Hamaze gukusanywa miliyari 4.3 Frw yo kubaka ibitaro by’icyitegererezo by’indwara z’umutima mu Rwanda

2 12-03-2018 - saa 20:31, Evariste Nsengimana

Team Heart yatangaje ko imaze gukusanya miliyoni eshanu z’amadolari ya Amerika (abarirwa muri miliyari 4.3 Frw) agenewe umushinga wo kubaka ibitaro by’icyitegerezo by’indwara z’umutima mu Rwanda.

Uyu mushinga watangijwe mu 2014 ubwo itsinda ry’inzobere z’abaganga bavura indwara muri Amerika, Team Heart, zabonye imbogamizi mu gukurikirana abarwayi, aho mu basaga ibihumbi 5000 basuzumwe mu Rwanda havuwe 150 gusa.

Icyo gihe Team Heart yasabye Minisiteri y’ubuzima (Minisante) ko byaba byiza hubatswe ibitaro by’icyitegererezo mu Rwanda ariko imbogamizi ziba ku madolari miliyoni 5,6 y’Amerika yagombaga kwifashishwa hubakwa ibyo bitaro n’andi miliyoni 10$ yo kugura ibikoresho bizifashishwamo.

U Rwanda rwashatse ikibanza cyo kubakamo ibyo bitaro i Masaka mu Karere ka Kicukiro, Team Heart yiyemeza gukusanya ayo mafaranga no gukurikirana imirimo yo kubaka guhera muri 2018.

Muri Gicurasi 2016, Madamu Jeannette Kagame yitabiriye igikorwa cyo gutangiza gukusanya iyo nkunga, cyabereye mu Mujyi wa Boston muri Leta Zunze Ubumwe za Amerika, ku bufatanye na Team Heart n’andi matsinda byafatanyaga kuvura indwara z’umutima.

Umuyobozi akaba n’umwe mu bashinze Team Heart, Morton R. Bolman, yabwiye IGIHE ko hamaze gukorwa imbanzirizamushinga yo kubaka ibyo bitaro.

Yagize ati “Twakoze imbanzirizamushinga ubu dutegereje ko Minisiteri y’ubuzima iyemeza. Iyo mbanzirizamushinga igamije kureba uruhare rw’abarwayi bo mu Rwanda bafite bagira mu kwivuza kandi tuzakomeza gushaka uko amafaranga bishyuzwa yagabanuka kuko abarwayi benshi baho nta bushobozi buhambaye bafite. Uramutse udateganyije uko abo bantu bakwishyurirwa, ntaho waba ubasize ntabwo wagera ku buvuzi burambye.”

Yavuze ko ibikorwa byo gukusanya inkunga bikomeje ariko ko bikigoranye ko abaterankunga b’abanyamahanga bigoye kugira ngo bagutere inkunga mu gihe utabereka imbanzirizamushinga iteguye neza.

Yavuze ko bazakomeza kuganira n’abafatanyabikorwa hagategurwa neza uwo mushinga n’igihe ibitari bizatangirira kubakwa kikamenyekana.

Abajijwe umubare w’amafaranga amaze gukusanywa, Morton yasubije ati “Ndatekereza ko kuvuga umubare w’amafaranga nyayo amaze gukusanywa ari ibyo kwitondera […] Tumaze gukusanya asaga miliyoni eshanu z’amadolari ya Amerika, kubona inkunga neza bisaba ko uba werekana ko witeguye gukomeza icyo uzayikoresha.”

Umuvugizi wa Ministeri y’Ubuzima, Kayumba Malick, yabwiye IGIHE ati “Team Heart, RBC na Minisante bari gukorana imbanzirizamushinga kuko kuvura indwara z’umutima birahenze, harimo no kureba uburyo abantu bazajya bivuza bitabahenze cyane.”

Minisiteri y’ubuzima ivuga ko kugira ngo umurwayi ajye kuvurirwa hanze, bisaba amafaranga asaga miliyoni 25 Frw harimo itike, icumbi n’umurwaza n’ibindi.

Iyo izo nzobere zaje mu Rwanda zikavura abarwayi bakoresheje mitiweli, Leta ibinyujije muri Minisiteri y’ubuzima n’Ikigo cy’ubwitegenyirize hishyurwa asaga miliyini 2.5 Frw kuri buri murwayi hakiyongeraho n’andi atangwa n’abandi bafatanyabikorwa kugira ngo ibikorwa by’ubuvuzi bigende neza.

Umuyobozi wa Team Heart, Morton R. Bolman
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Emma 2018-03-13 09:43:45

Iki gikorwa barimo ni ingenzi kandi hatabarws benshi, ahubwo ibigaro byaratinze ababisbinzwe nibashyiremo imbaraga gahundo y’ibitaro itangizwe. Kuba baza rimwe m’umwaka ndatekereza ko ibigaro nibyuzura hazavurwa benshi.

2
Denys 2018-03-13 02:02:37

Ubundi umuyobozi mwiza ni uzi gukora ubuvugizi aho bigomba. Igikorwa ni ntamakemwa

Kwamamaza