IGIHE

Imihigo ya Mushikiwabo mu nshingano nshya nk’Umunyamabanga wa OIF

5 9-01-2019 - saa 13:40, Ishimwe Israel

Hashize iminsi itandatu, Umunyarwandakazi Mushikiwabo Louise yicaye ku ntebe y’Ubunyamabanga Bukuru bw’Umuryango w’Ibihugu bikoresha Ururimi rw’Igifaransa (OIF).

Ku wa 3 Mutarama 2019, nibwo i Paris mu Bufaransa habereye umuhango w’ihererekanyabubasha hagati ye n’Umunya-Canada, Michaëlle Jean, wari umaze imyaka ine ku buyobozi bwa OIF.

Mu nkingi zikomeye Mushikiwabo yashingiyeho yiyamamaza harimo no kuzamura urwego rw’Igifaransa ku ruhando mpuzamahanga.

Uyu mukoro kandi yawibukijwe na Perezida w’u Bufaransa, Emmanuel Macron, wamusabye ubufatanye mu guhindura Igifaransa ururimi rukomeye ku Isi.

Mu by’ingenzi Mushikiwabo ahanganye na byo ku isonga ni uguhindura Igifaransa, ururimi rukoreshwa cyane kuri internet.

Mu kiganiro yagiranye na Boursorama, Mushikiwabo Louise yasobanuye icyerekezo afite mu guteza imbere Igifaransa nk’imwe mu ntego ze z’imena.

Umunyamakuru: Wabaye undi Munyafurika watorewe kuyobora OIF, usimbuye Michaëlle Jean. Bishushanya iki mu gihe tuzi ko Afurika itanga 80% mu iterambere ry’umubare w’abavuga Igifaransa ku Isi?

Mushikiwabo: Afurika ni nka moteri ya Francophonie. Birasanzwe ko Afurika iri ku ruhembe rwa OIF. Bisobanuye ko nzi neza ko uyu muryango urenze n’imbibi z’umugabane. Nk’Umunyamabanga Mukuru, nzakora ibishoboka byose ngo buri wese yisange muri OIF.

Umunyamakuru: Kandidatire yawe yashyigikiwe n’u Bufaransa ndetse uri umuntu wa hafi ya Perezida Kagame Paul. Ni ikihe cyizere utanga ko uzigenga ku buyobozi bwa OIF?

Mushikiwabo: Ndi umunyamwuga. Nkorera La Francophonie kandi ni yo mpagarariye. Nzakoresha imbaraga zanjye zose muri uyu muryango. Ubu sinkiri Minisitiri w’Ububanyi n’Amahanga w’u Rwanda. Buri gikorwa, icyemezo n’akazi ka La Francophonie, nzakubahiriza nk’Umunyamabanga Mukuru wa OIF.

Umunyamakuru: U Rwanda rwimakaje Icyongereza nk’ururimi rw’ibanze mu mashuri. Byaba bijyanye n’icyerekezo cya OIF?

Mushikiwabo: U Rwanda ni igihugu gikoresha Igifaransa. Runakoresha Icyongereza ndetse n’Igiswahili. Ururimi abaturage bavuga cyane ni Ikinyarwanda gifatwa nk’ururimi rw’igihugu.

Turi igihugu kivuga indimi nyinshi kandi ntekereza ko kuba Perezida w’u Rwanda atavuga neza Igifaransa (yatangiye kukivuga) ari uko azirikana akamaro gifitiye igihugu.

Igifaransa ni rwo rurimi rw’amahanga ruvugwa cyane n’Abanyarwanda ndetse agaciro kacyo kagenda gakura. Twizera ko uruhurirane rw’indimi mu Rwanda rudakwiye guteza ibibazo.

Umunyamakuru: Ibi Perezida Emmanuel Macron yarabishimangiye. Ukwiganza kw’Igifaransa mu ndimi nyinshi. Iki nicyo cyerekezo cya OIF?

Mushikiwabo: Igifaransa nta gitutu gifite cyo kugereranywa n’Icyongereza. Isi ya none igena ko abavuga Igifaransa bakoresha n’izindi ndimi. Dukomeza kwihugura mu zindi ndimi. Dufite amahirwe menshi ku kubona akazi no kwihugura byihuse ku zindi ndimi. Nta kibazo mbibonamo.

Umunyamakuru: Ni izihe ntego zawe ku buyobozi bwa OIF?

Mushikiwabo: Nakwishimira kubona Igifaransa kizamutse ku mwanya wa mbere nk’ururimi rukoreshwa kuri internet. Urebye umubare w’urubyiruko ruvuga Igifaransa ubona ko bishoboka gusa hari ibikeneye gukorwa.

Dushobora gukoresha ikoranabuhanga nk’uburyo bwo kubona igishoro cyo kwihangira imirimo. Urubyiruko rushishikarira ibijyanye n’ikoranabuhanga ndetse ntekereza ko ryahuzwa neza n’ibyifuzo byarwo.

Umunyamakuru: OIF inengwa guhuriza hamwe imishinga myinshi, ese ubona hadakenewe kugira iyitabwaho byihariye?

