Hagiye gutangira ikindi gice cy’Ikinamico Umurage kizibanda ku ngingo enye

2 7-11-2018 - saa 16:00, Akayezu Jean de Dieu

Gukangurira urubyiruko guharanira kumenya ubuzima bw’imyororokere no kwamagana ihohoterwa rishingiye ku gitsina, ni zimwe mu ngingo zizibandwaho mu gice cya Gatatu cy’ikinamico Umurage giteganyijwe gutangira muri uku kwezi.

Iyi kinamico y’uruhererekane ije nyuma y’izabanje ‘Umurage Urukwiriye’ ndetse n’iheruka yitwaga ‘Impano n’Impamba’, ikurikiyeho izaba igizwe n’ibice 54, ikazakinwa mu gihe cy’ibyumweru 26, aho izajya itambuka kuri Radio Rwanda ikongera kunyura kuri City Radio, Isango Star, Radio Salus, na Radio Izuba.

Mu kiganiro n’abanyamakuru cyo kuri uyu wa 6 Ugushyingo 2018, Umuyobozi wa Umurage Communication for Development (UmC), Kwizera Jean Bosco, yavuze ko muri gahunda bazibandaho harimo kwigisha urubyiruko ubuzima bw’imyororokere no kwirinda agakoko gatera Sida.

Hari kandi kwamagana ihohoterwa n’ivangura rishingiye ku gitsina, kuboneza urubyaro n’ibiganiro hagati y’abashakanye no kwita ku buzima bw’umubyeyi kuva asamye no kwirinda Malariya.

Yakomeje agira ati “Ku buryo izo ngingo uko ari enye, tuzagenda tugira n’izindi nsanganyamatsiko ntoya harimo nko kurwanya maraliya bizajya binyura muri buri gasozi tuzagenda dukinira.”

Ushinzwe gutunganya ikinamico, Nzeyimana Theodore, yavuze ko iyo bakina uburyo biba byubatse hatabaho kubwira abantu ngo bajye kwa muganga, ngo ni mukore ibi cyangwa ibi, ahubwo bubaka abazabera urugero abandi.

Yagize ati “Abo bantu akenshi aba ari batatu, harimo uyoboye inkuru, iruhande rwe hakaba umurwanya, ku rundi ruhande hakaba umushyigikiye. Abo bantu nibo baba bayoboye inkuru ku buryo wa wundi usa n’aho azayobora inkuru ku nsanganyamatsiko twamuhaye atangira asa n’utazi neza.”

“Icyo gukora ariko rwa ruhande rw’umushyigikiye akagenda amwereka, yagenda ku ruhande rw’umurwanya akaba ariwe uhura n’ingorane nawe akazarwana no kuzivamo bikazarangira ahindutse yamara guhinduka ubwo tuba duhamya ko yahindukanye n’abamukurikiye (abumva ikinamico).”

Umurage Communication for Development, ni umuryango utari uwa leta umaze kumenyererwa mu gukora ubukangurambaga no gutanga ubutumwa bwubaka umuryango Nyarwanda binyuze mu ikinamico y’uruhererekane.

Ubushakashatsi bwakozwe n’iki kigo ku bufatanye na Population Media Center, muri Nyakanga uyu mwaka bwagaragaje ko abantu 71% bumvise ikinamico Umurage kuri Radio umunani.

Ikinamico ya mbere ’Umurage Urukwiye’ yumviswe n’abaturage barenga miliyoni 7.5, mu gihe abagera kuri 84% bamaze gusobanukirwa serivisi zijyanye no kumenya uburenganzira bw’umwana.

Umuyobozi Mukuru w’Ikigo Population Media Center, gikorera mu bihugu 54 byo ku Isi, kikaba ari nacyo cyakomotseho umuryango, UMC, unategura ikinamico ‘Umurage’, William Ryerson Mphil, yavuze ko ku bufatanye n’abaterankunga barimo USAID n’inzego zitandukanye bazakomeza gushyigikira ubu buryo bwo kubaka umuryango binyuze mu ikinamico.

Umuyobozi wa Population Media Center, William Ryerson Mphil
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Henda 2018-11-08 00:11:37

Ariko aba bazungu muha izo media muzareba icyo bazabakorera.aba nibo bari gucengezamo abana bacu ubutinganyi,ntimugireho hari ahandi handi baca,ni aha muri iyi miryango yabo,rwose icyaba cyiza bibukwirukana umunyamahanga wese aho ava akagera akatuvira aha kuko kuba abazungu baza bazanye umwijima tutigize tugira,rwose aba bantu bakorana na satani dore ko ari nabo bayivugaga kuko twe tutigeze tuyimenya,twamenye Imana y u Rwanda gusa yo yaremye byose kandi utayisenga asenga ibigirwamana .nukuri mukanure amaso ni uku bari gucengezamo ubutinganyi,kandi umunsi bafashe media platform ya Afrika nuzaba mureba kuko Afrika izaba izasara nta n igaruriro,mureke guha aba bacanshuro ijambo mu gihugu cyacu ibyo bakoze mwese hari ubiyobewe?ubu rero bahinduye game y ukuntu bazajya baza bitwaje amafaranga.

2
bosco 2018-11-07 17:53:38

Bibaye byiza izo nyigisho zajya zinyura no ku ikoranabunga nka Youtube kugira ngo n’abatabona umwanya uhagije wo gutega amatwi amakuru ya Radio ahubwo bakaba bakurikirana ayo kuri internet cyane mubinyamakuru na bo izo nyigisho ntizizabacike. NI CYO CYARI IGITEKEREZO CYANJYE KANDI MURAKOZE.

Kwamamaza