IGIHE

Guverineri Mufulukye yatanze icyumweru cyo kumenya irengero ry’abana 2300 bataye ishuri mu ntara ye

1 10-09-2019 - saa 08:31, Hakizimana Jean Paul

Guverineri w’Intara y’Iburairazuba, Mufulukye Fred, yatanze icyumweru kimwe ku bayobozi bo mu nzego z’ibanze n’abashinzwe uburezi cyo kuba babonye amakuru ku bana 2323 bo muri iyi ntara bataye ishuri.

Iki Cyumweru yagitanze kuri uyu wa Mbere mu nama yagiranye n’abayobozi bose bo mu turere twa Kayonza, Ngoma na Kirehe mu nama yari igamije gukebura imikorere n’imyitwarire ya bamwe mu bayobozi bibutswa no gukora inshingano zabo neza nkuko bikwiye.

Mu ntangiriro z’uyu mwaka mu Ntara y’Iburasirazuba habaruwe abana 15519 bataye ishuri, ubuyobozi bwakoze ubukangurambaga abagera ku 13196 barisubiramo abandi 2323 ntibubafitiye amakuru.

Mufulukye yavuze ko ikibazo kirebana n’abana bataye ishuri nta bisobanuro na bimwe bikwiye gutangwa uretse gushaka amakuru kuri bo bagasubizwa mu ishuri.

Ati “ Hari abatubwira ko bagiye kwiga ahandi, abandi bati bagiye kwiga imyuga, ariko hari n’abadafite ibisobanuro abo bose rero twabahaye icyumweru kimwe cyo kuba babonye amakuru kuri abo bana bose tukagera ku mubyeyi, uwo dusanze atarakoze inshingano ze ngo ajyane umwana ku ishuri cyangwa ngo amugaburire nawe hari amategeko amuhana icyo dushaka ni uko umwana wese ajya ku ishuri.”

Mufulukye yasabye abayobozi gukorera hamwe nk’ikipe bagahuza amakuru mu byo bakora byose ngo kuko aribyo bizatuma bateza imbere umuturage.

Umuyobozi ushinzwe uburezi mu Karere ka Ngoma, Murekatete Judithe, yavuze ko abana 497 bataragarurwa mu ishuri muri aka karere barimo 301 bagiye gushaka akazi ko mu rugo abandi bakajya kurinda umuceri mu bishanga.

Ati “Harimo abana bajya gukora mu bishanga, mu birombe abandi bakava mu ishuri bajya guhungura ibigori iyo byeze, ikindi abashinzwe uburezi mu mirenge ntabwo badufasha gukurikirana aba bana neza nkuko bikwiye.”

Muri iyi ntara hagiye gutangizwa uburyo bushya bwiswe icyumba ntangamibare bwitezweho gufasha inzego z’ibanze n’abayobozi b’ibigo by’amashuri guhuza amakuru ku bana basiba ishuri uko bishakiye n’abandi barivamo ku buryo bamenyekana bakanakurikiranwa.

Muri iyi nama hanenzwe abakozi badakora akazi kabo neza, hatangwa urugero ku bakora muri Isange One Stop Center ku mikorere mibi ikunda kubaranga.

Guverineri Mufulukye Fred yatanze icyumweru kimwe ngo abana barenga 2000 bataye ishuri hamenyekane amakuru y'aho bahererereye
Abayobozi batandukanye bavuye muri iyi nama biyemeje gukorera hamwe
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Aferky 2019-09-10 03:55:08

Bino bintu Gouverneur akoze nibyiza. Abayobozi babikurikirane ariko hakurikiranwe ababyeyi batita kurubyaro rwabo, nibo babera umugogoro Leta babyara abo badashoboye kurera. Mugihugu hose bikwiye gukorwa nkuko, ababyeyi gito, ababyara ntagahunda, abata abana bakajya bahugurwa muruhame bananirana bagahanwa. Kureka amashure nibindi byazagabanuka kuburyo bushimishije n’Abayobozi bashyiremwo imbaraga yo kumenya imiryango y’Abanyarwanda uko ibayeho, abafashwa, abahugurwa, abigishwa twese tukajyana nicyerekezo cyiza Perezida wacu atuganishamwo ntawusigaye inyuma.

Kwamamaza