Ibihano bihanitse byatangwaga ku bukererwe bwo kwishyura imisoro bishobora kugabanywa

26 13-06-2018 - saa 17:09, Ferdinand Maniraguha

Ikigo cy’Igihugu cy’Imisoro n’Amahoro, RRA, cyatangaje ko hari kurebwa uburyo bwo kugabanya ibihano bihabwa abakererwa kwishyura umusoro, bituma hari ubwo umuntu yisanga atazabasha kubyishyura agahitamo gufunga ubucuruzi bwe.

Kuri uyu wa Gatatu nibwo abayobozi ba RRA bari imbere ya Komisiyo y’Inteko Ishinga Amategeko ishinzwe gukurikirana imikoreshereze y’umutungo wa Leta, PAC, hasuzumwa ibibazo byagaragajwe muri raporo y’Umugenzuzi Mukuru w’Imari ya Leta ya 2016/2017.

Iyo raporo hari aho yagaragaje ko RRA ifitiwe ibirarane by’imisoro bingana na miliyari 161.8 Frw, amenshi akaba ari ayaturutse ku bihano byahawe abasora bakananirwa kubyishyura.

Byiyongeraho ko isesengura ryagaragaje ko muri izo miliyari 161 na miliyoni 825 z’amafaranga y’u Rwanda RRA ifitiwe, miliyari 132.08 Frw ari zo bizashoboka kugaruza naho miliyari 29.7 Frw bitazashoboka.

Komiseri Mukuru wa RRA, Tusabe Richard, yavuze ko hafi 40% y’ibyo birarane ari ibihano n’inyungu bishamikiye ku bihanitse byashyiriweho abakererwa kwishyura umusoro, ku buryo hari ubwo umuntu akererwa kwishyura umunsi umwe agahita acibwa 60% nk’igihano.

Yakomeje agira ati “Hashobora kubaho impamvu nyinshi umuntu yakererwa kwishyura umunsi umwe cyangwa icyumweru kimwe. Umuntu ashobora kurwara, ikoranabuhanga ry’icungamari rishobora kugira ikibazo, ibyo byose ni ibintu tugomba guha agaciro tukareba uko dufasha abasora.”

Tusabe yavuze ko uburemere bw’ibihano butuma hari igihe uwahanwe ajugunya nimero y’ubucuruzi (TIN Number) yasoreragaho agatangira ubundi cyangwa akabivamo, wajya kumureba aho yakoreraga ugasanga hari abandi.

Yakomeje agira ati “Turumva nituvugurura ibyo bihano biremereye bizaha amahirwe abasora, ufite ubushake bwo kwishyura tumuhe amahirwe yo kwishyura aho kugira ngo ajugunye TIN Number n’ubucuruzi bwe yigendere”.

“Turimo kuvugurura, nibura tubishyire mu byiciro, wenda uwakererewe ukwezi kumwe ushobora kumuca 10%, ukwa kabiri wenda ukamuca 15 %, byagera ku mezi atandatu ukamuca ya 60%.”

Ibihano bihabwa abakererewe kwishyura imisoro biramutse byorohejwe, ngo hari abavaga mu bucuruzi babugumamo kuko ubu nibura abantu ibihumbi 20 babwinjiramo, hafi ibihumbi umunani bahita babuvamo.

Depite Mukakarangwa Clotilde yasabye ko mu gihe byagaragaye ko hari abantu benshi bananiwe kwishyura ibihano, byasuzumwa bakababarirwa aho gukomeza kubabaraho umwenda batazabasha kwishyura cyangwa bagahagarika ubucuruzi.

Yagize ati “Habaho uburyo abantu baterana bakabyigaho, bakareba uko babicukumbura. Niba uwo muntu atakibashije gusora bya birarane ariko afite ubushake bwo kuba yasora wa musoro w’ibanze, ibyo birarane bikaba byakurwaho.”

Itegeko risanzweho riteganya ko igihe usora adashoboye kwishyura imisoro abigaragaza, Minisitiri w’Imari n’Igenamigambi akaba ari we ubifataho umwanzuro.

Ikigo cy’Igihugu gishinzwe imisoro n’Amahoro kigaragaza ko mu mwaka wa 2016/2017 hakusanyijwe imisoro ingana na miliyari 1102.88 z’amafaranga y’u Rwanda, mu gihe intego yari yihawe yari miliyari 1094.3 Frw. Uyu mwaka wa 2017/2018 RRA iteganya gukusanya umusoro ungana na miliyari 1200.3 Frw.

