IGIHE

Impunzi za mbere zizava muri Libya zizagera mu Rwanda ‘vuba bishoboka’

12 10-09-2019 - saa 12:12, Rabbi Malo Umucunguzi

Minisiteri ishinzwe ibikorwa by’Ubutabazi, Minema, yatangaje ko nyuma y’isinywa ry’amasezerano atuma u Rwanda rwakira by’igihe gito impunzi 500 zizava muri Libya, icyiciro cya mbere kizagera mu Rwanda mu minsi iri imbere.

Amasezerano areba impunzi zimwe z’Abanyafurika zaheze muri Libya ziri mu mayira zishaka kujya i Burayi, yashyizweho umukono kuri uyu wa Kabiri hagati y’u Rwanda, Umuryango wa Afurika yunze Ubumwe (AU) n’Ishami ry’Umuryango w’Abibumbye ryita ku mpunzi, UNHCR.

Minisitiri Ushinzwe Ibikorwa by’Ubutabazi, Kamayirese Germaine, yavuze ko nyuma y’uko mu 2017 Perezida Paul Kagame yemeye kwakira impunzi z’Abanyafurika zari muri Libya zateshwaga agaciro bamwe bacuruzwa nk’abacakara abandi bagakorerwa iyicarubozo, impande zitandukanye zatangiye kuganira uko byakorwa.

Umwanzuro wo kuvana izi mpunzi muri Libya ngo wafashwe nyuma y’uko aho ziri hari hatangiye kuraswa, ikibazo cyatijwe umurindi n’uko Libya yugarijwe n’umutekano muke nyuma y’ihirikwa rya Muammar Gaddafi, ku buryo igihugu kidafite ubutegetsi buhamye ngo buzirengere.

Minisitiri Kamayirese yagize ati “Ni uburyo busanzwe bukoreshwa, bwarakozwe muri Niger, bwarakozwe muri Romania, natwe mu Rwanda twaganiriye uko byakorwa.”

Yavuze ko u Rwanda rwakoze ingendo shuri muri Niger mu kureba uko bikorwa, aya masezerano yasinywe akaba azerekana uruhare rwa buri mufatanyabikorwa.

Kamayirese yakomeje ati “U Rwanda ruzakira impunzi zigera kuri 500, zikazacumbikirwa mu nkambi y’agateganyo muri Gashora.”

Iyi nkambi isanzweho kuko yifashishijwe mu kwakira ibihumbi by’impunzi z’Abarundi mu 2015. Irimo ibyangombwa nk’ibibuga by’imikino, aho kurara n’ibindi nkenerwa, ubu irimo kongererwa ubushobozi kugira ngo izakire izo mpunzi.

Nyuma yo kongererwa ubushobozi ntabwo izaba ikiri inkambi inyurwamo by’igihe gito, izaharirwa izi mpunzi mu buryo bw’igihe kirekire.

Umuyobozi wa UNHCR mu Rwanda, Ahmed Baba Fall, yavuze ko ubwo mu 2017 ubwo hajyaga hanze amashusho ya CNN agaragaza uburyo Abanyafurika barimo kugurishwa nk’abacakara, byatumye Perezida Kagame wari uyoboye AU afata icyemezo gikomeye.

Ati “Ndashima umutima mwiza w’u Rwanda wo kwakira izi mpunzi n’abashakisha ubuhungiro bari mu byago muri Libya.”

Yavuze ko mu minsi mike impunzi za mbere zizaba zageze mu Rwanda, kuko zibayeho nabi muri Libya ku buryo abenshi bari mu bigo bafungiwemo.

Ati “Turimo gukorana n’ibindi bihugu na AU ngo turebe uko twabona umuti urambye kuri icyo kibazo, harimo kubimurira mu bindi bihugu cyangwa kubasubiza mu bihugu byabo, kimwe no kubatuza mu gihugu barimo.”

Minisitiri Kamayirese yavuze ko Leta y’u Rwanda yemeye kwakira Abanyafurika, bityo uzemera kuza mu Rwanda azakirwa hatitawe ku gihugu cy’inkomoko.

Yakomeje ati “Kuva uyu munsi, igihe icyo aricyo cyose bashobora kuza, uhereye none amasezerano amaze gusinywa, ariko ni vuba bishoboka.”

U Rwanda rwakiriye izi mpunzi mu gihe inkunga zikomeje kugabanyuka, gusa Minisitiri Kamayirese avuga ko hakomeje gahunda zo gushaka ubushobozi no gushyiraho gahunda zituma impunzi zitunga. Ibyo bikajyana no gushishikariza impunzi zimwe gusubira iwabo, cyane aho amahoro yagarutse.

Yavuze ko izi mpunzi zizaza mu Rwanda zirimo abagumye mu nzira bagiye gushaka ubuzima i Burayi, hakabamo n’abagendaga bahunga ibihugu byabo kubera umutekano muke.

Ubwo ikibazo cy’aba bimukira cyajyaga ahabona, u Rwanda rwari rwemeye kwakira impunzi 30 000 mu myaka itanu, ndetse ngo nubwo hakiriwe 500, birashoboka ko bibaye ngombwa hazakirwa n’abandi.

Kugeza ubu habarwa ko muri Libya, ubaze impunzi, abimukira n’abagishaka ubuhungiro, bose hamwe bagera ku bihumbi 800.

Minisitiri Ushinzwe Ibikorwa by’Ubutabazi, Kamayirese Germaine, yavuze ko mu minsi mike impunzi za mbere zizagera mu Rwanda zivuye muri Libya
Umuyobozi wa UNHCR mu Rwanda, Ahmed Baba Fall, yashimye umutima u Rwanda rwagaragaje mu kwakira impunzi zari mu kaga
Abayobozi ba MINEMA na UNHCR mu kiganiro n'abanyamakuru kuri uyu wa Kabiri
Minisitiri Kamayirese na Ahmed Baba Fall mu kiganiro n'abanyamakuru

Amafoto: Dushimimana Ami Pacifique

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
kamari 2019-09-12 01:41:53

Libiya yarinziza kubwa kadafi none abanya libiya bafashe iyambere kumukubita inshuro bakamwica urw’imbwa ubu bari kuririra mumyotsi nkabakame, iyo niyo Africa, ikikibazo nticyari kuba iyo Libiya iba igifite umuyobozi nka kadafi, abazungu batujya mumatwi tugasenya ibihugu byacu ngo turashaka democratie, tukamarana tugasenya ibyo twagezeho twarangiza bakadutera umugongo, ubuse ninde uri mubibazo?

mubyukuri ntabwo ibi byari bikwiye, african twari dukwiye kumenya ubwenge, tukamenya icyo dushaka, n’uburyo bwo kugishaka.
ntabwo gushak democratie bivuze intambara no gushyira mukaga abaturage na ruband nyamwinshi. uwo urega kudatanga ubwingenge nawe ugiyeho biza ari impanga. amahoro niyo yingenzi. murakoze ariko kandi mbabajwe n’izimpunzi z’aba nya libia, igihugu nka libia muri Africa? birababaje
sinzi niba Libia ifite ubuyobozi, ariko nkeka ko Kubwa kadafi buri muturage wese hari ingengo y’imari yari yemerewe, frw yo kumubeshaho iyo yaba adakora, none ngo babayeho nabi? Ubufransa buryozwe ibyo rwakoze muri libiya n’ibindi bihugu bikomeye byose bibonereho bizajye byirengera ingaruka z’intambara bishoza mubindi bihugu. isi imaze kuba indiri yo kudahana.

we as generation we have to take step ahead tugahindura ibintu mumahoro
turambiwe iyi miyoborere

2
Gasore 2019-09-11 09:37:39

U Rwanda ntirushaka ko impunzi zibaho rukongera gusaba impunzi? ?bariya bantu nta n umwe ufata umugambi wo kujya i Burayi badafite nibura 5000$ k umufuka uretse wenda ko bayabambura bageze muri Libya. Umuntu watunze ako kayabo uzamutungisha impungure mugihe kingana iki?

3
iganze 2019-09-11 07:56:26

Niba nasomye neza, ni ukubakira by’agateganyo, byumvikana ko ikibazo cyabo kizakomeza kwigwaho. Aho bishoboka byaba byiza bafashijwe gusubira iwabo mu muco wabo mu gihugu cyabo, mu miryango yabo. Aho bidashoboka nko ku mpunzi za politiki, ku rwego mpuzamahanga bakemeza aho bajya gutura bitazibangamiye, niba ibyatumye bahunga bitaracyemuka.

4
bimawuwa 2019-09-10 16:52:46

Njywe rwose nta kibazo mbifiteho kuba baza ari impunzi cg abashaka gutura ikibazo ahubwo abo bantu bagiye hariya bashaka kujya iburaya kuki UN itabafasha ikabaha impamba bagasubira iwabo bakagira icyo bakora aho kuguma bitwa impunzi mureka muzareba mu gihe gito UN nigabanya kubyo ibagenera bazakora imyigaragambyo u Rwanda nirushaka kubahoshya bavuge ko u Rwanda rubabuza uburenganzira bwabo.naho abo bavuga ngo u Rwanda rwakira impunzi kandi hari abarimo kuruhunga ubwo niwowe ubuzi kuko iyo biza kuba bizwi nisi ntabwo yakwemera ko rwakira impunzi .

5
Niyigena 2019-09-10 15:43:28

Harabantu nibaza ayo bize icyo yapfuye bikansetsa ,barikwibaza impamvu twakira impunzi ngo zakwihutiramo aho zishaka kujya ubu bagiye basoma inkuru bakumva Bakareka guhubuka ? Undi ati ndibaza impamvu tuzakira natwe tuzifite mugihugu cyacu ntampunzi dufite abo mwita impunzi nabagiye bifashije bumva inda zabo arinkingarani ibyo igihugu kibaha bitabahagije bakishimira kugisebya ngo babone ibyo baroha mubifu byabo

6
murekatete 2019-09-10 14:37:27

Iyi ni Politiki yo hejuru mu kirere!
Niyo mpamvu itumvikana!

7
Humman Trafic 2019-09-10 12:45:25

Nimubona na batanu bashaka kuza aho muri ubwo buvumo bwanyu muzatubwire!

8
Aimable 2019-09-10 12:07:36

Jimmy Ikibazo nkeka ko atari ukirasa impunzi ahubwo Ikibazo ari igituma ziraswa
Bravo k’u Rwanda n’ubuyobozi bwa rwo kuko rugaragaje agaciro k’ikiremwa muntu.

9
Dumbuli 2019-09-10 11:33:02

Ku bufutanye bwú Rwanda n’imiryango mpuzamahanga ndasabako bazabatajya mu mahema ahubwo bahabwa amazu yubatse ku buryo bugezweho bakabaho nezantakurira cga kuganya. bakerekwa amahirwe meza yo kuguma muri Afurika.

10
Njyewe 2019-09-10 11:20:35

Kwakira impunzi hari abagihunga ubutegetsi bwawe ntacyo bimaze kandi ntibyumvikana .
Nugushaka kubeshya abanyamahanga !
Nimurwanye kandi mukureho igituma bahunga ibihugu byabo.
S’il y avait la justice, la démocratie, l’égalité , je pense que personne ne quittera son pays pour l’étranger !

Paji: 1 | 2  

Kwamamaza