashuri, andi mavuriro, indi mihanda, dushobore kugeza ku Banyarwanda bose amashanyarazi. Abanyarwanda bashobore kwikorera, bacuruze bunguke, bashore imari bafite mu byo bashaka byose. Abana bacu, ababyeyi bacu, abantu bose twiyumvemo amajyambere u Rwanda rushaka.”

Hari ababyaraga hacanwe amatoroshi

Umukozi mu Kigo Nderabuzima cya Nyabinoni Ushinzwe Serivisi z’Ubwisungane mu kwivuza, Uwamaliya Alice, yagaragaje ko bagiye gucika ku kwandikisha intoki ndetse bakarushaho gutanga serivise nziza ku babyeyi bahabyarira.

Yagize ati “Ibigo nderabuzima byagorwaga no kubyaza ababyeyi bamurikiwe n’amatoroshi. Kubona amashanyarazi bizoroshya akazi kuko ni twe mu karere kose twakoreshaga uburyo bwa gakondo bwo kwandika no kongera agaciro k’amakarita ya mituweli kandi byaramaze kwinjizwa mu ikoranabuhanga, ubu natwe dushyizwe igorora.”

Umuyobozi w’Ishami rya REG mu Karere ka Muhanga, Batangana Regis, yavuze ko aya mashanyarazi azagezwa no ku midugudu ibiri yubatswe mu murenge wa Nyabinoni ari yo Muyebe A na B ndetse n’umudugudu w’icyitegererezo wa Horezo ukirimo kubakwa ukazatuzwamo imiryango isaga 1o0 yari ituye mu manegeka. Batangana yavuze ko kubegereza amashanyarazi ari ukubazanira iterambere ndetse no kubafasha kubaho mu buzima bwiza.

Yagize ati “Iyi mirenge yagorwaga no kuba yarasigaye inyuma mu iterambere nk’iryo tubona mu mijyi n’utundi duce twagejejwemo umuriro. Niyo mpamvu ibi byose bishyirwaho ngo abaturage batangire bayabyaze umusaruro, kuko ubu ubuzima bw’aha buri guhinduka.”

Amashanyarazi yatanzwe byitezwe ko azafasha abaturage mu bikorwa bitandukanye by’iterambere birimo gucanira ibigo nderabuzima, amasoko, amashuri, imidugudu, inzu z’ubucuruzi, ubucukuzi bw’amabuye y’agaciro n’ibindi.

Ingo zisaga 11,160 nizo zituye mu Mirenge ya Nyabinoni na Rongi yagejejwemo amashanyarazi. Ku ikubitiro, izigera kuri 800 nizo zayahawe, izindi nazo zikazagenda ziyahabwa hafatiwe kuri uyu muyoboro wahagejejwe.

Kugira ngo aya mashanyarazi agezwe muri iyi mirenge yakuwe mu Karere ka Ngororero hubatswe umuyoboro munini wambukijwe Nyabarongo ureshya n’ibilometero 12.8 mu gihe imiyoboro mito abaturage bazafatiraho ireshya na 11.7 km. Watangiye kubakwa mu kwezi kwa Gashyantare uyu mwaka, ubu ibikorwa bikaba bigeze kuri 95%.

Kuri ubu, ingo zifite amashanyarazi mu Karere ka Muhanga zisaga 38% harimo 27% bafatira ku miyoboro migari na 11% bakoresha izindi ngufu zirimo amashanyarazi akomoka ku mirasire y’izuba. REG yari yihaye umuhigo wo gucanira ingo 2,500 muri Muhanga muri uyu mwaka w’ingengo y’imari ariko kuri ubu imaze gucanira izisaga 3,100 kandi ziracyakomeje kwiyongera mu mujyo w’intego yo kugeza amashanyarazi ku Banyarwanda bose (100%) bitarenze umwaka wa 2024.

Abakozi ba REG aha bari mu kazi ko guteranya za cash power
Igishushanyo cy'umudugudu w'icyitegererezo wa Horezo
Transformateur zamaze gushyirwaho
Umuriro wamaze kugezwa ku nzu zimwe muri aka gace
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
mbonigaba jean bosco 2018-06-05 03:16:16

nibyiza kuba imwe mumirenge duturanye ibonye umuriro kko bizabafasha kwiteza imbere nne navugiraga umurenge wa kibangu wo impamvu batanjya bawitaho kko nawo nuko bimeze.murakoze kubuvugizi mudukorera

Kwamamaza