IGIHE

Ibitekerezo bya Dr Havugimana wiyamamariza kuba Umusenateri

6 11-09-2019 - saa 08:03, Habimana James

Tariki 16, 17 na 18 Nzeri 2019 hateganyijwe amatora y’abasenateri, kugeza ubu ibikorwa byo kwiyamamaza ku bakandida 63 bazavamo 12, bizarangira tariki 15 saa kumi n’ebyiri za mu gitondo.

Dr Emmanuel Havugimana ni umwe mu nararibonye u Rwanda rufite uyu munsi, akaba yiyamamaza kuzatorwa mu bakandida 15 bo mu Ntara y’u Burengerazuba aho afite nimero karindwi. Muri iyo ntara hari gushakwamo abasenateri batatu.

Bimwe mu bigwi bya Dr Havugimana

Uretse kuba asanzwe amenyerewe mu gutanga ibitekerezo mu kiganiro cyizwi kuri Radio Rwanda ‘Isi ya None’, Dr Havugimana ni umwarimu muri Kaminuza y’u Rwanda aho amaze imyaka 22.

Dr Havugimana yavutse mu 1956 mu Murenge wa Mbazi mu Ntara y’Amajyepfo.

Amashuri yisumbuye yayigiye mu Karere ka Karongi na Nyamasheke, ayarangiriza i Bujumbura mu 1980.

Icyiciro cya kabiri cya Kaminuza yakigiye muri Kaminuza y’u Burundi, icya gatatu acyigira muri Kaminuza ya Laval muri Canada, naho impamyabumenyi y’ikirenga ayikura muri Kaminuza ya Gothenburg muri Suède. Arubatse afite abana bane n’umwuzukuru umwe.

Dr Havugimana yakoze cyane mu bijyanye n’uburezi mu bihugu birimo u Burundi, Djibouti n’u Rwanda kugeza ubu amaze imyaka 37 akora mu burezi.

Mu yindi mirimo yakoze yabaye Perezida w’Inama Njyanama y’Umurenge wa Tumba mu Karere ka Huye, ubu ni Umujyanama mu nama Njyanama y’Akarere ka Huye aho ahagarariye Umurenge atuyemo wa Ruhashya kuva mu 2016.

Dr Havugimana ubu ni Perezida w’Inama y’Abakomiseri muri Komisiyo y’igihugu yo kurwanya Jenoside, CNLG.

Si ubwa mbere agiye guhatanira kuba umusenateri kuko mu 2011 yabaye umukandida w’Intara y’Amajyepfo, yongera mu 2015 ari kumwe na Senateri Mucyo Jean de Dieu aho bashakaga gusimbura Dr Jean Damascene Bizimana, wari umaze kuba Umunyamabanga Nshingwabikorwa wa CNLG.

IGIHE: Ubunararibonye bwawe buzagufasha gute mu gihe uzaba utowe?

Dr Havugimana: Nk’inararibonye wabaye hirya no hino mu bihugu birenga 18 ku migabane itatu, Afurika, u Burayi na Amerika, baravuga ngo akanyoni kataguruka ntikamenya iyo bweze, kandi ngo inararibonye ntizerera ahubwo iba igiye gushaka ubwenge, aho hose nagiye nahaboneye ubumenyi niteguye gukoresha mu kubaka igihugu cyanjye.

Impamvu nshaka kujya muri Sena ni ukugira ngo nifatanye n’abandi banyarwanda kugira ngo turebe ukuntu twatanga umusanzu wacu kuko Sena ni urwego rushinzwe gushishoza amategeko yatowe kugira ngo barebe koko ayo mategeko yubahirije uburenganzira bw’ikiremwa muntu, hari amategeko ngenga ayo ni Sena iyatora ikongera ikagira ububasha bwo kwemeza abantu bahawe imyanya y’ubuyobozi bukuru nk’aba ambasaderi, mu kubemeza rero harebwa niba koko wa muntu ari mu mwanya akwiye bakareba niba koko ari umuntu ufite icyo yamarira igihugu ku buryo bwuzuye.

Sena kandi ifite uburenganzira bwo gukurikirana imitwe ya politike ikorera mu Rwanda ibinyujije mu ihuriro ry’imitwe ya politike kuko iki gihugu cyacu cyavuye kure muri Jenoside yakorewe Abatutsi mu 1994, ntabwo dushaka ko haza undi mutwe ushobora kugendera ku bintu by’amacakubiri byatuma abanyarwanda bongera gusubiranamo bihereye ku turere, amoko n’ibindi.

Imirimo nkora, ibyo nabayemo, ibyo nsoma n’ibindi numva ari ibintu bimfashe ku mutima, nkumva ko ngiye hamwe n’abandi basaza b’inararibonye hari icyo twamarira igihugu kuko abasenateri ni abantu bashobora kugira inama Perezida wa Repubulika, yego afite abajyanama be ariko ibitekerezo bivuye muri Sena, Perezida wa Repubulika na we abyitaho akareba ko hari ibyo yakuramo byagirira igihugu akamaro, nshoboye kugera muri urwo rwego nkifatanya n’abandi banaribonye, hari icyo twatanga gikomeye.

IGIHE: Kuki wahisemo kwiyamamaza mu Ntara y’u Burengerazuba?

