Ibigo by’icyitegererezo mu burezi by’u Rwanda mu bihagaze neza muri Afurika

1 14-09-2018 - saa 10:13, David Eugène Marshall

Ibigo bibiri by’icyitegererezo mu bushakashatsi (African Centers of Excellence) bibarizwa muri Kaminuza y’u Rwanda, biri mu bihagaze neza muri Afurika, aho biri muri bitanu bya mbere.

Muri Mutarama 2016, ku bufatanye bwa Banki y’isi n’u Rwanda, hatangijwe ibigo bine by’icyitegererezo biri ku rwego rwa Afurika. Byashowemo agera kuri miliyoni 20 z’amadolari ya Amerika, u Rwanda rwafashe nk’inguzanyo isanzwe.

Ibyo bigo ni iby’icyitegererezo by’imyigishirize n’ubushakashatsi mu bijyanye n’ubumenyi mu ikoreshamibare; mu bijyanye na murandasi y’ibintu mu iterambere , mu bijyanye n’ingufu mu iterambere rirambye n’udushya mu myigishirize y’imibare na siyansi.

Kuri uyu wa Kane itsinda ry’impuguke za Banki y’isi ziturutse i Washington DC, zaje kureba uko imikorere ya bene ibyo bigo bigera kuri 24 biri mu bihugu umunani bya Afurika ihagaze.

Umuhuzabikorwa w’ibyo bigo by’ikitegererezo bikorera mu Rwanda, Prof. Ntagwirumugara Etienne yabwiye IGIHE ko ibi bigo bifasha mu kwigisha abanyeshuri bo ku rwego rw’impamyabushobozi zihanitse (Masters), ndetse n’iz’ikirenga (Doctorat).

Ubu ababyigamo bagera kuri 92 baturuka mu bihugu hafi ya byose muri Afurika, n’abandi 221 bazakirwa muri uyu mwaka mu byiciro n’amashami atandukanye.

Impuguke za Banki y’Isi zatangaje ko mu bigo bitanu biza ku isonga muri 24 muri Afurika, u Rwanda rufitemo bibiri harimo ikibanda kuby’ingufu z’amashanyarazi n’igikorerwamo ibijyanye na interineti.

Prof. Ntagwirumugara avuga ko icyo bibandaho ari uko Akarere ka Afurika y’Iburasirazuba kagira amashanyarazi kose.

Ati “Turi kwibanda mu kureba uko amashanyarazi yo mu karere ka Afurika y’Iburasirazuba yajya ahurizwa hamwe, abafite menshi bagasagurira isoko ku bafite adahagije.”

Mu dushya twagaragarijwe abashyitsi ba Banki y’isi, harimo porogaramu yo gucunga neza umusaruro w’ubworozi bw’inzuki zikiri mu mizinga.

Elias Ntawuzumunsi uri mu cyiciro cy’abakorera impamyabumenyi z’ikirenga (PhD) mu bijyanye n’ikoranabuhanga ryo guhererekanya amakuru ajyanye n’iperereza ryifashisha murandasi ( Wireless Intelligence & Networking ), wamuritse uwo mushinga, yavuze ko iri koranabuhanga ritanga amakuru yose ku mworozi w’inzuki akamenya uko zimerewe mu muzinga.

Ati “Twifashishije iri koranabuhanga, umworozi ashobora kumenya uko inzuki zimerewe ziri mu mizinga yazo ku ntera iri kure, ingano y’umwuka zihumeka, hamwe no kumenya niba hari igikubaganije umuzinga kandi atawegereye. Amakuru yose akayabonera kuri mudasobwa cyangwa telefoni ye igendanwa.”

Mubindi iri koranabuhanga ryakwifashishwamo kandi, hari ukuba rishobora gucunga umutekano n’ubuzima bw’abana baba basizwe mu ngo n’ababyeyi bagiye ku mirimo, hamwe no mu kureba uko abo bana bamerewe mu gihe baryamye mu byumba bitandukanye n’iby’ababyeyi babo.

Muri icyo gihe ngo umubyeyi ashobora kuzajya amenya ibipimo by’umuriro umwana afite n’uko ahumeka, ndetse no kumenya niba hari ikintu runaka kimusatiriye gishobora kumugirira nabi hifashishijwe telefoni igendanwa.

Abafite amatsiko berekwaga byose n'uko bikorwa
Amatsiko yari yose mu mpuguke za Banki y'Isi zakurikiranaga uko ikoranabuhanga ryo mu bigo by'ibyitegererezo rikora
Hasobanuwe uko ubuzima bw'inzuki mu ziri mu mutiba zacungirwa ubuzima hifashishsijwe ikoranabuhanga
Itsinda rya Banki y'isi ryereswe uko ikoranabuhanga rishobora kwifashishwa mu kuzigama ingufu z'amashanyarazi n'uko ashobora gusaranganywa mu gihe yabaye make
Ni ikigo gifite ibikoresho byo ku rwego rwo hejuru byifashishwa mu guhuza amakuru y'ikoranabuhanga ryifashishwa mu bijyanye n'amashanyarazi
Ntawuzumunsi Elias yakoze porogaramu yo gucunga neza umutekano n'ubuzima bw'inzuki yakwifashishwa n'abavumvu kuri telefoni zabo


[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
turayisenga delphine 2018-09-14 04:21:15

Birashimishije rwose nugukomerezaho nta kwirara kuko iterambere ririmo kwihuta cyane.

Kwamamaza