Abanyamuryango ba Rotary Club, umuryango ukora ibikorwa by’ubugiraneza birimo gufasha abatishoboye no gutera inkunga amashuri n’amavuriro, batangiye ibikorwa byo kurengera ibidukikije no kubibungabunga.

Abo mu Karere ka Huye ku wa 11 Ugushyingo 2017, bazindukiye mu gikorwa cyo gutera ibiti bivangwa n’imyaka ahazwi nko ku Itaba.

Ni igikorwa bavuga ko batangiye bitewe n’uko Perezida wa Rotary Club ku isi yasabye ko buri munyamuryango yitabira kwita ku bidukikije by’umwihariko atera ibiti kandi akanabibungabunga kugira ngo bikure neza.

Umuyobozi wa Rotary Club ya Huye, Isidore Mahara, yavuze ko kuri iyi nshuro bamaze gutera ibiti birenga 160

Ati “Perezida wacu ku isi yasabye ko twitabira gutera ibiti no kubyitaho kuko muri iki gihe hari ikibazo cy’ihindagurika ry’ibihe. Twateye ibiti birenga 160 kuko turacyari bake hano i Huye, hari bamwe bimutse batakiba ino, gusa turi gushaka uko tubongera”.

Bamwe mu banyamuryango bo mu Karere ka Huye baganiriye na IGIHE bemeza ko iyo gahunda yo kwita ku bidukikije bazayikomeza kuko ari ikintu cy’ingenzi kuri bo.

Rutiyomba Eustache ati “Iyi gahunda yo gutera ibiti no kubungabunga ibidukikije turayishimiye kandi tuzayikomeza kuko ni ingenzi, niyo mpamvu twazanye n’abana bacu kugira ngo tubatoze uwo muco”.

Abanyamuryango ba Rotary Club mu Karere ka Huye basanzwe bakora ibikorwa bitandukanye bigamije iterambere.

Mu 2011, bahaye ibitaro bya Kaminuza bya Butare CHUB, ibikoresho byo mu nzu y’imbagwa ndetse wongera no guha ibyo bitaro ibindi bikoresho muri 2015, byose byatwaye ibihumbi 12 by’Amayero.

Muri uyu mwaka wa 2017, bubatse biogaz zirenga 100, mu turere twa Huye, Nyamagabe na Nyanza.

Rotary Club ni Umuryango washinzwe mu 1905, ukaba ufite abanyamuryango barenga miliyoni 1,2 babarirwa muri Rotary Clubs 35, 000 mu bihugu n’uduce birenga 220 aho ifasha abatishoboye n’abafite ibibazo bikomeye.

Ishami ryayo mu Rwanda ribarizwa muri Rotary Club District 9150 igizwe n’ibihugu 10 birimo u Burundi, Cameroun, Congo, Gabon, Guinée Equatoriale, Repubulika Iharanira Demokarasi ya Congo, Repubulika ya Centrafrique, Tchad na Sao Tomé-et-Principe.

Abana bato na bo batozwa gukurana umuco wo kwita ku bidukikije
Abanyamuryango ba Rotary Club mu Karere ka Huye bateye ibiti bivangwa n'imyaka
Abanyamuryango ba Rotary Club i Huye mu gikorwa cyo gutera ibiti hagamijwe kubungabunga ibidukikije
Abanyamuryango ba Rotary Club batoza n'abana ibikorwa byo kubungabunga ibidukikije

[email protected]


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved