IGIHE

Ingo zisaga 76,800 mu Rwanda zahawe amashanyarazi mu mezi atandatu

1 13-01-2020 - saa 21:28, Evariste Nsengimana

Sosiyete y’u Rwanda ishinzwe Ingufu mu Rwanda (REG) igaragaza ko mu mezi atandatu y’uyu mwaka w’ingengo y’imari wa 2019/2020, ingo zimaze guhabwa amashanyarazi afatiye ku muyoboro zigera ku 76,815.

Mu rwego rwo kurushaho kwihutisha iterambere ry’ubukungu, Leta y’u Rwanda yihaye intego ko bitarenze umwaka wa 2024, buri rugo rwose ruzaba rufite amashanyarazi, yaba afatiye ku muyoboro mugari cyangwa atawufatiyeho yiganjemo akomoka ku mirasire y’izuba.

Umuyobozi wa REG, Eng. Ron Weiss, yatangaje ko abakozi b’iki kigo biteguye kujya mu ngamba hagakorwa ibishoboka byose, abaturage bakabona amashanyarazi atuma bashobora gukora bakiteza imbere.

Yagize ati “Turashaka igihugu giteye imbere n’abaturage bagatera imbere, bagakora ubucuruzi n’indi mirimo izatuma batera imbere kubera ingufu z’amashanyarazi turimo kugenda tubagezaho. Ndasaba intore gukora gitore no kwishimira akazi zikora.”

REG igaragaza ko hari imishinga irimo gukorwa hirya no hino mu gihugu muri uyu mwaka, irimo iyo kwagura imiyoboro n’iyo kubaka imishya, biteganyijwe ko izageza amashanyarazi ku ngo zirenga ibihumbi 106.

Mu mishinga irimo gukorwa ubu harimo uterwa inkunga na Banki y’Abarabu igamije guteza imbere ubukungu mu bihugu bya Afurika (BADEA), uzageza amashanyarazi ku ngo zirenga ibihumbi 18 mu turere twa Nyagatare na Burera.

Hari kandi undi mushinga uterwa inkunga na Banki y’Isi uzaha amashanyarazi ingo zirenga ibihumbi 13 mu Ntara y’Uburasirazuba, ibihumbi 10 mu Majyepfo, ibihumbi umunani mu Majyaruguru n’izisaga 5,700 mu Ntara y’Uburengerazuba.

REG igaragaza ko hari n’undi mushinga watewe inkunga na Banki Nyafurika Itsura Amajyambere (AfDB) uzatanga amashanyarazi ku ngo zisaga 6280 mu Karere ka Ngororero n’izindi zigera ku 4,835 mu turere tumwe tw’Amajyaruguru.

Mu rwego rwo kugoboka imiryango itishoboye kandi ituriye imiyoboro, hari undi mushinga uri ku musozo uterwa inkunga n’Umuryango Nterankunga w’Abadage, GIZ, ugera mu turere 16 mu Rwanda urimo kugeza amashanyarazi ku ngo zisaga 14,800.

Abahawe amashanyarazi muri uyu mushinga kandi banafashwa gushyira amatara mu nzu nta kindi kiguzi batswe.

-  Aho amashanyarazi ageze, ubuzima burahinduka

Ubuhamya bw’abahawe amashanyarazi hirya no hino mu gihugu bugaragaza ko agira uruhare rukomeye mu kwihutisha iterambere n’imibereho myiza byabo muri rusange.

Bamwe mu baherutse guhabwa amashanyarazi bavuga ko yabaruhuye ingendo bakoraga bajya gushaka serivisi mu mijyi ndetse akanatuma urubyiruko rwihangira imirimo.

Uwitwa Bizumugabe Céléstin utuye mu Murenge wa Mamba mu Karere ka Gisagara, avuga kubera ko batari bafite amashanyarazi, hari seirivisi bajyaga gushaka kure ariko ubu bikaba byarabaye amateka.

Ati “Iyo urebye ahantu hari umuriro haba hageze iterambere, nk’ubu ndaguha urugero, hano duhinga ibigori ariko iyo twakeneraga kurya akawunga watumaga umwana ukamukorera agatwaro ashoboye akajya gushesha i Musha.”

Yakomeje agira ati “Ubu kuva twamaze kubona umuriro nizera ko n’imashini zisya tudashobora kuzibura kuko hari abashoramari bashobora kuzizana, na hariya i Musha ntabwo bazivukanye ni amafaranga bashora. Ariko ntiwahazana imashini y’amashanyarazi adahari.”

Tuyisabe Jean Damascène ufite akabari mu gasanteri ka Rambura mu Karere ka Karongi yagize ati “Umuriro w’amashanyarazi udufitiye akamaro kanini cyane. Urabona mfite televiziyo imfasha kwerekana umupira. Iyo ntafite umuriro w’amashanyarazi nta bakiliya mba mfite.”

Umukozi w’Ikusanyirizo ry’Amata rya Koperative Izihirwe ikorera mu gasanteri ka Rufungo mu Murenge wa Rugabano, Nyirandahayo Eugènie, yavuze ko ingufu z’amashanyarazi zituma batunganya amata menshi n’abakiliya bakiyongera.

Ati “Kubera duteka amata ku mashini urumva biba bisaba umuriro kandi uziko inkwi zidakunze kuboneka no kuzikoresha ni ukwangiza ibidukikije [..]Hari igihe dukoresha nk’umuriro wa 5000 Frw ariko tugikoresha moteri twakoreshaga mazutu ihenze nayo twakuraga i Rubengera, kujyayo no kugaruka ni 2000 Frw.”

Imibare igaragazwa na REG yerekana ko ubu ingo zifite amashanyarazi zisaga 52.2% ubariyemo izifite amashanyarazi afatiye ku muyoboro mugari n’izifite amashanyarazi adafatiye ku miyoboro migari.

Mu mwaka w’ingengo y’imari ushize, umubare w’abafatabuguzi ba REG bafite amashanyarazi afatiye ku muyoboro mugari wiyongereyeho ingo zisaga ibihumbi 147 naho ingo zikoresha amashanyarazi akomoka ku mirasire y’izuba ziyongeraho izisaga ibihumbi 85.

Muri rusange, mu gihe cy’umwaka umwe, umubare w’ingo zifite amashanyarazi wazamutseho hafi 8%, uvuye kuri 45%.

Ingo zisaga 76 800 mu Rwanda zahawe amashanyarazi mu mezi atandatu
Agasanteri ka Rugabano nako ntikasigaye kahawe amashanyarazi
I Rubengera ni hamwe mu bishimira ko amashanyarazi abafasha muri byinshi
Umukozi w’Ikusanyirizo ry’Amata rya Koperative Izihirwe ikorera mu gasanteri ka Rufungo mu Murenge wa Rugabano, Nyirandahayo Eugènie, yavuze ko amashanyarazi abafasha gutunganya amata menshi

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
uwimana 2020-01-13 15:00:48

murahoneza turabashima cyane pe reta yubumwe bwabanyarwanda turayikunda pe ariko muratuvugire ubuvugizi mukarere kakamonyi mumurenge warunda akagari kagihara umudugudu wubukimba ahateganye nasikoro batwimye umuriro pe amazi nayo turapfuye mudusabire umuriro tuve mwicuraburindi wenda muzatubaze uruhare ryacu turutange ariko tuve mwicuraburindi murakoze

Kwamamaza