Komiseri Mukuru wa RRA, Tusabe Richard imbere y'abadepite kuri uyu wa Gatatu
Visi Perezida wa PAC, Depite Karenzi Theoneste abaza abayobozi ba RRA
Abadepite bagize PAC bakomeje gukurikirana ibibazo byagaragajwe muri Raporo y'Umugenzuzi Mukuru w'Imari ya Leta
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3  

1
xxxx 2018-06-17 01:35:30

Nishimiye ko mu myaka 10 nzasubira mu bucuruzi. Nibwo nzaba maze kwishyura ibyo bitindi by’ibirarane.

2
Donath 2018-06-16 12:02:25

Ahubwo gusubiza TIN kuki bagutegeka kwishyura Pentante y’umwaka utazakora bikakuyobera amande yo s’agira ngo nukukwihimuraho.yewe nuko 20/20mwarakoze kuyitugezamo PE harya ngo ni vision 20-50 aaahaaaaa?

3
Karoli 2018-06-16 02:43:14

Ibi nibigerwaho bizaba ari byiza. Ikindi RRA yakagombye kwigaho ni uburyo bwo gufasha abari gutangira business cyane cyane abafite ubushobozi buke bakaba basonerwa imisoro mu gihe runaka bakiyegeranya! Hari ubwo kdi babara ngo imyenda babereyemo kdi itazigera yishyurwa. Urugero muri iyi minsi ishize twahuye n’ibiza hari abantu benshi bafunze burundu business zabo...nk’abo aho kubarwaho ayo bagomba kwishyura ahubwo RRA yagombye kubatera inkunga bakongera bakegura umutwe!!! Ko nsetsa c ibi bizaba ryari? Hhhhh.

4
Rochereau 2018-06-16 00:46:02

Harakabaho leta yubumwe icyinicyo kibazo cyarigisigaye cyenda gusaza abanyarwanda none nacyo gitekerejweho ameen

5
Minani 2018-06-15 14:27:23

Inteko yacu irakora neza pe.Abigaruriye ibyarubanda yamaze kubashyira ahagaragara.Ikibazo ni kimwe gusa nuko akazi keza nk’aka igakora iyo hasigaye amezi make ngo hatorwe indi!Mandat yose bayikoresheje uku byatanga umusaruro ufatika!

6
Kk 2018-06-15 13:30:40

Mubyibutse mutinze abenshi barahunze bacururiza hanze

7
rubya 2018-06-15 13:00:18

ibyo ndabibashimiye ariko mwibuke nibiri kubera mumabank hano murwanda aho usanga icyitwa CRB kizengereje abantu urajya gushaka inguzanyo ukajya kunva ngo Hari milioni ufitiye BK wabaza bati twagucungiye compete. ubu twahisemo kujya tuyacukurira kuko ntauba wabahaye akazi ko gucunga compete ziriho 0fr nabyo muzabisuzume munarebe ko Bank zo murwanda zubahiriza amabwiriza ya BNR kimwe.

8
Ange kabandana 2018-06-15 01:22:02

Igitekerezo kizima rwose, abantu bari baragowe, muzige ukuntu umusoro wa forfait/flat wagabanuka ku bacuruzi bato n’abaciriritse kuko ugabanya akazi kandi uroroshye kugenzura

9
aline 2018-06-15 01:09:48

Murakoze rwose igihugu cyacu kirimo gukorera neza abaturage bacyo ngewe nkubu ndabarwaho imisoro kuva 2015 nasanze ari milioni eshatu kandi sindatunga nibihumbi ijana ubwo nahisemo kwicecekera kuko nabonye ntakundi ariko RRA idufashe umuntu werekanye ko atakishyura imisoro bajye bamuhwitura hakiri kare afungishe tin number ye kuko harigihe umuntu ajya mubucuruzi agashya ntiyibuke kubifungisha hanyuma nyuma yigihe ugasanga byamukomeranye noneho bikaze,umuntu nimba amaze amezi atatu adasora mumenye impamvu munamusibe hakiri kare cyane ko abenshi batanaziko kutisibisha harizindi ngaruka bitera murakoze cyaneeeee

10
Aloys Twagirimana 2018-06-15 00:48:33

Ndabasuhuje kandi mbabwirako nishimiye imikorere yanyu, kubirebana niby imisoro ndabibutsako bitera abantubenshi guhagarika business bakoraga mu Rwanda ahubwo bakajya mubindi bihugu bidakaza imisoro .naho kuba umuntu yabuze ubwishyu mukwezi hakiyongeraho10% numva ataribyo ahubwo bamwegera bitaragera aho yacibwa rya 10%

Paji: 1 | 2 | 3  

Kwamamaza