IGIHE

Hatangiye iperereza ku banyeshuri b’i Kagugu bakekwaho gukopera ibizamini byateguwe na Leta

0 6-07-2022 - saa 19:18, Ntabareshya Jean de Dieu

Bamwe mu banyeshuri biga mu Ishuri ribanza rya St Dominique Kagugu riherereye mu Murenge wa Kinyinya mu Karere ka Gasabo, bafashwe bakekwaho gukopera ibizamini bisoza umwaka w’amashuri wa 2021/2022.

Mu rwego rwo kuzamura ireme ry’uburezi mu Rwanda, Minisiteri y’Uburezi yashyizeho gahunda y’uko ibigo byose byajya bisuzumwa, hakarebwa ubumenyi bitanga binyuze mu gutegura ikizamini gihuriweho gitangwa mu mpera z’umwaka.

Ibyo byatumye hashyirwaho gahunda ko buri munyeshuri uhereye mu mashuri abanza, ayisumbuye n’ayimyuga n’ubumenyingiro atangira gukora ibizamini bitatu ku mwaka nk’uko byari bisanzwe ariko bigategurwa n’inzego zitandukanye mu gusuzuma urwego n’ubumenyi rw’abanyeshuri.

Ubu ikizamini gisoza igihembwe cya mbere gitegurwa n’umwarimu w’isomo runaka, igisoza igihembwe cya kabiri kigategurwa n’urwego rw’Akarere mu gihe igisoza umwaka mu mashuri yose gitegurwa ku rwego rw’igihugu aho Ikigo cy’Igihugu gishinzwe Ibizamini n’Ubugenzuzi mu mashuri ari cyo gifite izo nshingano.

Mu gihe hirya no hino mu mashuri, ibizamini bisoza umwaka w’amashuri wa 2021/2022, biri gukorwa abanyeshuri 20 bo mu Kigo cya Saint Dominique Kagugu byagaragaye ko bakopeye ibizamini kuko bari bafite impapuro ziriho ibibazo by’ibyakozwe n’ibitarakozwe.

Bivugwa ko mu gihe byaba bigaragaye ko aba bana bakopeye koko, abiga kuri St Dominique Kagugu mu mwaka wa Kabiri kugera mu wa Gatanu w’amashuri abanza bazakora ibizamini bishya, ibintu byagira ingaruka ku basaga 900 biga kuri iri shuri.

Umuyobozi w’Ishuri rya St Dominique Kagugu, Prudencia Pélagie, yabwiye IGIHE ko ibyabaye nta kindi yabivugaho kuko byamaze gushyikirizwa inzego zo hejuru.

Ati “Ibyo nta burenganzira mbifitiye. Ni ukuvuga ngo buri rwego rugira ukuntu rukora, hari abashinzwe ibintu kandi abo ni bo bishyikirizwa. Ibintu byashyikirijwe ababishinzwe njyewe nta yandi makuru mfite naguha. Dufite abashinzwe uburezi badukuriye tunashyikiriza amakuru, abo ni bo wabaza.”

  Ese ibizamini bitegurwa na NESA biba bifite umutekano ku buryo bigezwa ku munyeshuri?

Abantu batangiye kwibaza ku birebana n’umutekano w’ibizamini bitegurwa na NESA buri mwaka n’uburyo bigezwa ku mashuri niba abanyeshuri badashobora kubikopera.

Ubusanzwe ibizamini byategurwaga na NESA bigahabwa abayobozi bashinzwe uburezi mu turere mu buryo bw’ikoranabuhanga “soft document” gusa kuri iyi nshuro byo byakozwe mu buryo butandukanye kuko babihawe mu buryo bw’impapuro.

Uku gutanga ikizamini mu buryo bw’impapuro byatumye NESA itanga akazi ku bantu bakora mu macapiro ko kuzafasha bimwe mu bigo by’amashuri gucapa impapuro zikenewe bijyanye n’umubare w’abanyeshuri bari buri hose cyane mu bigo by’amashuri abanza n’abiga bataha.

Umwe mu barimu waganirije IGIHE yavuze ko ibyo byatanze icyuho ku buryo abanyeshuri bashobora kuba koko bakopezwa haba ku ruhande rw’abo bahawe akazi cyangwa mu bundi buryo mu rwego rwo kugaragaza ko ikigo runaka kigwaho n’abahanga.

Mu kiganiro na IGIHE, Umuyobozi Mukuru w’Ikigo gishinzwe Ibizamini n’Ubugenzuzi mu Mashuri, Dr Bahati Bernard, yavuze ko uburyo ibizamini bitegurwa bikanagezwa ku turere biba bicungiwe umutekano.

Ati “Ikizamini cy’igihembwe cya gatatu gitegurwa ku rwego rw’igihugu ariko kigatangwa ku rw’Akarere. Ni ukuvuga ngo turagitegura tukagiha abayobozi b’akarere akaba ari bo bagitanga. Dukorana n’inzego z’ibanze n’Akarere kuko dutegura ikizamini tukakibashyikiriza mu mutekano. Ntitwaba twarateguye ibizamini ngo hanyuma tube twabiha abanyeshuri cyangwa ngo bibe nta mutekano bifite.’’

Yavuze ko ikibazo cy’abanyeshuri bakopeye ibizamini biga muri St Dominique Kagugu bari kugikurikirana ndetse ko dosiye yashyikirijwe Urwego rw’Igihugu rw’Ubugenzacyaha, RIB, ngo hakorwe iperereza.

Ati “Twagejeje ikibazo muri RIB turategereje. Urumva twagejeje dosiye ku babishinzwe babifitiye n’ubunararibonye ngo baturebere uko bimeze. Ntacyo navuga kuri icyo kibazo.”

Ibizamini bisoza igihembwe cya gatatu n’umwaka w’amashuri wa 2021/2022 ku muri rusange byatangiye ku wa 27 Kamena, bizasozwa ku wa 11 Nyakanga ku biga mu yisumbuye mu gihe abiga mu y’Imyuga n’Ubumenyingiro bazasoza ku wa 13 Nyakanga 2022.

RIB yitabajwe mu iperereza ku banyeshuri ba rimwe mu mashuri y'i Kagugu bakekwaho gukopera ibizamini byateguwe na Leta
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza