Mu gihe hagiye kuba Inama y’Igihugu y’abana ya 12, Ikigo ‘Umurage Communication for Developmen (UMC) cyakebuye ababyeyi gito batoteza abana, kuko byabaviramo ubuzererezi.

Abanyarwanda bavuga ko ‘umwana apfa mu iterura’ bisobanuye ko igihe cyose umwana akuriye ku nkeke no kubura urukundo rwa kibyeyi bimugiraho ingaruka kandi abakamurengeye aribo babigizemo uruhare.

Agendeye ku nsanganyamatsiko y’Inama y’Igihugu y’Abana ya 12 igira iti “Uburere buboneye: Inkingi yo kubaka u Rwanda twifuza”, Kwizera Jean Bosco uyobora UMC yasabye ababyeyi kwirinda guhoza ku nkeke, abana.

Akangurira ababyeyi batoteza abana kwigira ku ikinamico ‘Umurage’ aho umwana ‘Zabayo’ yishwe n’agahinda akaba yaratorongeye kubera kubuzwa amahwemo.

Yagize ati “Mbere yo kugira ngo dukine ikinamico, tubanza kwegera abaturage tukamenya ibibazo bafite, ababyeyi rero badatanga uburere ku bana babo barahari ayo makuru turayabona, no mu ikinamico ‘Umurage tubagaragazamo’. Biranashimishije kuba inzego bireba barasanze iyo nsanganyamatsiko ikwiye kugarukwaho mu Nama y’Igihugu y’Abana ku nshuro ya 12."

Yongeyeho ati “Turifuza ko ababyeyi n’abandi bose bakurikira ikinamico umurage kugira ngo bumve agahinda k’umukinankuru ‘ Zabayo’, ni umwana watotejwe n’ababyeyi bakamushora mu mirimo ivunanye bamusibije ishuri, bigeraho arabacika.”

‘Zabayo’ ni urugero ku babyeyi basibya abana ishuri , bagira amanota mabi bakabahanisha ibihano bikarishye kandi aribo babigizemo uruhare.

Yagiye gushaka akazi ko mu rugo, nyirabuja nawe ntiyamworohera amumenaho amazi, aramutoteza byose bifite inkomoko ku babyeyi bababaye gito.

Kwizera avuga ko igihe umubyeyi atitaye ku burere bw’umwana nawe ubwe bimugiraho ingaruka na sosiyete muri rusange.

Ati “Iyo umwana yakuze nabi adafite uburere umubyeyi nawe bimugiraho ingaruka, iyo yibye niwowe aheraho, iyo arwaye indwara runaka ni wowe umuvuza.”

Ubusanzwe ikinamico ‘Umurage’ itambutsa ubutumwa bwibanda ku ngingo enye harimo guharanira uburenganzira bw’abana, kurwanya ihohoterwa rishingiye ku gitsina, kwigisha ubuzima bw’imyororokere ndetse no guharanira kugira imirire myiza.

Iyi kinamico inyuzwa kuri radiyo umunani mu rwego rwo gusakaza ubutumwa buyikubiyemo bukagera ku bantu benshi zirimo; Radio Rwanda; Radio 10; City Radio; Isango Star; Radio Salus; Radio Ishingiro; Radio Izuba na Radio Isangano.

muyobozi Mukuru w’Umurage Communication for Development, Kwizera Jean Bosco


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved