IGIHE

Guverineri Gasana yeretse abayobora Gisagara icyabafasha kuvana abaturage mu bukene

0 13-06-2019 - saa 09:20, Prudence Kwizera

Guverineri w’Intara y’Amajyepfo, CG Gasana Emmanuel, yabwiye abayobozi bo mu Karere ka Gisagara ko kwiyoroshya, gukorera hamwe no kwihanganirana ari byo bizatuma babasha kugera ku ntego yo guteza imbere abaturage no guhindura imibereho yabo.

Yabibabwiye kuri uyu wa Gatatu ubwo yabahaga ikiganiro mu mwiherero bari gukorera mu Karere ka Muhanga hagamijwe kwisuzuma barebera hamwe uko bakwihutisha iterambere bakazamura n’imibereho y’abaturage.

Uwo mwiherero w’iminsi ibiri wahurije hamwe Komite Nyobozi y’Akarere ka Gisagara, Inama Njyanama, ihuriro ry’abafatanyabikorwa, abakozi b’akarere n’Abanyamabanga Nshingwabikorwa b’imirenge.

Guverineri Gasana yababwiye ko bagomba kwirinda amatiku bagakorera hamwe mu bwuzuzanye.

Ati “Mukwiye kwirinda amatiku n’inzangano mu kazi kuko kwangana birahenda kandi nta nyungu ibamo. Nimukorera hamwe mukajya inama ibyo mwiyemeje byose muzabigeraho. Mushyire imbere umuturage muzamure imibereho y’abaturage batere imbere.”

Abayobozi bari bitabiriye uwo mwiherero biyemeje ko bagiye kwita ku bibazo bibangamiye abaturage muri iki gihe birimo abadafite aho kuba, abatagira ubwiherero n’abararana n’amatungo mu nzu.
Bihaye igihe cy’amezi atandatu ko ibyo bibazo baba babikemuye, bashyiraho komite izafasha kugenzura ko byakozwe.

Umuyobozi w’Akarere ka Gisagara, Rutaburingoga Jérôme, yavuze ko umwiherero bakoze bawufatiyemo ingamba zo kwivugurura mu mikorere no kubasha kugera ku byo biyemeje

Ati “Ibyo twiyemeje kutabishyira mu bikorwa byo ntabwo bishoboka kuko tutagomba kubitegereza ku muntu umwe, hagomba kubaho inzego zibikurikirana utabishyira mu bikorwa akava mu nzira abandi bagakomeza; nta muntu ukwiye kuba inzitizi ku iterambere ry’akarere”.

Imibare yerekana ko mu Karere ka Gisagara hari imiryango irenga 800 isembera kuko itagira aho kuba.

Mu mwiherero wabaye ihuriro ry’abafatanyabikorwa b’akarere biyemeje gutanga miliyari imwe na miliyoni 300 Frw azafasha kubaka inzu zigera kuri 500 zizahabwa abasembera.

Mu mihigo y’umwaka ushize w’imihigo wa 2017/18, Akarere ka Gisagara kaje mu myanya 10 ya nyuma. Biyemeje ko bagiye gukora neza ku buryo batazongera kugira amanota mabi.

Guverineri w’Intara y’Amajyepfo, CG Gasana Emmanuel, aha impanuro abayobozi bo mu Karere ka Gisagara
Umuyobozi w’Akarere ka Gisagara, Rutaburingoga Jérôme, yavuze ko ibyo biyemeje bagiye kubishyira mu bikorwa
Biyemeje ko bagiye kongera imbaraga mu mikorere kandi bagakorera ku ntego
Abayobozi, abakozi n'abafatanyabikorwa b'Akarere ka Gisagara bahuriye mu mwiherero wo kwisuzuma

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza