IGIHE

Impungenge ku bagore n’abakobwa bafite virusi itera Sida bagihabwa akato

0 2-12-2019 - saa 20:50, Evariste Nsengimana

Umuyobozi w’Ishami ry’Umuryango w’Abibumbye ryita ku Bagore mu Rwanda (UN Women), Fatou Lo, yavuze ko nubwo abagore bagezwaho serivisi zihabwa abafite virusi itera Sida, iki cyorezo gikomeje kwica benshi bitewe n’inzitizi bagira mu kwitabwaho.

Yabigarutseho kuri uyu wa 2 Ukuboza 2019, mu Nama Mpuzamahanga ya 20 yiga ku Cyorezo cya Sida n’Indwara zandurira mu mibonano mpuzabitsina muri Afurika, ICASA, iteraniye i Kigali.

Intego Ishami ry’Umuryango w’Abibumbye rishinzwe kurwanye SIDA (UNAIDs) ryihaye kugeraho mu 2020 ya 90-90-90 isobanura ko icyo gihe abafite virusi itera Sida bazaba bazi uko bahagaze ari 90%, abafata imiti 90% naho kugabanuka kwa virusi itera Sida mu maraso bikaba 90%.

Fatou yavuze ko bigoye kugera ku ntego mpuzamahanga zashyizweho zigamije gukumira no kurwanya Virusi itera Sida mu gihe imbogamizi abagore bagira mu gahabwa ubuvuzi bwayo zitakuweho.

Ati “Kugira ngo twese intego mpuzamahanga, birasaba byihariye kumva no kumenyekanisha imbogamizi abagore bakigira mu kubona ubuvuzi kuri virusi itera Sida. Izo harimo akato ko ku rwego rwo hejuru, ihezwa, ivangura n’ihohotera.”

Yakomeje avuga ko mu zindi mbogamizi abagore bafite virusi itera sida bagira harimo aho usanga batitabwaho neza cyangwa ibihugu byabo bidafite amategeko arengera abafite iyo virusi.

UN Women yakoze isesengura isanga hari ibintu by’ingenzi bikeneye gukorwa byihutirwa birimo gushyiraho no kugenzura amahame y’uburenganzira bwa muntu arengera abagore bafite virusi itera Sida.

Hari kandi kureba imbogamizi bagira mu gufata imiti igabanya ubukana bwa virusi itera sida ku mavuriro n’ibindi bibazo bifitanye isano nabyo no kuziba icyuho kigaragaramo.

Ati “Intego y’ibanze dufite muri UN Women, ni ukongerera ubushobozi abagore no guharanira ko bahabwa uburenganzira bagombwa mu kurindwa ubwandu, akato no guhabwa ubuvuzi n’ubufasha bakwiye.”

Fatou yavuze ko biteye impungenge kuba 61% by’abafite virusi itera sida ku Isi ari urubyiruko rufite hagati y’imyaka 15 na 24, bikaba bigaragaza ko hakeneye gukorwa byinshi cyane ko ari nabo bagomba kugira uruhare mu kuyirandura.

Umujyanama muri Politiki, Uburinganire, Ubuzima na gahunda zo kurwanya Virusi itera Sida muri UN Women, Nazneen Damji, yavuze ko yavuze ko hari nubwo abagore n’abakobwa bafite Virusi itera Sida cyangwa abavandimwe yishe babuzwa uburenganzira bwabo bikabagiraho ingaruka mu by’ubukungu.

Ati “Umugore aramutse wenda abujije kuzungura kubera umugabo we yishwe na Virusi itera Sida, bizakomeza kumushyira mu bukene, bimugiraho ingaruka.”

Umunyamabanga Uhoraho muri Minisiteri y’Ubuzima, Dr Nyemazi Jean Pierre, yavuze ko ubushakashatsi bwerekana ko muri rusange urwego rw’ubuvuzi rukoramo abagore benshi [75%] ariko ugasanga abayobozi barwo benshi ari abagabo, barenga 70%.

Nyemazi yavuze kandi ko uretse kuba abagore usanga ari bake mu nzego zifatirwamo ibyemezo mu buvuzi, ari nabo usanga virusi itera sida n’indwara zifitanye isano nayo byibasira cyane.

Ati “Dukeneye gushyira imbaraga ku ngamba zimakaza uburinganire kugira ngo twizere ko abagore n’abakobwa babasha kugera kuri serivisi z’ubuvuzi no kwirinda Virusi itera Sida.”

Raporo y’Ishami ry’Umuryango w’Abibumbye ryita ku Buzima (OMS) ya 2018 yerekanye ko mu bagore miliyoni 18.8 bari bafite virus itera Sida muri uwo mwaka, bafite guhera ku myaka 15 kuzamura, bakaba bari bihariye 52% by’abantu bakuru bari bafite iyo virusi, aho umubare munini ari abo ku Mugabane wa Afurika.

Muri miliyoni 1.6 banduye iyi virusi ku Isi muri uyu mwaka, nibura 47% ni abagore bafite guhera ku myaka 15, biganjemo abafite hagati ya 15 na 25. Muri abo bose bayanduye, abarenga ibihumbi 800 ni abo muri Afurika.

Umunyamabanga Uhoraho muri Minisiteri y’Ubuzima, Dr Nyemazi Jean Pierre, yavuze ko hakenewe imbaraga mu kurushaho kwimakaza uburinganire
Nazneen Damji yavuze ko iyo abagore n’abakobwa bafite Virusi itera Sida bahawe akato bigira ingaruka no ku bukungu bwayo
Bamwe mu batanze ikiganiro kigaruka ku mbogamizi abagore bafite virusi itera Sida bagihura nazo

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza