IGIHE

Imana yakoresheje abayobozi bafite icyerekezo bagarura abayo mu gihugu cy’ubumwe n’ubwiyunge- Madamu Jeannette Kagame

4 13-01-2020 - saa 08:48, Habimana James

Madamu Jeannette Kagame yagaragaje ko Imana iciye mu bayobozi bafite icyerekezo, yabakoresheje mu kugarura abantu bayo mu gihugu gitemba amata n’ubuku.

Yabigarutseho kuri iki Cyumweru ubwo yitabiraga amasengesho ngarukamwaka yo gusengera igihugu azwi nka, National Prayer Breakfast muri Kigali Convention Centre.

Ni amasengesho yahurije hamwe abantu bagera kuri 700 barimo abayobozi muri Guverinoma, abikorera ku giti cyabo, abagize sosiyete sivile n’inshuti z’u Rwanda zavuye mu bihugu bigera ku 10.

Yitabiriwe kandi n’Umuyobozi Mukuru w’Ishami ry’Umuryango w’Abibumbye ryita ku biribwa, World Food Programmes (WFP), David Beasley, uyu akaba yaranabaye Guverineri wa leta ya Carolina y’Epfo muri Leta Zunze Ubumwe za Amerika, hagati y’umwaka wa 1995 kugeza mu 1999.

Aya masengesho yabaye mu gihe u Rwanda rusoje icyerekezo 2020 cy’iterambere no gutangiza icyerekezo 2050, akaba ategurwa n’Umuryango Rwanda Leaders Fellowship, afite insanganyamatsiko igira iti “Imiyoborere Izana Impinduka: Kwishimira aho tugeze-Dutegura ejo hahaza.”

Madamu Jeannette Kagame yagaragaje ibyiza Imana yakoreye igihugu birimo uko yagikuye mu mahano ya Jenoside yakorewe Abatutsi, cyane ko hari na bamwe bumvaga ko kitazongera kuba igihugu.

Yagaragaje ko biciye mu bayobozi bari bafite icyerekezo, Imana yabakoresheje bagarura abana bayo muri cya gihugu bajyaga bifuza gitemba amata n’ubuki.

Yagize ati “Imana yakoresheje abayobozi b’u Rwanda bafite icyerekezo bayobora abantu bayo kugaruka mu gihugu cyabo cy’amata n’ubuki nk’uko bajyaga babivuga, igihugu cy’ubumwe n’ubwiyunge, ubukungu bugera kuri wese, amahoro n’umutekano.”

Mu kugaragaza uko igihugu cyari kimeze mu 1994, Madamu Jeannette Kagame yavuze ko cyari ahantu habi ku buryo abantu benshi ku Isi bavugaga ko kitazongera kuba igihugu kiriho.

Ati “Mu 1994 Isi yadufataga nk’igihugu kitariho. Muri icyo gihe abantu bake nibo bemeraga ko umunsi umwe mu myaka 26 ishize, u Rwanda ruzongera kuba ahantu hakomeye hazaba agace k’ubukerarugendo.”

“Burya kubaho nta byiringiro ni nko kubaho utanyurwa, birasa nko kubaho uhakana ingufu z’Imana yakoresheje ngo itugeze mu buzima turiho uyu munsi. Mu kureba amateka yacu mu myaka irenga 20 ishize tugomba no kwemera icyizere ko kiriho, iri jambo ryakomeje kuba ku isonga y’ururimi rwacu, bikanaduha ingufu n’impamvu zo gukomeza guharanira ejo heza.”

Yabwiye abitabiriye aya masengesho ko mu myaka 26 ishize, abantu bakomeje kugendera ku mbabazi z’Imana n’icyizere kuko bamwe bakekaga ko hari ibitazashoboka.

Ati “Icyo gihe abantu bake nibo bemeraga ko u Rwanda ruzongera gukurura ishoramari rikomeye n’ubufatanye tubona uyu munsi n’ibindi byinshi turimo kubona byiza.”

Nubwo bimeze gutyo, Madamu Jeannette Kagame yavuze ko bibabaje kuba uyu munsi hakiri ibibazo byugarije Isi, birimo abantu bakomeje gusonza, abana bakomeje kubura ibiryo bifite intungamubiri n’ibindi.

Ati “Ni gute mu kinyejana cya 21 tugifite abana miliyoni 149 bari munsi y’imyaka itanu bakomeje kugwingira? Mu myaka itatu ishize umubare w’abantu bahura n’inzara wagiye wiyongera, aho miliyoni 820 ku isi kugeza ubu bashonje, mu gihe muri Bibiliya Yezu aduhamagarira guhaza buri wese.”

Yibukije abakiri bato gukomeza ibyagezweho mu myaka 20 ishize, no gukomeza gukorana ingufu ngo ibyateguwe bizagerweho mu cyerekezo 2050.

Umuyobozi Mukuru w’Ishami ry’Umuryango w’Abibumbye ryita ku biribwa, David Beasley, yavuze ko bibabaje kuba mu masegonda atanu hapfa umuntu yishwe n’nzara, mu gihe ubutunzi bw’isi bugeze kuri tiliyari 300 z’amadorali ya Amerika.

Yagize ari “Abantu baricwa n’inzara mu gihe abantu bafite ubutunzi bungana gutya.”

Yakomeje agira ati “Yesu yaravuze ngo nari nshonje ntimwangaburira, nari mfite inyota ntimwampa icyo nywa, nari nambaye ubusa ntimwanyambika, nari mu nzu y’imbohe ntimwansura.”

Yagaragaje ko amaze kuyobora PAM, yahise yumva iyi nyigisho neza kuko ubu iri shami ayobora rigaburira abantu bagera kuri miliyoni 90 ku munsi.

Yavuze ko Yesu yamaze imyaka itatu yigisha gukundana, ndetse asiga avuze ko abantu nibakundana aribwo azamenya ko ari abigishwa be nyamara ababishyira mu bikorwa ni mbarwa.

Yagize ati “Ubukungu bw’Isi bwagiye bwiyongera ariko ubukene n’inzara nabyo biriyongera, kubera iki? Ni ukubera intambara ziterwa n’irari ry’abikunda, niyo mpamvu nshima u Rwanda kuko ubukene bwagiye hasi, abicwa n’inzara baragabanutse kubera ubuyobozi bwiza bugendera ku mahame y’Imana.”

Umuyobozi wa Rwanda Leaders Fellowship, Munyemana Eric, yavuze ko insanganyamatsiko yatoranyijwe uyu mwaka, ijyanye n’icyerekezo cy’u Rwanda kirangajwe imbere na Perezida Paul Kagame.

Yagize ati “Ubu twatangiye icyerecyezo 2050 ariko muri icyo gihe turangije twifuje ko dufata akanya ko gushima aho tugeze no kunyurwa n’ibyo twagezeho, no kuduha imbaraga z’icyerekezo cy’ejo hahaza.”

Yavuze ko byagorana gutekerezo ejo utanyuzwe n’uyu munsi, kuko ibyo wagezeyo uyu munsi ari intango y’iby’ejo.

National Prayer Breakfast ni amasengesho ategurwa n’Umuryango, Rwanda Leaders Fellowship.

Yatangijwe mu 1995 agamije gushyira hamwe abayobozi bakuru mu kwiyegereza Imana, bagasangira, hakabaho gusengera igihugu n’abayobozi bacyo ndetse bagasangira ijambo ry’Imana.