Dr Havugimana: Mpafite amateka mu bwana bwanjye, ndahazi kandi nahize amashuri yisumbuye ahitwa mu Birambo mu Karere ka Karongi na Nyamasheke, ikindi ni uko ndi umuturage waho ku Kibuye, niyumvamo iyo ntara ku buryo abaturage baho bangiriye icyizere nabavugira ibibazo bafite kubera ibyo nigisha by’ubumenyi bw’Isi, ibi bituma menya ibibazo byihariye bya buri ntara, ibyo mu Burengerazuba bw’umwihariko ndabizi cyane.

IGIHE: Iyo wiyamamaza ni iki cyibanze uba ushyize imbere?

Dr Havugimana: Mba mbabwira ibintu birimo ubuzima bwanjye, ibyo nakora ndamutse ntowe harimo ubumwe bw’abanyarwanda kuko niryo shingiro kugira ngo igihugu kibeho, nkababwira umurimo unoze, icya gatatu ni ubutabera kuri bose kuko iyo igihugu kirimo akarengane, umuntu akumva ko adafite uwo aregera, umwe akumva ko afite uburenganzira buruta ubw’ubundi, icyo gihugu kirasenyuka, hagomba kubaho rero ubutabera kandi bufite amategeko atarenganya. Muri make mbabwira ubumwe, umurimo n’ubutabera nk’uko uyu munsi bihari, ko tugomba kubisigasira.

Muri Ngororero barambajije ngo nzabakorera iki? Nababwiye ko muri aka gace n’u Burengerazuba muri rusange ibibazo bafite mbizi. Akenshi usanga bijyanye n’imiterere yaho y’imisozi miremire, iyo imvura iguye hakunda kuba inkangu bigatwara abantu, tuzareba ibijyanye n’imiturire y’abantu, kubungabuga ibidukikije, kurwanya isuri n’ibindi bituma abantu bapfa, bigomba kugabanuka kandi n’ahandi ni uko nzabikora mu gihugu, iyo tuganira mbabwira ko udatoye Dr Havugimana waba wihombeje.

IGIHE: Ni uwuhe musanzu wawe mu guhangana n’abanyereza umutungo wa leta nutorwa?
Dr Havugimana: Iki ni ikintu abaturage bakunze kumbaza nko mu Karere ka Rutsiro barakimbajije, nababwiye ko uko bigomba kugenda ni uko niba umuntu akoze aya makosa ntabwo akwiye gufungwa gusa ahubwo akwiye no kwishyura iby’abaturage, mfatanyije n’abandi ndetse n’amategeko ariho, tuzareba icyakorwa ngo iki kibazo gikemurwe.

IGIHE: Mu bumenyi ufite, ni iki abanyarwanda bakwiye kwishimira?

Dr Havugimana: Hari ikintu abantu badakunda kugarukaho, Abanyarwanda bakwiye gufata iki gihugu mu buryo budasanzwe ariko bakwiye gufata Perezida Kagame nk’umuntu udasanzwe by’umwihariko.

Gufata igihugu byari ikintu gikomeye ariko kukiyobora umaze kugifata birakomeye kurenza, ikintu gikomeye nshimira Perezida Kagame ni uko yanze y’uko abarokotse Jenoside bihohera, umwana yarazaga afite imbunda yagera iwabo agasanga umuryango we warazimye kandi abaturanyi be bahari, ariko ntagire uburenganzira bwo kwihorera, icyo kintu ndacyimushira kuko n’ababigerageje barahanwe, iyo biza kuba intambra ntiyari burangire.

Yakuyeho amoko kuko ubu turi abanyarwanda, gahunda ya ndi umunyarwanda niyo gahunda izatuma dutera imbere.

Kugeza ubu mu Ntara y’u Burengerazuba hazatora abantu 488, aba bazava mu nama Njyanama z’Uturere, kongeraho biro za Njyanama z’Imirenge ni ukuvuga abantu batatu muri buri Murenge.

Dr Havugimana yagaragaje ko ubunararibonye afite yiteguye kubukoresha natorerwa kuba Senateri
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Christiann 2019-09-12 03:05:38

Musaza tukuri inyuma, natwe turi mu zindi ntara turakwemera cyane kubwo kwicisha bugufi ugira, ubumenyi ndetse n’ubuhanga tukuziho, ntagushyidikanya ko waduhagararira neza!.

2
Paul 2019-09-11 23:05:14

Bonne chance Dr,ndakwibuka uyoboye Registrariat muri N.U.R.

3
Dusabimaana Innocent 2019-09-11 08:26:42

Bonne chance kuri candidate senate Dr. Emmanuel nukuri nagirirwa ikizere agatorwa azatubera intumwa nziza bitewe nubusesenguzi agira kandi nubusanze ageza ibitekerezo byubaka kubanyarwanda gusa bwo byaba bifite imbaraga zirenzeho kuko yajya agira nuruhare mugukurikirana ishyirwa mubikorwa ryabyo.

4
Annexode Janvier IGIRANEZA 2019-09-11 03:51:01

Uyu mugabo ndamuzi cyane numuntu ufite mumutwe heza.

5
gerard 2019-09-11 02:53:20

Uyu musaza namubonye kuri rtv asobanura ideologie ya genocide n’ububi bwayo hamwe na Dr Jean Baptiste. Ni umuhanga naramuka atowe ategerejweho umusanzu ukomeyemu iterambere ry igihugu.ni INARARIBONYE PE!

6
Ritabeshya 2019-09-11 02:08:29

Dear Dr,
Ndanyurwa iyo nkurikiye ibiganiro utanga kuri Radio. Ugira ibitekerezo bisobanutse. Nta shiti uzaba Senateri w’Igihugu cyose. Amahirwe menshi n’imirimo myiza

Kwamamaza