Mushikiwabo: Hakenewe ibiganiro kuko ibivugwa birumvikana. Dukora ibintu byinshi, dukeneye kugira ibyo twibandaho, tukazana ibikorwa byinshi biri mu murongo uhamye nk’ubukungu, iterambere ry’ururimi n’ibindi.

Umunyamakuru: OIF igizwe n’ibihugu by’ibinyamuryango 88 birimo ibidakoresha cyane Igifaransa. Ubona ibigenderwaho mu kubyakira bidakwiye gusubirwamo?
Mushikiwabo: Kuki bitashoboka? Biriho ko ibihugu byinshi bifitanye isano ya bugufi n’Igifaransa bishaka kuba ibinyamuryango bya OIF nk’ikimenyetso cyo kubengukwa. Ntekereza ko dukwiye kubera amaso aho dukorera n’indangagaciro zacu. Dushobora gushyiraho uburyo abanyamuryango bahabwa sitati itandukanye n’abandi banyamuryango buzuye. Ibihugu by’ibinyamuryango ni byo bizanzura.

Afurika ishobora kugira uruhare mu kongera umubare w’abavuga Igifaransa kuko abagera kuri 55% mu bakivuga babarizwa ku mugabane.

Icyongereza nirwo rurimi rwiganje kuri internet, mu gihe Igifaransa kivugwa n’abantu miliyoni 300 ku Isi kiza ku mwanya wa kane.

Igifaransa kiri ku mwanya wa gatanu mu ndimi zivugwa cyane ku mubumbe, cyo n’Icyongereza zikoreshwa ku migabane itanu y’Isi.

Urubuga rwa OIF rugaragaza ko Igifaransa ari ururimi rw’ubutegetsi mu bihugu 32 biri muri uyu muryango, ruza ku mwanya wa gatatu mu zikoreshwa mu ishoramari ku Isi, abarimu 900 000 bigisha Igifaransa ku Isi yose mu gihe abantu miliyoni 125 bakiga.

Ku wa 12 Ukwakira 2018, nibwo Mushikiwabo wari umaze imyaka icyenda ku ntebe ya Minisiteri y’Ububanyi n’Amahanga mu Rwanda, yatowe.

Abakuru b’ibihugu na za Guverinoma bagera kuri 40 bamwemeje nk’Umunyamabanga Mukuru wa OIF mu myaka ine iri imbere mu matora yabereye mu Nteko Rusange ya 17 i Erevan muri Arménie.

OIF imaze imyaka 49 ishingiwe i Niamey muri Niger, yatangijwe n’ibihugu 21 byiganjemo ibyakolonijwe n’u Bufaransa.

Uyu muryango ubu ugizwe n’ibihugu 88 birimo ibinyamuryango byuzuye 54, ibihugu birindwi yiyunze n’ibihugu 27 by’indorerezi. Uhuriyemo abantu miliyari 1,5 ku Isi, bangana na 16% by’abatuye Isi.

Mushikiwabo ni uwa kane uyoboye OIF nyuma y’Umunyamisiri Boutros Boutros-Ghali (1997-2002), Abdou Diouf wo muri Sénégal (2003-2014) na Michaëlle Jean (2014-2018).

Umunyamabanga Mukuru wa OIF, Mushikiwabo Louise mu kiganiro yatangiye mu Mujyi wa Paris mu Bufaransa, ku wa 7 Mutarama 2019. Ifoto ya AFP
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kamanzi 2019-01-12 01:13:01

Mu guteza igifaransa imbere mu Rwanda. Mushikiwabo akwiye gusaba MINEDUC hagashyirwaho kwigisha isomo ry’igifaransa muwa kane, muwa gatanu, no muwa gatandatu w’amashuri yisumbuye, dore ko kugeza ubu isomo ry’igifransa rigarukira gusa muwa gatatu w’amashuri yisumbuye (tronc-commun).

2
Nziza 2019-01-09 13:46:39

@samu urakoze kubabwiza ukuri

3
Havugimana Jean Coaude 2019-01-09 12:00:59

Imana izakurinde
Mubyeyi mwiza

4
garicane 2019-01-09 09:59:29

Wowe nkubwize ukuri irire cash ubundi wisubirere iwanyu muri Canada, niba ukurikira wabonye aho abo bantu b udukote tw umuhondo bagejeje incuti yanyu Macron. Inama nakugira niyo kubyitwaramo neza kuko nawe byakugeraho muri OIF kuko uzi uburyo wicayemo.

5
Samu 2019-01-09 07:52:21

Ariko @igihe, uyu muco wo kujya mufata inkuru zivuye mu bindi binyamakuru akaba arizo muhindura mu kinyarwanda mwazawucitseho. Ubu koko tujye tumenya amakuru y’abanyarwanda cg y’u Rwanda tuyakuye mu binyamakuru by’abanyamahanga. Ubuse koko mwabuze contact za Mushikiwabo ngo mumwibarize. Abo bandi ko babashije kuvugana nawe, bo bazikuyehe? Rwose muri ikinyamakuru gikomeye, mwubahe izina ryanyu.

Kwamamaza