Wabaye umwanya wo guhimbaza Imana mu ijwi riranguruye
Abantu bashimye Imana mu buryo butandukanye
Abanyamahanga bafashe umwanya bashima Imana ku byo yakoreye u Rwanda
Hari amafunguro atandukanye...
Abanyamahanga bishimiye umuco w'u Rwanda wo gushimira Imana
Abanyarwandakazi bagaragaje umuco nyarwanda mu mbyino
Abantu batandukanye bavuye mu matorero atandukanye bitabiriye aya masengesho yo gusengera igihugu
Minisitiri w'Ingabo Maj Gen Murasira Albert yitabiriye aya masengesho
Minisitiri w'Intebe Dr Ngirente Edouard yitabiriye aya masengesho
Minisitiri w'Intebe Dr Edourd Ngirente aganira n'abandi bari bitabiriye aya masengesho
Minisitiri w'Ubuhinzi n'Ubworozi, Dr Gerardine Mukeshimana aganira na nyir'ibitaro bya Legacy Clinic, Jean Malic Kalima
Minisitiri w'Ubutegetsi bw'Igihugu, Prof Shyaka Anastase yitabiriye umuhango wo gushima Imana ku byo yakoreye u Rwanda
Minisitiri w'Ibikorwa Remezo, Amb Gatete Claver, nawe yari mu bayobozi benshi bitabiriye
Minisitiri wa Siporo Aurore Mimosa Munyangaju (hagati) akurikiranye gahunda yo gushima Imana no gusengera abayobozi bakuru
Perezida wa Sena, Augustin Iyamuremye, nawe yari yitabiriye aya masengesho
Umuyobozi wungirije wa Kaminuza y'u Rwanda ushinzwe Iterambere, Dr Murigande Charles, mu ifoto n'abanyamahanga bitabiriye aya masengesho
Prof Sam Rugege wigeze kuba Perezida w' Urukiko rw'Ikirenga yitabiriye umuhango wo gushimira Imana ku byo yakoreye u Rwanda
Senateri Nyirasafari Esperance (iburyo) nawe ari mu bayobozi bitabiriye
Depite Uwamariya Odette; Umucamanza mu Rukiko rw'Ikirenga, Richard Muhumuza ari kumwe n'umugore we Dr Usta Kaitesi usanzwe ari Umukuru w'Urwego rw'Igihugu rw'Imiyoborere
Umujyanama wa Perezida wa Repubulika mu by'Umutekano, Gen James Kabarebe ari kumwe na Visi Perezida w'Inteko Ishinga Amategeko umutwe w'Abadepite, Edda Mukabagwiza
Umunyamabanga Mukuru wa RIB, Col Ruhunga Jeannot, nawe yitabiriye uyu muhango
Umuyobozi w'Umujyi wa Kigali, Rubingisa Pudence, nawe yari mu bitabiriye
Umushumba wa Evangelical Restoration Church, Masasu Joshua, nawe ari mu bari muri aya masengesho
Umuyobozi wa Paruwasi ya Remera mu Itorero Angilikani, Rev Past Dr Antoine Rutayisire nawe yitabiriye uyu muhango wo gushima Imana
Perezida w'Urukiko rw'Ikirenga, Faustin Nteziryayo, ari kumwe na Dr Charles Muligande muri aya masengesho
Gushima Imana kandi byitabiriwe n'abantu bavuye mu bihugu 10 birimo Leta Zunze Ubumwe za Amerika
David Beasley yavuze ko u Rwanda rurangajwe imbere n'ubuyobozi bukorera Imana rwarwanyije ikibazo cy'inzara
Dr Ivan Twagirishema yavuze ko u Rwanda rufite byinshi Imana yarugejejeho
Umuyobozi w'Umuryango wa Bibiliya mu Rwanda, Mukamakuza Therese, ubwo yavugaga isengesho muri iki gikorwa
Madamu Jeannette Kagame yavuze ko Imana yanyuze mu bayobozi bafite icyerekezo bagarura mu gihugu abantu bayo
Umuyobozi Mukuru w'Ishami ry'Umuryango w'Abibumbye ryita ku biribwa, David Beasley, yavuze ko buri sogonda hapfa umuntu azize inzara
Umuyobozi wa Rwanda Leaders Fellowship, Munyemana Eric, ageza ijambo ku bitabiriye
Madamu Jeannette Kagame yavuze ko hari abantu bumvaga ko u Rwanda rutazongera kuba igihugu gikomeye
Madamu Jeannette Kagame yavuze ko ubu u Rwanda rwabaye igihugu gikurura abashoramari nyuma yo kongera kwiyubaka
Uyu muhango wo gushima Imana witabiriwe n'abantu barenga 700
Abayobozi batandukanye n'inshuti z'u Rwanda bitabiriye gahunda yo gushima Imana
Hafashwe ifoto y'urwibutso ku bayobozi bitabiriye

Amafoto: Niyonzima Moise

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Gatebe 2020-01-13 23:24:05

Ko nta Hon. Bampotikimbona muri aba bayobozi?!

2
rimas 2020-01-13 10:59:10

ubumwe nubwiyunge ntiburagera mumatorero EX : metodiste ribre iyobowe na kayinamura samweri byumwihariko comferanse KINYAGA iyobowe na habiyambere cerestin numwiryane gusa bakwiye kwigishwa !

3
Mwimwi 2020-01-13 07:39:47

Uri umubyeyi wuzuye imbere n’inyuma , ufite ubwenge, ufite ubuntu butagereranywa, ufite umutima wagutse, ufite urukundo, uca bugufi, nta kintu na kimwe udaha agaciro, mbese uratangaje! Dushimira Imana yakuduhaye ngo utubere urugero. Genda Rwanda ufite Imana koko

4
Kina 2020-01-13 01:04:46

Yagaruye abayo?

Kwamamaza